سیاھگ: میر محمد علی تالپور۔ رجانک: ولید گربنی
داتگیں عکسا زمان مریءِ جنازہءِ نماز وانگ بیگا انت۔
زمان مری یک کارییں وکیلے ات کہ 19 آگستءَ منیر احمد میروانی نامیں وکیلےءِ ھمراھیا شہ کوئٹہ چکاپنگ بیت۔ آئیءِ ٹپ ٹوریں جسد 6 سپتمبرءَ ماں مستونک مردماں دستا کپت۔
آئیءِ پشپد یک غمیگیں جنوزامے، ھفت جنیں چک انت، یک بچّے، پرسیگیں کٹمے و زھرگِنکیں بلوچ قوم انت۔
بلوچستان بار اسوسی ایشنءَ 24 آگستءَ پہ تھروزی کاربندیءِ جار جت۔ آوان دوئیں وکیلاں چکانپگءِ ذموار سرکاری چاریگ منّ اتنت۔ بلوچستانءِ کلانیں دادگاہءِ سریں قاضیا دوئیں وکیلاں چکانپگءِ جیڑہ مار ات و شہ وتی نیمگا واکدار ئی حکم دات انت کہ آواں پہ سلامتی زیتا زیت آزاد بہ کنائین انت۔ اے سرجمیں توجیل بے جواب پشت کپ انت! پرچاکہ ھما کساں زمان مری چکانپتگ ات، ھچ کسءِ دیما جواب دیگا مجبور نہ اتنت۔ بلوچ بیگءِ سببا زمان مری کشگ بیت۔ اے باروا ھر بلوچ ایوکا سرکارا میابار منّيت۔
خالد حیات جمالدینی ھم ھمے وڑا بیمتراپ دیگ بیتگ، بلے زمان مریءِ حالا رسینگ بدلا آئی اش ھداروکی بخشتگ۔ البت آ حسابا کہ ماں بلوچستان زوراکی برجاہ دارگ بیگا انت، زوراکیانی دیما دارگا جنزءِ سوبین بیگا پیسر دگہ بازین کسانی وڑا روچے نہ روچے جمالدینیءِ بھت ھم آئیا یلہ دات انت۔
پادمالیں قومءِ یکـوئی برجاھیں جنزءِ سبب ھمے وڑیں جرم انت۔ ھنچوش کہ فرانسی انقلابءِ نامدارتریں مرد 'مکسی میلین رابسپیرے' گشیت "مردمگریءِ دشمناں سزا دیگ رحمدلی انت، آواں پھلّ کنگ ظلم انت"۔ بلوچ مردم وتی سرا بیوکیں اے زوراکیاں ھچبر پھلّ نہ کن انت۔
من وت چدا پیسر ھچبر کسےءِ زندگی نامہ نہ نبیستگ، بلے اے دردناکیں کپتا منا پہ اے کارءِ کنگا مجبور کتگ۔ چہ زمان مریءِ پجّا آرگا ساری 1974ءَ ماں مری ھنداں بیوکیں فوجی آپریشنءِ درگتا گوں آئیءِ کٹما من پجّا آروک بیتاں۔ شہ ما لھتے کس زمسانءِ موسما ھماوانی ھندا مھتل بیتیں۔ وھدے کہ مئے توشگ خلاص بیت انت و یکـّیں روچا دگہ توشگ آرگ بیت نہ کت، گڈا آواں وتی کموکین توشگا مارا شریدار کت۔
ما ں افغانستان نندگءِ وھدا یک روچے من شہ ھلمند دیم پہ کابل روگا اتاں، زمان مریءِ خدامرزییں پت مھراب مریءَ منا یک کرّےءَ توار کت و منا لھتے زر ئی دات کہ منی سفرءِ خرچ بہ بنت۔ آئیءِ ھوریا من و دگہ ھزاراں بلوچ آوھدی لگانڈویں اففانستان سرکارءِ داتگیں زرّاں وتی وھدا گوازینگا اتیں۔ زر وا من نہ زرت انت، بلے ھما مارشت انگت منی دلا پشت کپتگ۔
گون زمان مریءَ منی اولی گدار ماں قلات –افغانستانءَ پناھگیرانی بنجاھا سال 1978ءَ بیت۔ آئی وانگا ھدوناکیں نوکجوانیں شاگردے ات و فٹبال لئیب کنگءِ شوق اتی۔ بلـّی توریں اودا زند گوازینگ سکّ ات، بلے وتی عاقبتا آئی گوں بودناکیں دیدےءَ چارگا ات۔ آئیءِ سراماد کنوکیں کندگانی کٹاکگ انگت منی گوشاں توار کن انت۔ نیں ریاستا آئیءِ کندگ و کٹمءِ وشحالی پہ مدامی ایرموش کت انت۔ ھمے ریاست زمان مری و دگہ بلوچاں وتی مردم ظاھر کنت!
ڈلیں پڑا پادشپاد لئیب کنوکانی نیاما آئی شہ ما پھکاں تیزتر ات۔ برفیں سارتی، وشیں موسم و جلیں گرما آئیا یکـّیں وڑا لئیب کت۔ رستگیں سرپدیانی وڑا آئی فٹبالا ھم دگراں شریدار کنگا ساڑی ات۔
منی سروکیا ھستیں اسکولءِ استاد من و یک دگہ بلوچے اتیں۔ پہ ھیئل کنگا ھدوناکیں شاگرد صدان اتنت۔ من براں برانا برزتریں کلاسانی شاگرد ذمواری دات انت کہ آ جھلتریں کلاسانی شاگرداں بہ وانین انت۔ آئیا (زمان)ءَ گوں واھگ و دلگوشداری شہ وت نزورتریں شاگرد ضرورتانی ھمردیا وانیں تنت۔
ھما شاگرد کہ آئیا وانیت انت، دیمترا ھمائیءِ استادیءِ راھچار اتنت۔ نزورتریں شاگردانی کمکا زمان مری ھچبر چک پد نہ بیت ات۔ ذمواریءِ ھمے مارشت ات کہ زمانءِ بے دروریا شون دیگا ات۔ آئی مدام ھدوناک ات کہ جستانی پسّواں درگيجگءِ راھا ھیئل بہ کنت و ھيئل بہ دات۔
پہ گيئشتر وانگا دگہ پناھگیریں بلوچ وانوکانی ھمراھیا آئی رندترا روسءَ شت۔ پرچاکہ روسءَ وانگءِ اھمیت گيئشتر ات۔ آئی مدامی وڑا شیوار ات و زیت وکیلے جوڑ بیت۔ چھر کنگا پد 1994ءَ وکیلی ئی بنا کت۔
پاکستانءَ وا دلجمیں ارادہ کتگ کہ بلوچاں شہ راھا دیر بہ کنت۔ پرچاکہ چاریگی نبجاہ و سیمسری فوجءِ واهگانی رندا بلوچ نہ روگا انت۔ ھر یک کشتگیں بلوچ پہ بلوچستانءِ سرکارا، پہ بنجاہءِ -باچکولو -جمھوری سرکارا، پہ بیتواریں رسانکاں (روچتاک ٹائمز ایوکیں رسانک انت آئیا زمان مریءِ بیرانیءِ حال تالاں کت) و پہ غیر سرکاری واکاں یک زنڈیں میاربارییے انت۔ دروغیں قول و بن پچیں 'پیکجانی' خبراں تالان کنگا سرکار وا دم نہ برگا انت۔ بلوچ سرپد انت کہ زوراکیانی دیما دارگءِ سرکاری خبرانی وڑا قول و پکجءِ خبر ھم دروغ انت۔
'عمر چیما'ءِ سرا بیوکیں زوراکیانی خلافا رسانکانی چست ایر برحق انت، بلے یک ھنچیں وکیلےءِ کوشءِ باروا کہ آئیءِ ایوکیں میار چکاپنگ بیتگیں مردمانی باروا تچ تاچ کنگ ات؛ رسانک کرّ و کور انت۔ چکـانپنگ بیتگیں مردمانی نیاما یکـّے زمان مریءِ وتی ناکو زھگ انت کہ بادے مرچی بیگواہ انت۔ اے وڑیں زوراکی دنیاءِ ھچ کنڈا اوپار کنگ نہ بی انت۔
'مومیا ابو جمال' نامیں بندیگیں امریکائی جھدکارےءَ نبیستگ "وھدے کہ یک جیڑوے دیما کئیت و تو زانئے ایشی برحقیں جیڑوے انت، بلے آئیءِ پلانگریا نہ زیرئے، ھما دمانا تئی بیرانی بنا بیت انت۔ و من ھچبر انچو روح پہ انصاف لوٹگا نہ دیستگ"۔ آخر تا کدین بلوچ اے زوراکیاں اوپار کنت و اندوھاں 'انتفادوے'ءِ دروشما سر چست کنگا نہ ھلـّیت؟ اے نسل کشیءِ خلافا وتی دپا آ تاکدیں مھر جت کن انت؟
منی خیالا سربتگیں روح بیگءِ واھگ بلوچان نیست انت۔ ایشیءِ بدلا الـّما جنگءِ پڑا مرگ اش دوست تر بیت انت۔ انگتیں اے زوراکی آواں دیم پہ آزاد بلوچستانےءَ برگا انت؛ ھنچیں آزاد ملکےءَ کہ اودا دگانی سرا چکانپگ بیگ و کشگ بیگءِ بیم ودارا نہ بیت۔
اے سیاھگ گوں یک شعرےءَ سرجم کنگ بیتگ کہ آئیءِ رجانگ کنگ آسودگیں کارے نہ انت۔ اے نابودیءِ پھلـّیا لوٹاں. ولید
هیچ نظری موجود نیست:
ارسال یک نظر
وتی کلوا چێرا نبیس إت