بلوچستانءِ سیاسی، چاگردی، لبزانکی و دگہ وانندویں مردماں گچین کنگ و کشگءِ پاکستانی توجیل انگت برجاہ انت۔
شہ 4 جولائی 2010ءَ بہ گر تاکہ 4 اکتوبر 2010 لٹ کٹ و تیرآماچیں جسدانی حساب 21 کس بیت انت۔ اے حسابا ماھے 7 گچینی بلوچ کشگ بیتگ انت۔
سرجمیں مردم یکـّیں وڑا جنگ بیتگ انت۔ بزاں اولا دستگير، پدا بے حسابا جنگ و ٹپ ٹور کنگ، شہ ایشی رند پیشانیا تیر جنگ و جون دگانی کرّا دئور دیگ بیتگ انت۔
حیرانیءِ گپ ایش انت کہ مشرف دئورا ھزاراں بلوچ دستگیر کنگ بیتگ اتنت، بلے شہ آواں یکـّے ھم کشگ و تلپیں جاگھاں دئور دیگ نہ بیتگ ات۔ ھر بلوچے کہ آ دئورءِ زوراکیانی آماچ بیتگ ات، آ دیم پہ دیمی جنگا یا بمبگواریانی آماچ بیتگ ات۔
گچینی بلوچاں کشگءِ کار نواب اسلم رئیسانی و نواب ذوالفقار مگسیءِ سوجانی سرا بیگا انت۔
بلوچستانءِ حالاں وانوک و چاروکاں اگر یاد بہ بیت، نواب ذوالفقار مگسیءَ جون ماھا گشتگ ات کہ سلاحبندیں مردم پولیساں ٹارگٹ کلنگءِ آماچ کن انت، گڈا پولیس ھم ھماوانی وڑا کنت۔ بزاں گچینی مردماں کشیت۔ شہ ھمے بیانا رند دستگیر کتگيں بلوچ جھدکارانی جسد دگانی کشاں مردماں دستا کپگا انت۔
نواب اسلم رئیسانیءَ وا پکـّا ارادہ کتگ کہ آئی وتی سیاد میر عالی بگٹیءِ نوابی کرسیا مُھرتر کنت انت۔ پہ اے مقصدا آئی براھمدغ بگٹیءَ گیئشا شہ گيئشتر سیاسی و مالی تاوان دیگا جھدا انت۔
٭ترانگ بہ کپ ات کہ میر عالی بگٹی شہ ماتءِ نیمگا گوں خان قلات و اسلم رئیسانی سیادی کنت۔
هیچ نظری موجود نیست:
ارسال یک نظر
وتی کلوا چێرا نبیس إت