برطانیا سرکارا پنچ ایرانیانی مڈی داشت اَنت

روچتاک نیویارک ٹائمزءِ حالےءَ داتگ کہ سعودی عربءِ سفیرا ماں امریکا کشگءِ پندلسازیءِ ردا برطانیا سرکارا پنچ ایرانیانی مالی مڈیاں دارگءِ جار جتگ۔ اے پنچیں کسانی نیاما دو مردم ھما اَنت کہ امریکاءَ دستگیر کنگ بیتگ اَنت و دگہ سئے کس ایرانءِ القدس فورسءِ افسر اَنت۔ ھمے افسرانی سرا پندلسازیا ھوار بیگءِ شکّ اِنت۔

ایرانی سرکارءِ ردا سعودیءِ سفیرا کشگءِ پندلسازیا دستگیر بیتگیں مردم سرکار مخالف ٹولی مجاھدیں خلقءِ مردم اِنت۔ مجاھدین خلق ایرانی سرکارا ٹرورسٹ گلے منّتگ۔ ایشاں صداں ایرانی واکدار کشتگ اَنت۔ مجاھدین خلقءِ کشتگیں ایرانیانی نیاما لھتے زنڈیں سیاسی واکدار بیتگ اَنت۔

ماں امریکا نندارینتگیں سعودی عربءِ سفیرا کشگءِ پندلسازیءِ میارا امریکاءَ یک غلام شکوری نامینے دستگیر کتگ۔ امریکائی پولیسا رستگیں سرپدیانی ردا غلام شکوری ایرانءِ القدس فورسءِ زنڈیں کارمندے اِنت۔

انگت دلجمیں سرپدی دیگ نہ بیتگ کہ ایران پرچا سعودیءِ سفیرا کوشارینگا واھوک بیتگ۔ البت ایرانی سرکارءِ ردا گوں اے بے بنیں چست ایرا امریکا واھوک اِنت کہ ایران و سعودیءِ دوستیا بہ سندیت۔ ایرانیاں گوں سعودی عربءَ وتی دوستیءِ حال نہ داتگ۔ البت ماں بحرین دویں ملکانی دستمانجنیانی حالاں ھر کس سھیگ اِنت۔ ھمے ردا سعودی و ایرانءِ سرکاراں یکّا دگرا سک باز ڈوبارتگ۔