بی ال اے، بی ال اف، بی آر اے و لشکر بلوچستان نیں چہ ما نہ رکّ اَنت: تحریک نفاذ امن بلوچستان

تحریک نفاذءِ امن بلوچستان نامیں ٹولیےءَ روچتاک توارا شنگ بیتگیں وتی بیانےءَ لالا حفیظ، نورمحمد مری و عبدل مینگل نامیں سئے کساں کشگءِ ذمہ وتی سرا زرتگ و گشتگ ھر کس شہ راھا ردیں کار بہ کنت، ھمے انجاما رسینگ بیت۔ دیمترا بلوچستانءِ آزادیءِ ناما سلاحبندیں جنگ کنوکیں ٹولیانی نام ئی گپتگ اَنت و گشتگ کہ اے ٹولی وتا رکّینگءِ بند بست بہ کن اَنت پرچاکہ تحریک نفاذ امن آوانی رندا اِنت۔

بیانا دیمترا داتگ کہ بلوچ وتی زھگاں گوں اے گلاں ھوار بیگا مہ اِل اَنت۔ اگر نہ، گڈا شہ آواں ھچ گلہ مہ کن اَنت۔ پرچاکہ آ مردماں سبق دیگا بلد اَنت و ھر حالتا بلوچ وطنءَ ایمن کن اَنت۔ ”ھما کس کہ مئے بزرگانی خلافا سلّیں گپ کن ھم جنگ بی اَنت“ بیانا داتگ۔

تحریک نفاذ امنءِ بیانءِ ردا ”داکٹر اللہ نظر دریں ملکےءَ تچگءِ راھے شوھازا اِنت۔ اے وڑی مردم پہ بلوچ قومءَ ھچ کت نہ کن اَنت۔ آئیءِ واک نیں نزور ترّتگ پمیشا سرء وت مردماں گشان اِنت۔ ھزاراں ثبوت ھست اَنت کہ اے مردم بلوچ قومءِ قاتل اَنت۔

”بلوچ قوما شہ ھر کسا گیشتر تاوان ھمیشاں داتگ۔ ایشانی سرکشّگا ساری نہ کسےءِ جسد کپتہ بیتگ، نے کہ مردمے مرتگ۔ دگراں بل، فوجی دورا ھم انچو (کشگ) نہ بیتگ۔ ایش ثابت کنت کہ جسدانی سرا سیاست کنوک اَنت۔ ھمے راستیا آ وتی گالگداراں منّگا اَنت و گشگا اَنت کہ آواں جسد قبول اَنت۔“

دلگوش: پہ اے حالءِ شنگ کنگا بلوچی نیوزءَ کس میاریگ مہ کنت، پرچاکہ سرمچارانی دلدوستیں حالتاک روچتاک توارءَ ایشی شنگ کتگ و ما شہ ھمودا زرتگ۔