شھید زاھد حسینءِ سئمی سالروچ دارگ بوت

شھید زاھد حسین بلوچءِ سیمی سالروچ لیاری نوالینءَ دارگ بوت۔ سالروچءَ بلوچ راجی گلاں ھوار دگہ سیاسی ءُ چاگردی گلانی سروکاں بھر زرت۔

گوں مچیءَ بی این پیءِ سروک سردار اختر جان مینگلءَ تران کناں گشت کہ زاھد حسین بلوچءِ کوش بلوچ نسل کشیءِ تسلسل انت۔ زاھد بلوچءِ کوشءَ ھما مردم ھوار بوتگ اَنت کہ آ بلوچ راجءِ دژمن انت۔

اختر مینگلءَ گیش کت کہ کراچیءِ دیمرویءِ تھا بلوچ راجءِ کرد مزن انت۔ یک پندلےءِ سرا بلوچ راج پد منتگ کنگ بوتگ۔ پمیشا کراچیءِ تھا زاھد حسینءِ وڑیں جوانیں باسک شھید کنگ بوتگ انت۔ ایشانی مقصد اِنت کہ بلوچ راجی گل کراچیءِ تھا کار مہ کن انت۔

آئیا اے خبر ھم منّ ات کہ کراچیءِ سرا توجہ نہ دیگ راج دوستیں گلانی سیاسی پدمنتگیءِ سبب جوڑ بوتگ۔ کراچیءَ بلوچ ءِ سرا ایوبی آمریتءَ بگر دانکہ مشرفءِ وھدا ظلم ءُ زوراکی بوتگ۔

”بلوچستانءِ تھا ھر وھد بیوکیں فوج کَشیانی خلافا کراچیءِ بلوچاں باز جھد کتگ۔ پمیشا پاکستانءِ حکمراناں کراچیءِ بلوچ وت ما وتا جنگ داتگ انت۔ تانکہ آ وتی راجی جھدءِ نیمگا دلگوش مہ دی انت“ اخترءَ گشت۔

آئیا دیمترا سرپدی دات کہ بلوچستانءَ تنیگا ٹپ ءُ ٹوریں لاش رسگا انت۔ 14 سالءِ ورناھاں بگر داں 25 سالءِ ورناھانی 220 ٹپ ءُ ٹورئیں لاش دستا کپتگ اَنت۔ وش نیوز

بی این پیءِ قائم مقام صدر ڈاکٹر جھانزیب جمالدینیءَ گوں میڈیاءَ تران کناں گشت کہ زاھد حسینءِ کشوک ھما انت کہ آ بلوچ راجءِ کشگا ھوار انت۔ کشوکانی دستگیریءِ باروا آئیا گشت کہ ادا بینظیر بھٹو و میرمرتضیٰ بھٹوءِ کشندہ گرگ نہ بنت، گڈا زاھدءِ کشندہ چہ پیما دستگیر کنگ بنت۔ وش نیوز