ایران ماں دریں ملکاں وتی مخالفاں چونکا کشیت

سیاھگ: رویا حکاکیان۔ رجانک: ولید گربنی

17 ستمبر 1992ءَ شپءِ کلاک 10:45ءَ دو سیاہ تابیں مردم ماں برلنءَ یک رسٹورانٹےءِ اھوتیں شام وری دیوانےءَ پترت اَنت و یک ٹیبلےءِ کشا نشتگیں ایرانءِ سرکار مخالفیں ھشت مردمانی سربانا اوشتات اَنت۔ دویں مردمانی نیاما برزتریں کسا توار پردات ”اوڑے یلویں ماتانی چکاں!“

پدا آئیا دستکش پوشتگیں دست وتی کوپگا درتکگیں کیفا برت۔ تھاردیمیں بتّیانی تاموریں کوٹیءِ تھا آئیءِ کشی نیمگا شھم جنگ بنا بوت۔ شہ کیفا دراتکگیں تیراں نشتگیں مھمان دِردِر کت اَنت۔ دو راؤنڈاں، بزاں سرجمیا 26 تیرانی جنگ بیگا رند کلاشنکوفءِ توار اِنسِر ات۔

ٹیبلءِ دیما نشتگیں مزن عمرتریں مردم ایرانءِ نامدارتریں کرد راھدربر صادق شرفکندی ات۔ آ انگت وتی کرسیءِ سرا نشتگ ات، بلے سر ئی لونج ات۔ خونا آئیءِ اسپیتیں پشت میچلینت۔ یک دگہ مھمانے دوتل نشتگ ات و سکّیا ساہ کشّگا ات؛ گشیگا پہ گینے ساھا تکانسر ات۔ آئیءِ دیم آبجوءِ گلاسےءَ کپتگ ات۔ آ دگہ مردم زمینءِ سرا تتار اتنت۔ شہ ھشتیں کساں چار ھما شپا ماں ۔مائکونوس ۔نامیں رسٹورانٹا مرت اَنت۔

سروکیں تیرگواری کنوک عبدالرحمان بنی ھاشمی پدنام شریف ایرانیےات کہ ھما شپا بالیگرابےءَ سوار ترکیءَ شت۔ دومی روچا بسے گپت ئی و سیمسرا گوَست؛ ایرانءَ سر بوت۔ دو سال پیسر شہ اے تیرگواریا ھمے مردا ماں سویڈن نندارینتگیں سعودیءِ سفیرا کشگءِ جھد کتگ ات۔ سویڈیںءِ واکاں آئی دستگیر و پدا یلہ داتگ ات۔ انگت سئے سال ساریا ھمیشیا ماں سوئزرلند مراد طالبی نامیں جلاملکیں ایرانی پائلٹے کشتہ بیتگ۔

مائکونوس رسٹورانٹا مردمانی کشگ بیگا نزیک دو ھفتگا رند جرمنیءِ واکداراں ھمے ردا بازیں مردم دستگیر کت اَنت۔ ایشانی نیاما ایوکا یکّے ایرانیے ات۔ آ دگہ لبنانی ٹگانی ٹولیےءِ مردم اتنت کہ کسانیں دوزی، فورجری و دگہ ھنچنایں جرماں زانگ بیتگ اتنت۔

مئی 1993ءَ جرمنیءِ سرکاری وکیلا کیس سرجم کت و آئیا ایرانءِ چاریگی وزارتءِ سرا میار لڈ ّ ات۔ زھر گِنکّ و شریف دروشمیں ایرانی سفیرا امریکا و اسرائیل میاریگ کت اَنت کہ ھماوانی پندلانی ھمردیا ایرانءِ سرا میار لڈگ بیتگ۔ اے درگتا ایرانءِ درملکی جاورانی وزیر اکبر ولایتیءَ جرمن بندیگجاہءِ پانکوانی سرا یکّوںی دسبندی راہ دیاں کت کہ دستگیریں مردم الکاپیا چارگ وارگ کنگ بہ بی اَنت۔

ھمے سالءِ اکتوبرءَ، دادگاھیءِ بندات بیگا شہ لھتے روچ ساریا، ایرانءِ چاریگی وزیرعلی فلاحیانءَ گوں جرمنیءِ چاریگی وزیر برنڈ شمیت باورءَ چیرکائی گدار کت۔ دادگاھیا دارگءِ بدلا آئیا بازیں لبّانی کشا لبنانءَ بندیگیں اسرائیلی پائلٹ رون آرادءَ کہ ماں لبنان بیگواہ بیتگ ات، یلہ دیائینگءِ زبان ھم دات۔ گدارءِ نبیستگیں حال شون دی اَنت کہ واجہ شمیت باورءَ گشتگ کہ آئی ملکءِ قانونی چست ایرانی دیما بے واک اِنت۔ البت زبان ئی داتگ کہ دادگاھیءِ سببا ایرانءِ بیوکیں بدنامیا مانپوشگا کمک کنت۔

ھمے گدارءِ حال باز دیرا چیر دیگ نہ بوت۔ ایشی واجہ شمیت باورءِ دراجکشیں سیاسی زندءِ چکّا سیاھیں ٹکّے جوڑ بوت۔ اودا کہ علی فلاحیانی گپ اِنت، رندترا ھمے مائکونوس رسٹورانٹا مردمانی کشگءِ ردا انٹر پول آئیءِ رندا بوت۔

نزیک چار سال دراجکشیں دادگاھیءِ نیاما ایرانءِ چاریگیءِ وزارتءِ یک مزنیں کارمندےءَ وتا شہ آواں سست و پہ کیسا یک مھمیں گواھے جوڑ بوت۔ آئیا گشت کہ پچصد مردمانی لڑے جوڑ کنگ بیتگ کہ اسلام دشمنءِ بیگءِ ناما تھران اش کشگ لوٹیت۔ لڑا ھواریں لھتے مردم 1996ءَ کشگ بوت اَنت۔ ھر یک کسےءَ کشگءِ فیصلہ خاصیں آپریشانی یک کسانیں کمیٹےءَ کتگ۔ 
   

10 اپریل 1997ءَ دادگاھی سرجم بوت۔ اے دادگاھیا 176 گواہ آرگ بوت اَنت، 246 برا ایشیا نیاد کت و 3 ملیون ڈالر خرچ بوت۔ سریں قاضیا جرمءِ پندلساز ایرانی سرکارءِ سروک منّ اتنت۔ ”جرمے کہ 17 ستمبر 1992ءَ بیتگ، تچکا ایرانءِ سپریم لیڈر، صدر، درملکی و چاریگی وزارت و ایرانءِ انقلابی گارڈءِ سروکانی گشگءِ سرا بیتگ۔ ھمیش خاصیں آپریشاں کنوکیں کمیٹیءِ باسک اَنت“ قاضیا گشت۔

قاضیءِ فیصلہءِ سببا سرجمیں یورپی ملکاں وتی سفیر شہ ایرانءَ در کت اَنت و تانکہ شش ماھاں گوں ایران سفارتی رابطہ اش نہ کت۔ الّما ایرانءِ دیما ایشی یک ترندیں میانملکی پسّوے ات۔   
 

گوستگیں لھتے روچاں بازیں کساں گشتگ کہ واشنگٹنءَ نندارینتگیں سعودیءِ سفیرا ماں یک رسٹورانٹےءَ کشگءِ پندلسازی ایران سرکارئے بیت نہ کنت۔ اگر بیت، گڈا سر سستگیں مردماں کتگ۔ پرچاکہ پندلءِ لھتے تک ناسرجم پشت کپتگ اَنت و درملکی مردم زیرگ بیتگ اَنت۔ البت ھمے پندل و مائکونوس رسٹورانٹءِ بیڑ دگہ ڈول شون دیگا اَنت۔

بانک حکاکیان "Assassins of the Turquoise Palace" کتابءِ نبیسوک اِنت۔ ھمے کتاب دریں ملکاں ایران مخالفاں کشگءِ باروا اِنت۔

انگریزی سیاھگ وال اسٹریٹ جرنلءِ منّتا