پاکستانی چاریگ مارا انگت بمب اڈ کنگ سوج دیگا اَنت: طالبان

پاکستانءِ دو روئی

طالبانءِ درمیانی درجہءِ کماندارانی ردا پاکستانی چاریگ انگت آوان بمب اڈ کنگ سوج دیگا اَنت۔ آوانی ردا پاکستان دروغ بندگا اِنت کہ کشیت آ طالباں کمک کنگا نہ اَنت۔ ھمے ردا ملا عزیز اللہ نامین طالب کماندارےءَ گوں بی بی سی گشت ”پھک آئی اس آئیءِ مردم اَنت کہ تربیت جاہ اش پچ کتگ اَنت۔ اولا مارا بمب اڈ کنگ سوج دی اَنت، پدا مارا راھشونی کن اَنت۔ آوانی فوجی جنرل ھر جاگہ موجود اَنت۔ تربیت دیگءِ وھدا ھم ھمودا اَنت۔“

جونءَ ماں کابل یک ایمنیں لوگےءَ آئیا دیمترا درّائینت ”طالبان آئی اس آئیءِ کمکا جوڑ کنگ بیتگ۔ ھر کس وتی رستگیں نِھالا گوَج کِش کنت و آپ ئی دات۔“

چیریں پاکستان سرحالا جوڑ کنگ بیتگیں بی بی سیءِ مراگش بی بی سی 2ءَ مرچی پیشدارگ بیگی اِنت۔ ایشیءِ تھا یک ملا قاسم نامیں مردے گشگا اِنت ”پہ یک جنگولےءَ دو چیز ھژدری اَنت؛ یکے سلاح رسگ و دومی چیر بیگءِ جاگہ۔ اے پڑا پاکستانءَ شاباش بات۔ اولا مارا چیر ٹپّگءِ جاگہ دات کہ پا ما باز ھژدری اِنت و دومی مارا سلاح دیگا اِنت۔“

سال 1995 تانکہ 2006ءَ پہ امریکاءِ دفاعی چاریگاں کار کنوکیں لیفٹننٹ کرنل ٹونی شفرءِ ردا وھدے 2004ءَ وانا دمگا آواں القایدہءِ ایمن الظواھریءِ سرا بیڑ برتگ ات، گڈا آئی اس آئیءِ مردماں آئی شہ اودا تاچینت۔

”آئی اس آئی باید بہ منّیت کہ لھتے شہ ھما تربیت جاھاں کہ 7/7 ءَ بیڑ بروکیں ٹرورسٹ تربیت دیگ بیتگ انت، انگت پاچ اَنت“ برطانیاءِ کرنل رچرڈ کمپءَ گشت۔

پاکستانی دستمانجیانی دوارچاریءِ ذمواریں سی آئی اےءِ پیسری افسر بروس ریدلءَ گشت ”من صدر (باراک اوباما)ءَ گشتگ کہ پاکستان دو دیمی آدینکے اِنت و سالاں سال اِنت دو روئی کنگا بیتگ۔ ھمے کارا آ دیمترا ھم کنت۔“ ٹیلی گراف