جمھوری آذربائیجانءَ حجابءِ لوٹوکیں ملا جیلا راھی کت اَنت

ایرانی سرکاری حالرسان ۔ارناءِ داتگیں حالےءِ ردا آذر بائیجانءِ مدرسواں حجابءِ سرا بندش جنگءِ قانونءِ خلافا لانکارتگیں ملایے باکوءِ کورٹےءَ سہ شنبہءِ روچا سزا داتگ۔ اے مذھبیءَ سزا دیگا رند ھمے سببا جیل کنگ بیتگیں مردمانی حساب 35 کساں رستگ۔

پریس نیوزءِ ردا جمھوری آذربائیجانءِ تعلیمءِ وزیرا دسمبر 2010ءَ ماں ملکءِ اسکولاں سریگ سرا کنگ مھن کتگ۔ ھماتانی مذھبی مردم اے بندشءِ خلافا جاک و سلوات کنگا اَنت۔

آذربائیجانءِ نزیک 9 میلیون مردمانی 98٪ شیعہ مسلمان اَنت۔ اودءِ سرکار سکیولر بارورانی واھندیں مردمانی دستا اِنت، البت ایران سرکار یکّوئی جھدا اِنت کہ اودءِ مردماں گوں وت بہ ترّینیت و ملکءِ تھا ایرانءِ وڑیں مذھبی سرکارے جوڑ بہ کنت۔

ایران ترسگا اِنت کہ اگر اودا قومپرست و سکیولر خیالانی مردمانی پاد مھر بوت اَنت، گڈا ایرانءِ دستءِ چیرءِ آذربائیجانءِ آزادی لوٹوکیں جنزا آ کمک کن اَنت۔