ڈیرہ بگٹیءَ 9 بلوچ کشگ بوت اَنت



سلاحبندیں بلوچ



ڈیرہ بگٹیءَ دو ٹولینانی نیاما بیتگیں دو دیمی جنگےءَ 9 بلوچ کشگ بوت اَنت۔ اے جنگ بلوچ رپبلکن آرمیءِ سرمچار و سرکارءِ پلانگری زیروکیں امن ٹولیےءَ نیاما بیتگ۔ مرتگینانی نیاما امن ٹولیءِ یک کماندارے ھوار اِنت۔

دی نیشنءَ باری بلوچءِ شنگ کتگیں حالےءِ ردا ڈیرہ بگٹی پٹ فیڈر ھندا سرکارءِ پلانگری زیروکیں امن کافلہءِ سرا بلوچ رپبلکن آرمیءِ سرمچاراں گوں خودکار سلاحاں بیڑ برتگ۔ اے بیڑا امن ٹولیءِ چار مردم کشگ بیتگ اَنت۔ حالءِ ردا بی آر پیءِ پنچ کس ھم دو دیمی جنگا جَنَگ بیتگ اَنت۔  

امن ٹولیءِ مرتگیں کماندارءِ نام نبی داد پدنام بائی خان ظاھر کنگ بیتگ۔ ایشانی کُشگ بیتگیں آدگہ مردمانی نام لطیف بگٹی، صادق بگٹی و ولی محمد نبیسگ بیتگ اَنت۔ ٹپییں ھفت مردم پہ دوا درمانا ھندی نادراھجاھا سر کنگ بیتگ اَنت۔

داتگیں حالا جنگ بیتگیں سرمچارانی نام نہ داتگ اَنت۔ بلوچ رپبلکن پارٹیءِ سرباز بلوچءَ برتگیں بیڑ وتی گلءِ ذموا زرتگ۔ سرباز بلوچءَ وتی مردمےءِ جنگ بیگ ظاھر نہ کتگ۔ تانکہ سرکاری واکاں ھم اے ردا حالے نداتگ۔