بی این پی عوامیءِ پارلیمانی لیڈر و صوبائی وزیرصنعت و حرفت سید احسان شاہءَ پارٹی کارگسا ورکرانی مچّیءِ دیما تران کناں گشتگ کہ کیچءَ ھوار بلوچستانءِ تھا دیمرویءِ بازیں کار بیتگ و دگہ بازیں دمگاں دیمروی نوکیں اسکیم بندات بی اَنت۔
آئیا سوج دات کہ چاگردی جھدکار و پارٹیءِ باسکانی ذمواری انت کہ دیمروی کارانی سرجم کنگءِ نیمگا دلگوش گوَر بہ کن انت۔ پارٹیءِ ھمک باسک گوں وتی دمگءِ مردماں نزیکی بہ کنت و چہ دمگی جیڑواں مارا پوہ بہ کنت۔
گوں احسان شاہ اے ساھتا بی این پی عوامیءِ بنجاھی جوائنٹ سیکریٹری مرادجان گچکی، بنجاھی کمیٹیءِ باسک خلیل احمد کٹ ور، کیچءِ راھشون خان محمد جان گچکی، انسپکٹر شاکرشاد و پارٹیءِ باسک، و دگہ چاگردی ڈلاں گند نند کتگ۔ آواں وتی وتی دمگءِ جیڑہ و مشکلانی باروا صوبائی وزیرسرپدی داتگ۔
صوبائی وزیراحسان شاہءَ گشتگ کہ پہ بلوچستانءِ سیاسی جیڑہءِ گیشینگا کُلاں چہ پیش آوارجتگیں بلوچ پدرکنگ و آمیدگسءَ پیش کنگ بہ بی انت، و بلوچستانءِ سیاسی جاور جوان کنگ بہ بی اَنت، تاکہ بلوچستانءِ سیاسی جیڑہءِ گیشنگا گپءِ ماحولے جوڑ بہ بیت۔
سید احسان شاہءَ گورنمنٹ بوائزماڈل ھائی اسکول تربتءِ تر تاب ھم کتگ۔ گوستگیں صوبائی وزیر غفوراحمد بزنجو، ڈائریکٹرایجوکیشن مکران یارمحمد بلوچ و اسپورٹس آفیسر بالاچ گورگیج آئیءِ ھمراہ بیتگ انت۔
آئیا وانگ جاہءِ ھائی و پرائمری سیکشن چارتگ اَنت۔ کلاسانی تھا شتگ و استادانی واننیگءِ وڑ چارتگ اَنت۔ وانگ جاہءِ پرنسپل احمد علی بلوچءَ صوبائی وزیرءَ وانگجاہءِ جنجالانی باروا سرپدی داتگ۔
آئیا گشتگ کہ ماڈل ھائی اسکولءِ ھائی و پرائمری سیکشنءِ ماڑی باز کوھنیں ماڑی اَنت۔ اے وانگجاھا چہ سید احسان شاہءَ بہ گر ھمک وزیر ءُ سنیٹرا وانگ در برتگ، بلہ پدا ھم ضلع کیچءِ رول ماڈل اسکولءِ ماڑی پروشت پرؤش و دگہ بازیں جیڑوانی آماچ اِنت۔ باید ات ھمک وزیر و سنیٹر دلگوش ئی گور بہ کنت۔
ماڈل اسکولءِ کش گورءِ زمین ھم خطرءِ تھا انت کہ لینڈ مافیا قبضہ ئی مہ کنت۔ پمیشا اسکولءِ چکاسی حال چاردیواری تھا کنگ لوٹیت۔
صوبائی وزیرسید احسان شاہءَ پرنسپل و ٹیچنگ اسٹاف دلجمی داتگ اَنت کہ جیڑہ گیشنگ بی اَنت۔ آئیا ماڈل اسکولءِ نودربرانی مطالعاتی دورءِ درگتا یک لک کلدار دیگءِ جارجتگ۔
ھمے درگتا صوبائی وزیرسید احسان شاہ و غفوراحمد بزنجوءَ نودربراں گشتگ ”ھنوں شمئے وانگ و زانگءِ وھد انت بی این پی عوامیءَ ھوار پہ ھچ پارٹیءَ بیرک دستا مہ کن اِت و نعرہ مہ جن اِت؛ ایوکا وتی وانگءِ سرا دلگوش بہ دی ات۔“ وش نیوز
هیچ نظری موجود نیست:
ارسال یک نظر
وتی کلوا چێرا نبیس إت