شھید اعظم نواب اکبر شھباز بگٹیءِ بچ جمیل اکبر بگٹیءَ پاکستانی سیاستکار مشاھد حسینءِ اے گپءِ سرا ترندیا ایراد گپت کہ نواب بگٹی و آوانی نیاما قرار بندیے بیتگ۔ پدا گیش ئی کت کہ مرچی فوجی و سیاسی واکداراں میاریگ کنوکاں زی اخلاقی جرات پیش نہ داشتگ۔ پمیشا آوانی بیان بے بزانت اَنت۔ مشاھد حسینءَ بیان داتگ ات کہ گوں نواب اکبر بگٹی گپ تراناں پد قرارے بندگ بیتگ، بلہ آ وھدءِ سیاسی و فوجی واکاں ایشیا رواج دیگءِ دیم داشتگ۔
جمیل بگٹیءَ گشتگ کہ مشاھد حسینءِ اے گپ رد اِنت۔ ” مئے کماشا گوں مشاھد حسین وچوھدری شجاعتءَ ھچ قرار نہ بستگ۔ پرچا کہ ڈیرہ بگٹیءَ اے مردمانی آیگءِ درگتا منی کماشءِ اولی جست چہ ایشاں ھمے بیتگ کہ آوانی گورا داں چے کچا مینڈیٹ ھست۔ ایشیا پد کلاکانی کلاک گوں جی ایچ کیوءَ گپ اش جتگ و گشتگ اش کہ پدا کا اَنت۔ منی کماشا گشتگ اَنت کہ وتی و آئیءِ وھدا زوال مہ کن اَنت۔
جمیل اکبر بگٹیءَ گیش کتگ ”داں ھما وھدا کہ مشرفءَ وتی پوست بزاں فوجی پوشاک در نہ کرتہ بیتگ، مشاھد حسین و آئیءِ پارٹیءَ اے گپا کنگءِ اخلاقی جرات نہ کتگ۔ اگر جرات اش کتین ات، گڈا ڈیرہ بگٹیءَ آیگءِ وھدا منی کماش اش سرپد کتگ کہ اسٹبلشمنٹ و فوجی واکدار صحل کنگا واھوک نہ بیتگ اَنت۔
”اے رنگیں دوپوستی ایم کیوایمءَ ھم پیش داشتگ ات و ڈیرہ بگٹیءَ آپریشءِ درگتا استعفا دیگءِ جار ئی جتگ ات۔ البت، مارا شہ ایم کیوایم یا فوجیانی کُٹا نشتگیں دگہ واکاں ھچ رنگیں امید نہ بیتگ، نے کہ ھچبر بیت۔“
یک جستےءِ پسوا جمیل بگٹیءَ درّائینت ”مشرفءِ دَورا پرگنگی و اسلام آباد سرکارءِ منگ و تپاکیا بلوچستانءَ فوج کَشی بیتگ۔ پمیشا آ سرکارا ھواریں کس وتا بے میار لیک اِت نہ کنت۔ آ وھدییں سروزیر شوکت عزیزءَ وا کورٹا پاشک کتگ کہ فوجی افسراں آئی کاربستگ۔ و اگر جام یوسف منی کماشءِ سرا بیتگیں فوج کشیءِ باروا رازے پاشْک کنگا دلمانگ اِنت، گڈا آ کجام باریگءِ ودارا اِنت؟ آئیءِ میار پھل کنگی وا نہ اَنت، بلہ اگر سرپد بیت کہ چَہ آئیءِ راستیاں گناھانی بار ئی سبک تر بیت کنت، گڈا باید دیر مہ کنت۔“
دلگوش: حال چہ بام ھالءَ زرتگ و نبیسگءِ راھبند ٹگلینتگ۔
هیچ نظری موجود نیست:
ارسال یک نظر
وتی کلوا چێرا نبیس إت