بی ان پی ۔عوامیءِ راھشون احسان شاہءَ پہ دیمروی کاراں مالی کمکءِ جار جت

 بلوچستان ءِ صوبائی وزیرصنعت وحرفت و بی این پی عوامیءِ پارلیمانی لیڈر سیداحسان شاہءَ تربتءِ ھند آپسرءَ پارٹی باسکانی لوگا شتگ۔ اودا مردم پرس کتگ اَنت و حال احوال کتگ۔ آپسرءَ ماسٹر حاجی عبدالکریم، دھقان داد محمد، حاجی لعل بخش و کھدہ لیاقت علیءِ لوگاں شتگ۔

پدا آپسرءِ دمگ کولواہءَ سراج علیءِ بیران بیگ سئمی روچءِ پرسی پترا فاتحہ واتگ۔ اے درگتا بی این پی عوامیءِ بنجاھی راھشون غفوراحمد بزنجو، خلیل کٹور، مراد جان گچکی، نزیر آصف، فیصل درجان و دگہ ھمراہ بیتگ اَنت۔

چاہ سرءَ تر تابءِ وھدا لالہ نوربخش و ماسٹر طارق علیءَ احسان شاہ وش آتک کتگ، و وتی دمگءِ پدمنتگیانی باروا سرپدی داتگ۔ سید احسان شاہءَ گشتگ ”چاہ سر منی وتی میتگ انت، پہ ایشیءِ دیمرویا باز جھد کناں“۔

اے درگتا آئیا پہ کلکشان گلءَ 50 ھزارکلدار، پہ مدرسہ دارالسلام چاہ سرءَ 5 لک کلدار، پہ 3 لیبی ٹیماں 15،15 ھزار، جنوبی چاہ سرءِ واٹر سپلائی، کوشقلات تانکہ چاہ سرءِ دگءِ کازوے آنی آڑکنگ و سیوریج سسٹم جوڑکنگءِ جارجتگ اَنت۔ چاھسرءِ لنک روڈءِ جوڑکنگ و دگہ دیمروی کارانی سرا 10 لک کلدار خرچ کنگءِ جار ئی ھم جتگ۔ وش نیوز