نشنل پارٹیءَ بی ال اف میاریگ کنگا اِنت کہ آزادی لوٹوکاں حمایت کنت! چمشانک: ولید گربنی

دشمنانی پندلاں بلوچ قوم یک بیگا نہ اِشتگ۔ 21می قرنا ھم بلوچستانءِ لھتے دمگاں تَھی جمھوری رواج نہ گواھیت و سردارانی زوراکی بلوچ مردمانی سرا برجاہ اَنت۔ آ ھنداں بلوچانی بنی حق کہ ووٹ اِنت ھم پچگرگ بیتگ و وتی پسندا بلوچاں ھچبر ووٹ دات نہ کتگ۔ مدام سردار و سردارانی گچین کتگیں مردم ذمواریانی سرا نندارینگ بیتگ اَنت و ھنچنائیں مردمانی سرا زوراکی اش برجاہ داشتگ۔ سردارانی دستانی چیرءِ ٹک انگت شہ وتی بازیں بنداتی حقاں زبھر اَنت۔ لھتے کس جنڈے نانا ھم چمدار اَنت۔ البت، بلوچستانءِ دمگ مکرانءَ جاور کمے گستا اَنت۔ اودا لبرال دموکراسیءِ ردومءِ برکتا مردماں لھتے بنی آزادی رستگ اَنت۔ اے بنی آزادیانی نیاما یکّے ایش اِنت کہ وتی پسندءِ مردما ووٹ دیگءِ حق اش رستگ۔ اے شاھدی گوَستگیں 22 سالاں بیوکیں گچینکاریانی چارگا رند الکاپیا سھرا بیت اِنت۔

گوں پنچمی سلاحبندیں جنگءِ بندات بیگا و میر خیربیار و میر براھمدغءِ دروشما نوکیں راھدربرانی سرکشّگءِ برکتا بلوچستانءِ مری و بگٹی ھنداں نوکیں مارشتےءَ ردوم زُرتگ۔ اے مارشت پہ بلوچستانءِ ھما وھدی جوانیے آرت کنت کہ اے راھشون وتی جھدا سوبین بہ بی اَنت۔ سوبینی ھنچوشیں چیزے اِنت کہ وھدءِ غلام اِنت۔ پدا ھم ھزارانی حسابا جاناں ندْر کنوکیں بلوچ جھدکارانی خونءِ بروردا وھد دیما تھلانک داتگ۔ بے سوبیءِ دروشما ھم یک بنی بدلیے المّا کئیت۔ پرچاکہ وھدے خیربیار و براھمدغ وت سرداری لوٹوک نہ اَنت، گڈا آوانی جاگھا دگہ کسےءِ سوبین بیگءِ امید کوردیم اَنت۔ مری و بگٹی ھنداں گوں ایمنیءِ آیگا پہ جھلی مردماں راہ المّا پاچ بیت اِنت و اودا لبرال خیالانی مردم وتی پدمنتگیں استمانءِ بھتا پاد کت کن اَنت۔ شرط ایش اِنت کہ براھمدغ و خیربیارءِ ھوارکاری اش گون بہ بیت۔ اے حسابا وھد دیر نہ اِنت کہ بلوچستانءَ لبرالزمءِ پڑ پراہ روت و قومءِ گوَم راست تر بیت اِنت۔

آزاد بلوچستانءِ جھد بندات بیتگ۔ ایشی دیما روان اِنت۔ بیت کنت کہ گوں سائنسی پروگرامانی دیما آیگا درؤشم ئی بدل بہ بیت۔ پرچا کہ اگر جھدا گوں میانملکی قانوناں ھمرد کنگءِ توجیل کہ آئیءِ قول میر خیربیارءَ وتی گڈی گشتانکا داتگ، عملی کنگ بہ بیت، گڈا میانملکی ضرورتاں پیلو کنگ ھم ضروری بیت اِنت۔ چدا ساری بیتگیں آزادی لوٹوکانی لھتے کاراں میانملکی ضرورت پیلو نہ کتگ اَنت۔ ھمے نزوری پہ لیڈراں یکّوئی جیڑہ پاد کنگا اَنت۔ پہ مثال ھمے دیوانا کہ میر خیربیارءَ پہ جھدا آئین و منشور جوڑ کنگءِ جار جت، مردماں شہ آئیا چاریگ ناما بے میاریں بلوچانی کوشءِ باروا جست کت۔ و خیربیار مریءِ گورا پہ پسّوا منّینوکیں گپے نیست اَنت۔ ایشی ثابت کنت کہ خیربیار مریءَ انگت اے پڑا الکاپیا مطالعہ نہ کتگ۔ اگر بہ کتین ئی، گڈا آئیا دیری جھدکار سوج داتگ اتنت کہ بلوچستانءِ ھر دمگءِ وتی سیاسی ضرورت اَنت کہ پیلو کنگ بہ بی اَنت۔ ھمے ضرورتا پیلو کنگءِ گپ شھید اعظم نواب اکبر شھباز بگٹیءَ وتی گڈی گشتانکا گیشینتگ ات۔

گوں بلوچ نشنل لبریشن فرنٹءِ جوڑ بیگ و آوانی نیمگا چاگردی جارواں الکاپیا شون دیگا پد مردم امیدوار بیت کنت کہ مکرانءَ آزادی لوٹوکانی گیگ گوَم تربیت اِنت۔ اے برکتا سِتْک دلیں سلاحبندیں جھدکاراں لایقیں گلےءِ پلاٹفورم گوں سرپدیں راھدربراں رسیت۔ و ایشاں دمگءِ سیاسی واکانی پلانگری ھم گون بیت اِنت۔ ایشیءِ شاھدی ماسٹر عبدالستار نوکتریں گالگدارےءَ دیگ بیتگ کہ نشنل پارٹی آواں حمایت کنگا اِنت۔ نشنل پارٹی ھما پارٹی اِنت کہ بلوچ نشنل موومنٹ، بی اس او آزاد و بلوچ لبریشن فرنٹءَ مدام ڈوبارتگ کہ آزادیءِ جنزءِ خلافا اِنت و ایشانی جھدکارانی خلافا چاریگی کن اَنت۔ ھمے بھتاما نام گپتگیں ٹولیاں نشنل پارٹیءِ گچینی جھدکار؛ مولابخش دشتی، محمد حسین، نسیم جنگیان و داکٹر لال بکشءَ ھوار دگہ بازیں کس کوشارینتگ اَنت۔ نیں ھمے نشنل پارٹیءِ سرا میار لڈگا اَنت کہ بلوچ نشنل لبریشن فرنٹءَ حمایت کنت۔ اے وڑا بلوچ لبریشن فرنٹ وت دلیل دیگا اِنت کہ نشنل پارٹی آزادی لوٹوکانی خلافا نہ اِنت۔ گندگا ھمے راستی میر براھمدغ بگٹیءَ ھم مارتگ، و ھما روچا کہ میر خیربیارءَ مار اِت، گڈا آزادیءِ جھد وتی سوبینیا نزیکتر بیت اِنت۔