یومین رائٹس کونسل پاکستانءِ تربت تکا دیوانے برجم داشت

انسانی حقانی پانکجنیں پاکستانی گلءِ بلوچستان شاھڑءِ ماھی دیوان ماں تربت گلءِ کارگسا ڈویژنل کوآرڈینٹرغنی پروازءِ پاگواجھیا برجم دارگ بیتگ۔ دیوانءِ تھا دمگءِ ندکار شگراللہ یوسف، کمال ایوب، مھنازغنی، مھراللہ گچکی، گل بانوغنی، روزینہ بلوچ، اسداللہ بلوچ، عقیلہ بلوچ، ڈاکٹرخدابخش قومی، صائمہ بلوچ و دگہ جنین و مردین ھوار بیتگ اَنت۔

دیوانءِ تھا شھری و سیاسی حقانی سرا گپ بیتگ۔ مکرانءَ ھوارسرجمیں بلوچستانءَ بلوچ شھریانی غیرقانونی و پہ زور آوارجنگ، پدا آوارجتگیں بلوچانی کوش و لاشانی چگل دیگ گوں ترندیں گالاں ایرجنگ بیتگ اَنت۔

دیوانا دشت تولگیءَ 27 اکتوبر2011ءِ شپا الاھی بخش و حمیدہءَ کشگءِ کارکرد ایرجتگ و گشتگ اگر آوانی ردی کتہ بیتگ، گڈا قانوںءِ ردا آ پولیسءِ دستا دیگ و آمیدگسءَ پیش کنگ بیتین اِتنت۔ دیوانا شہ سرکارا لوٹ کتگ کہ کشندہ دستگیرکنگ بہ بی اَنت۔

دیوانا فیصلہ کنگ بیتگ کہ بنی آدمی حقانی میان استمانی روچءِ درگتا 10 دسمبر 2011 ءَ تربتءَ یک مراگشے برجم دارگ بیت۔ وش نیوز