پاکستانءِ دستا جاوید رند و دگہ بندیگانی کشگا یورپی اتحاد پٹاسکاری بہ کنت: یورپی پارلمنٹءِ باسک

جاوید رند ۔بام ھال فوٹو

یورپی یونینءِ پارلمنٹءِ پولنڈی باسک یژارْد چْزارنکیءَ جاوید رند و دگہ کشگ و تلپیں پڑاں دور داتگیں بلوچانی سرا دلپدردی درشان کت و پاکستان ایر جت۔ آییا گشت کہ پاکستان گشیت کہ بندیگیں مردمانی حساب کم ترّ تگ۔ بندیگانی کم تر بیگءِ سبب ھمیش اِنت کہ آوانی نیاما بازیں کس کشگ بیتگ اَنت۔

شہ جون 2010ءَ دیم پہ انگو گاریں بلوچانی 230 کساں گیشءِ لاش شہ بلوچستانءِ تلپیں جاگھاں مردماں رستگ اَنت۔ بلوچستان یونین آف جرنلسٹسءِ ردا ایشانی نیاما 10 حالکار اَنت کہ امبری کشگ بیتگ اَنت۔

واجہ چزارنکیءَ خاص جاوید رندءِ نام گپت کہ نام ئی ھمے ھنیگاں آدگہ کشگ بیتگیں حالکارانی لڑا ھوار کنگ بیتگ۔ آییا گشت ”جاوید رند کسانسالیں حالکرے بیتگ کہ آییءِ ٹپ ٹور و تیر آماچیں لاش شہ خضدار دستا کپتگ۔ آیی قومپرستیں روچتاک توارءِ چیردستیں شونکار بیتگ۔“

چزارنکیءَ شہ پاکستانءِ سرکارا لوٹ کت کہ اے کؤشانی باروا پٹاسکاری بہ کنت، و شہ یورپی اتحادءَ لوٹ ئی کت کہ یورپی یونینءِ پٹاسکاری ٹولیے پہ گارینءِ مردمانی جیڑہءِ سرا شوھازکاریا بلوچستانءَ دیم بہ دات۔ نیوز نٹورک انڈیا