ایرانءَ انٹرنٹ کارمز کنوکانی آزادیا دارگءِ پڑا نوکیں راھبندے رواج داتگ۔ ایشیءِ ردا سرجمیں انٹرنٹ کیفے حکم دیگ بیتگ اَنت کہ کیفے آنی تھا کیمرہ بہ جن اَنت و آیوکیں سرجمیں مردمانی نام و ڈس نشاناں ثبت بہ کن اَنت۔
تانگہ ایرانءَ انٹرنٹ کیفے آں آیوکیں گیشتر مردم جوان بیتگ اَنت۔ ایشیءِ مزنتریں سبب ھمیش بیتگ کہ لوگی انٹرنٹءَ مردم ایمن نہ لیک اَنت۔
شہ ایرانءَ رستگیں حالانی ردا ھمے ھفتگا بند بیتگیں ویبجاھانی حساب گیش بیتگ۔ سوشل نٹ ورکاں روگا لھتے بندش اَنت و انٹرنٹ سست تر کنگ بیتگ۔
نوکیں بندشانی رواج دیگءِ درگتا ایرانءَ وتی حلال انٹرنٹءَ چکّاسگ بنا کتگ۔ ایشیا رواج دیگءِ مقصد وتی مردماں شہ غیر اسلامی دود و دروشماں رکّینگ و اسلامی رسماں رواج دیگ اِنت۔ چکّاسگا رند آیوکیں لھتے ھفتگاں حلال انٹرنٹءِ کارمرزیا بنا کنگ ارادہ بیتگ۔
شہ 2009ءِ گچینکاریا رند بیتگیں سیاسی جیڑوانی حالانی تالاں بیگا رند انٹرنٹ ملکءِ واکانی گُٹا توقے بیتگ۔ انٹرنٹءِ راھا مزنیں مِیڑی یکجاہ کنگ بیتگ اِتنت و لٹ کٹانی حال، و ندارگ دنیاءَ شنگ کنگ بیتگ اتنت۔
دنیاءِ دگہ ملکانی نیاما قذافیءِ دورا لیبیاءَ انٹرنٹ کامرز کنوکانی سرا گر بند بیتگ۔ چین و کیوباءَ انگت انٹرنٹ کیفے آں روگا مردما وتی پجارءِ ثبوت پیش دارگ لوٹیت۔
ایرانءِ مذھبی شھر قمءَ جاھمنندیں احمد نجیمی نامیں ملایےءَ وتی بلاگءِ تھا گوستگیں ھفتگا گشتگ کہ سرکارا Cyber Army جوڑ کتگ۔ ایشیءِ مردماں کلاکے 7 ڈالر رسگا اِنت کہ ویبجاھانی تھا ایرانءِ شریاں بہ نبیس اَنت و مخالفانی سلّیاں پاشک بہ کن اَنت۔
اسلامی پاسدارانی کماندار حسین ھمدانیءَ اکتوبر ماھا گشتگ ات کہ 2000 Blogger کارا دارگ بیتگ اَنت و سایبر فوجیءِ حسابا ھیلکاری دیگ بیتگ اَنت۔ ”ایرانءِ خلافا نرمیں جنگے بیگا اِنت۔ ایشیءِ دیما دارگا مئے مردماں ھم آسراتی پکار اَنت“ فارس نیوزءِ ردا حسن ھمدانیءَ گشتگ۔ وال اسٹریٹ جنرال
هیچ نظری موجود نیست:
ارسال یک نظر
وتی کلوا چێرا نبیس إت