ایرانء تھا بلوچ مھلوکء لگتمالی؛ امنسٹی انٹرنشنل ۔ سیمی بھر

جون 2007 ء ترندیں شرتگاں ماں صوبھا بازیں ھنداں سیلاب آرتگ و لؤگ و جاگھ تباہ کتگنت، کم چھ کم 23 مردم کشتگنت و سلـّیھں آپ و لؤگ نھ بیگء سوبا ھزارانء حسابا مردم گؤں نادراھیاں دیم پھ دیم کتگنت۔ لھتے بلوچان انتظامیھء گؤرا شکایت کتگ کھ سرکارا تباھکاریانء ردا کمک نھ رسینتگ۔ پاسداراں ھم تنا وھدی کھ یک سنی ملاھیا جمعھ خطابا آ کچّھ چتگنت؛ کمک نھ کتگ۔ یک دگھ عیسا امیری نامیں سنی ملاھےء جمعھء خطابء گپ شنگ بیتگنت و گشتگی؛

گرانقدرین گورنر جنرل گشگا انت کھ ھچ نھ بیتگ، راستیا قدرتی تباھکاری و یک بحرانے پیش آتکگ و اشیا یک اقلیتےء انسان گؤں مشکلاں دیم پھ دیم کتگنت۔ آیا 25 مردمانء مرگ، صدء تھا 80 دلوتانء تاوان بیگ و صدء تھا 9.5 کشت و کشاری زمینانء خراب بیگ ھچ نھ انت؟ چے سوبنت کھ ملکء و ھندی ٹلوژن اے ردا ھچ حال شنگ نھ کنگا انت؟ اگر تئی ھلی کاپٹر بال کت نھ کنگا ات پھ چیا تو مردمان پٹرول نھ دات تا آ وتی کشتیانء سرا پھ مھلوکا چھ وتی نیئمگا کمک بھ رسیننت؟

ایرانء آئین و انسانی حقانء بازیں میاں استمانی قراربند کھ ایران وت ھم سائن کتگنت ۔۔ اشاں تؤکا شھروندی و سیاس حقانء میاں استمانی قرار بند، چکانء پانجنیں قرار بند و تمامیں نسلی فرق گزاری گار کنگء قراربند ھؤرنت۔۔ اے پھک ھرڈؤلیں نسلی فرق گزاریا مھن کنگا انت۔ پدا ھم بلوچ گشگا انت کھ پھلوی دھر بیتگ یا چھ 1979 دیم پھ انگو سرکاریں ھنـیگیں رژیم آھانء خلافا گؤں پندل فرق گزاری بیان و پیداگنت۔

بلوچ و دگھ اقلیتانء خلافا فرق گزاریء یک راھے 'گزینش'ء ناما انت۔ اے گچین کنگء یک نظریاتی رھبندے انت کھ اشیء ردا سرکاری مردم دگھ چیزانء کشا گؤں اسلام و اسلامی جمھوریھ ایران وفاداریء سوگند دیگ بنتنت، اشانء تھا 'ولایت فقیھ'ء راہ ھؤرنت کھ اسلامی جمھوریھ ایرانء سیاسی بنھشتنت۔ اے قانون و عملء پڑا وت سرا وت برابری، سیاسی دید، پیسری سیاسی ھمبندی یا کمک یا مذھبی نزیکی کنؤکاں چکپرؤش کنت۔ سرکاری و سرکارء دستء چیئرء جاھاں و تا حدّے پرائیوٹ منٹیا کارکنگء واھگداراں برابر چارگء راہ شنکنت۔ دیمتری وانگجاں زیرگ بیگء شرط گؤں 'گزینش' ھمگرنچنت۔ گزینشء رھبندء ردا اگر کسے شیعھ مھ بیتنت آ لھتے سرکاری اگدھاں چؤکھ صدربیت نھ کننت۔ سال 1997 ملا علی اکبر ملازھی نامیں بلوچ عالمیا سیستان و بلوچستان ڈؤلیں بلوچ اکثریتی ھنداں گزینشء کارپدانء باروا گشتگ؛

اگر یک بلوچے دکانے پچ کنگ بلؤٹیت گڑا آ پیسرا سرکارء گؤرا برؤت و وتی سیاسی باوراں پاسدار و چاریگی بنجاھانء دیما پدّرا بھ کنتنت۔ اؤدا آ جست کنگ بنت: تو پھ جمھوری اسلامی چے کتگ؟ بارین تو عراق- ایران جنگا بھر زرتگ؟ ولات فقیھ سرا ترا باور ھستنت؟ سنیاں ویلایت فقیھ سرا ھچ ڈؤلیں باور نیستنت۔ اے مئے ایمانء خلافا انت، چؤ کھ ما 'تقیھ' سرا کھ مئے خیالا دروغبندی انت باور نھ کننت مجبورنت راست بگشنت۔ بروردی اشنت کھ سنیاں دکان پچ کنگء اجازت نھ رسیت، آھاں کار دیگ نھ بیتنت، آ زانتجاھا زیرگ نھ بنتنت –بید چھ اش کھ آ پھ چاریگاں کار بکننت۔ زاھدانء تھا بلوچستان زانتجاھا چھ 5،000 وانؤکاں بس 10 تا 15 کس بلوچنت۔ توریں بلّي جمھوری اسلامیء وتی قانون گشیت کھ ادا صدء تھا 75 بلوچ بھ بنتنت- و نیں صدا 99 بلوچ نھ انت۔ آ مارا چؤ کھ ھندوستان 'اچوتاں' چارگا انت۔

آ ئي دریں مردماں آرگ و جاھمنند کنائینگء سرکاری رھبندانء ھم شکایت کتگ و گشتگ کھ واھگ بلوچاں ماں وتی ھنداں کم ترّینگنت۔

مئے پاسپورٹ ایرانی انت و ما ایران انت، چمشکا ما وتی حقاں ایرانیانء ڈؤلا لؤٹؤکنت۔ ما بلوچستانء تھا وتی حقانا لؤٹنت۔ ما کار کنگا مھن مھ بنت، مئے وتی مردم پولیسء تھا ببنت۔ ما نھ لؤٹنت کھ آ چھ تھران گؤں ما دشمنی کنؤکیں پولیس بیارنت و مئے سرجمیں انتظامیھء واھند آ بھ ببنت۔ سرجمیں رؤزگاراں وتی مردماں بھ دی انت۔ آئینء ردا اگر کسے شیعھ نھ انت آ وزیر ھم بیت نھ کنت۔ اگر آ کارگاھے اڈ بھ کننت کاراں وتی سیاد و مردمانا دی انت۔ آ صداں ھزار وتی مردماں آرگا انت تا بلوچستان و کردستانء تھا آ گئشتر بھ بنتنت۔ آ بلوچاں در نھ کنگا انت، بلے گؤں وتی فرق گزاری عملاں تھلانکش دیگا انت۔ ھنّي 200،000 بلوچ گلف ملکاں کارا انت چیاکھ ادا آھاں کار گپت نھ کتگ۔

دلگؤش؛ اچوت بزاں دست پر کنگ مھ بنت، ماں ھندوستاں یک کپتگیں ٹکــّے انت۔ اگر کسے اشاں دست پر بکنت گڑا آئیء دستء ورگاں عام مردم نھ ورنت تنا وھدی کھ آ وتی جانا مھ شؤدیتنت۔

جاری انت ۔ ۔۔ ۔