ایرانءِ دستءِ چيئرءِ بلوچستانءِ اوارین ھندان ھورءِ تباھکاریان بازین مردم وتی آماچ کتگ انت۔ ایرانءِ حالجاھان شنگ بیتگین حالانءِ لھتے بھر چيئرا دیگ بیگا انت۔چاہ بھار: کاجو کورءِ ھارءَ گلاب جدگال نامین 22 سالگین نوجوانے گون وتی موٹر سائيکلءَ گوزگءِ جھدا برتگ۔
نیکشھر: کیشک وکاجو کورءِ لھڑین ھارانءِ سوبا دیم پہ قصرقندءِ راہ بند انت۔ ھمے ڈولا گنگ و ملورانءِ کورءِ ھارءَ بنت و فنوچءِ راہ دیم پہ نیکشھر بند کتگ انت۔ نیکشھر، اسپکہ و لاشارءِ راہ ھم ھار و کوھےءِ لمبگءِ سوبا خراب بیتگ۔
چہ نیکشھر دیم پہ چاہ بھارءِ راہ ءِ 45 کلومیٹری ٹکرے ھم تاوان بیتگ۔ چہ اشیءِ سوبا ھچ ڈولین راھے چہ نیکشھر دیم پہ چاہ بھار پشت نہ کپتگ و رو آ بند انت۔
پھرہ: نزیک 24 میتگانءِ مردم ھورانءِ سوبا بے لوگ بیتگ انت۔ بمپورءِ کش گورا آپ آیگءِ سوبا بازین ھند آپءَ چيئرترّينتگ انت۔ بازین کسان ھچ مھلت ھم نہ رستگ کہ وتی ضروری چیزان بہ رکـّین انت۔ قاسم آباد نامین میتگے سرجمیءَ آپءَ چيئر ترّينتگ۔
سرکاری واکان کمک رسینگءِ قول داتگ، بلے انگت مھلوکا ھچ نہ رستگ و انگت چم اش پہ راھان سکّ انت۔
حالانءِ ردا صوبہ جنوبی ھندان سرجمیءَ چہ صد کلّگان گيئش ھورانءِ سوبا تاوانبار بیتگ انت کہ اشانءِ گيئشترین بھر نیکشھر و دشتیاریءَ انت۔
سرباز: ارناءَ شنگ بیتگین حالا نبیستگ کہ شھرستان سربازءِ بنجاھی شھر راسکءِ ورگی آپ سیستم کورءِ ھارکنگءِ سوبا خراب بیتگ و نین مردمان ٹانکرانءِ سرا آپ رسینگ بیگا انت۔ راسک تا پیشنءِ راہ ھم ھارءِ سوبا بند انت۔
ھواشناسانءِ حسابءِ ردا تنے وھدی راسکءِ دمگا 55، سربازءِ دمگا 60 و پیشن و کش گورا 34 ملی میٹر ھور رتکگ۔
Gedrosia News Desk
هیچ نظری موجود نیست:
ارسال یک نظر
وتی کلوا چێرا نبیس إت