واجه یعقوب مهرنهادءِ باروا بدین حالانءِ رسگا بلوچ بژنیگ

بلوچ دودربیدگی و إنسانی حقانءِ پانکجنوکین جھدکار یعقوب مھرنھاد باروا حال ترّگا إنت کہ إیرانی واکان آئیا پاهودیگءِ سزا داتگ۔ إے حالءَ بازین بلوچ جھدکار و إنساندوست حیران و بژنیگ کتگ أنت۔ پچیا کہ یعقوب مھرنھاد مدام گون سرکاری مردمان نند پادا کتگ و آئي تمامین کار ملکءِ قانونءِ ردا بیتگ أنت۔

أنگت چہ ألـّمین درےءَ إے ردا حالے نیاتکگ و مردم امید کنگا أنت کہ دروغے بہ بیت، ألبت مان بلوچستانءَ نادینتگین إیران سرکارءِ نمایندھان چه نیکیءِ اُمید کنگ، وتی دلءِ وش کنگا چہ بید دگہ ھچ نہ إنت۔

بازین بلوچ گل و ٹولیان مھرنھادءِ سرا لڈ ّتگین پھکین میار دروغین گشتگ أنت، و لوٹ إش کتگ کہ مھر نھاد رسگا ویل کنگ بہ بیت۔ إے ردا بلوچستانءِ راجی زرمبشءَ وتی شنگ کتگین بیانےءَ گشتگ:

یعقوب مھرنھادءِ جھدءِ پڑ چاگردی و دودربیدگی بیتگ۔ إے تمامین کار آئیا إیرانءِ ھستین رھبندان گون ھمرد دیما برتگ أنت۔ راجی رزمبشءَ إے بیانءَ إیرانءِ واک إیرجتگ أنت و چہ سرکارءَ لوٹ کتگ کہ آ یعقوب مھرنھادءِ سرا جتگین پھکین بھتانان دیر بہ کنت و آئیا ویل بہ کنت۔

خیال ظاھر کنگ بیگا إنت کہ یعقوب مھرنھادءَ تاوان کنگ مغربی بلوچستانءِ توکا إیرانی سرکارءِ مزنترین ردی بیت إنت و إشیءِ تاوانان بلوچستانءِ مردم گون مھرنھادءِ روگا وا گند أنت، بلے سرکار وتی روک کتگین إے آسءَ تا بڈ ّے سالان سچیت۔