چہ شنبہءِ روچءَ دیم پہ اِنگو اَنگتین پاکستانی فوجءِ آپریشنءِ سببا بازین بلوچ مردین، جنین و چوریگانء ھوریا دلوت ھم جنگ بیتگ اَنت۔ اِے آپریشنءِ توکا گن شپ ھلی کاپٹر، جیٹ بالی گراب و توپ کارمرز بیگا اَنت، و چہ اِشان گون ھنچنائینان ھور زھری سلاح بلوچ ھندان دور دیگ بیگا اَنت۔بلوچ میتگانءِ سرا فوجی یورشءَ جوابا بلوچ سرمچاران فوجءِ سرا حملہ کتگ۔ بازین فوجی جنگ، آوانءِ گاڑی سوچک و لھتے سلاح سرمچارانء دستا ضبط کنگ بیتگ أنت۔
رستگین سرکاری حالانءِ ردا فوجءَ 25 سرمچار شھید کتگ و آوانءِ وتی 8 فوجی جَنـَگ بیتگ اَنت۔ جَنگ اَنگت اِنت۔ اِے مڑا ٹانک، ھلی کاپٹر و دگہ مزنین سلاح فوج کارمرز کنگا اِنت۔ دگہ حالجاھان کـُشگ بیتگین فوجی 9 و بے میارین ھندی مردم 33 ظاھر کنگ بیتگ اَنت۔ 26 سرمچارانءِ دستگیر کنگءِ حال ھم شنگ بیتگ۔ اِے وھدی کش گورءِ پھکین راہ شنک جنگ بیتگ اَنت و ھچ رئو آ نہ بیگا اِنت۔
بلوچ رپبلکن پارٹیءِ سروک واجہ براھمدغ بگٹی گـَزی کور (اوچ)ءِ شھید 8 بیان کتگ اَنت و آوانا سھرین سلام پیش کتگ و گيئش کتگ؛ اِشان نواب اکبر شھباز بگٹی، میر بالاچ مری و آ دگہ بلوچ شھیدانءِ رندگيریا وتی جان ندر کتگ اَنت۔
جنگءِ حالان بیان کنگا رپبلکن پارٹیءَ گشتگ کہ گون ریموٹ کنٹرول بمبتراکے 6 فوجیانء کـُشگ بیگا چہ رند پہ بیڑءِ گِرگا فوجءَ بلوچ عوامءِ سرا یورش برتگ۔ گڈا پہ عوامءِ رکـّينگا بلوچ سرمچار فوجءِ دیما اوشتاتگ اَنت و گون آوان مڑتگ اَنت، و نزیک 50 تا 60 فوجی کشتگ اَنت کہ اِشانءِ توکا دو میجر ھور اَنت۔ پشت کپتگین فوجیان وتی سلاح و 12 گاڑی رنبینتگ اَنت و تتکگ اَنت۔ سرمچاران رنبیتگین گاڑی مانداشتگ اَنت و سلاح آوار جتگ اَنت۔
فوجءِ دستا شھید بیتگین بلوچانءِ توکا ملنگو، سیاھوڑ، لھرا ناڑی، سالار، غلام قادر، شمبوشاھر، بانک گل بی بی، مھر بی بی، گوھر ھؤر اَنت۔ بی آر پیءَ فوجءِ دستا 660 لوگانءِ ماندارگ و 370 بے میارین بلوچانءِ دستگير بیگءِ حال ھم داتگ۔
مہ شموشت کہ بلوچستانءِ سر وزیر نواب اسلم رئیسانی گوئستگین جمعہءَ وتی بیانیا گشتگ اَت کہ صوبہءِ اَمن و اَمانءِ تباہ کنوکانءِ خلافا ترندین گام چست کنگ بیت۔ آئي گيئش کتگ اَت کہ نین وھد آتکگ کہ چہ صوبہءَ شِدّت ولگوج کنگ بہ بیت۔
تبصرہ کنوکانءِ خیال اِنت کہ گون نوکین سرکارءَ گيئشتر بلوچ سیاسی ٹولی گپ تران کنگا ساڑی اَنت۔ اَلبت بلوچ رپبلکن پارٹیءِ جوانین سروک تنا وهدی که چه بلوچستان پاکستانی فوج در مه کپیت؛ ھچ ڈولین گپے کنگا ساڑی نہ اِنت۔ لھتے اِے ھم گشگا اَنت کہ نواب اکبر بگٹی و آئی پشت پدانءِ مخالف ھنوگین سرکاری پارٹیءِ کوھنین باسک اَنت، نواب بگٹیءِ کنبءِ درپہ دریءَ چہ پد ڈیرہ بگٹیءِ سرا ھمشانءِ راج اِنت۔ چمشکا سرکار لؤٹؤک نہ اِنت کہ پدا اِے دمگءِ کماشی نواب بگٹیءِ اوبادگان دیگ بہ بیت۔ چه اوارین جاهان سرجم کتگین بلوچی نیوز رپورٹ
هیچ نظری موجود نیست:
ارسال یک نظر
وتی کلوا چێرا نبیس إت