بلوچستانءِ توکا نواب اسلم رئیسانیءِ سرکارءَ نوکی چیزے ماہ پر گوستگ، بلے آئیءِ بے سوبیءِ تاموری تا دیر گندگ بیگا اَنت و اَوارین پاکستانی سیاسی گل و ٹولی آئیا چہ واکداریءِ کرسیءَ دیر کنگءِ لوٹا کنگا اَنت۔ نین کہ نواب صاحبءِ دست گون پاکستانیان نہ رسیت، آئی پہ وتی زھرانء کشـّگا دیم گون بلوچستانءِ بزگین عوامءَ کتگ۔ کم یا گيئش دوھفتگ بیگا اِنت کہ ھر روچ آ بلوچان بیم دیگا اِنت کہ آ سرکارءِ مخالفیا اَنگار بہ کن اَنت؛ اَگہ نہ گڈا ھنچوکہ کوئٹہ پدا پٹان فوجیانءِ دستا داتگ آدگہ ھندان ھم پٹان فوجیانءِ مھاران ویل کنت۔ اِے یوکا حالتاکی بیان نہ بیتگ اَنت، نواب صاحبا نین عمل کنگ بنا کتگ۔
ھمے ردا ڈان حالتاکءِ داتگین حالیا آتکگ کہ زی (شنبہءِ) بیگاھا فوجیانءِ یورشیا 7 شورشی (بلوچ) کشگ بیتگ اَنت و دو چہ فوجیان ٹپیگ بیتگ اَنت۔ دگہ بازین بلوچ هم ٹپّيگ بیتگ۔ ھمے حالءِ نبیسگا روچتاک توار مرتگین فوجی 4 ظاھر کتگ انت۔
ڈان آنلائن گيئش کتگ؛ رستگین حالانءِ ردا اوچ گئس پڑءَ یک ریموٹ بمبےءِ ترکـّگ و اِشیءِ سببا دو سرکاری مردمانءِ مرگا رند فوجءَ کش گورا یورش برتگ۔ گڈا سلاحبندین مردمان فوج سرا تیر جتگ و دو فوجی ٹـپّيگ کتگ اَنت۔ فوجءِ جوابی تیرگواریا ھفت شورشی تیرانءِ آماچ (شهید) کتگ اَنت۔
نواب اسلم رئیسانیءِ دومی کرامات آئی مان کوئٹہ پیش داشتگ۔ روچتاک توارءِ نبیستگین حالءِ ردا اودا مری ٹکءِ مردمانءِ میتگ 'نیوکاھان'ءِ سرا سرکاری واکان یورش برتگ و 17 کس دستگیر کتگ اَنت۔ انجمن اتحاد مریءَ وتی بیانےءِ توکا گشتگ کہ اِے پھکین دستگیر کتگین بے میار اَنت۔
چہ اسلم رئیسانی سرکارءِ نیمگا بلوچ عوامءِ خلافا زوراکیانءِ آسءَ جنبور کنگا چه رند بازین بلوچ جھدکارانءِ خیال اِنت کہ آئی ٹی یونیورسٹیءِ دیما پہ شد کوشی نندوکین ورنا وتی اِحتجاجا ھداروکی اَنگار بہ کن اَنت۔ چیاکہ اِے اِحتجاج بازین جھدکارانءِ دلگوشا چہ اَصلی جیڑوا کہ بلوچ عوامءِ سرا فوجی یورش اِنت؛ دگہ نیمگیا ترّینگا اِنت۔
هیچ نظری موجود نیست:
ارسال یک نظر
وتی کلوا چێرا نبیس إت