برطانیاءِ صوبہ اِنگلنڈ و ویلزءِ کلانترین جج (چیف جسٹس) لارڈ فلپسءِ گشگ اِنت کہ إنگلیش قانون شریعہ قانونءِ کارمرزیءِ خلافا نہ اِنت۔ ھما جاھان کہ إدءِ قانون پروشگ مہ بیت؛ اِسلامی قانونءِ لاگو کنگ روا اِنت۔ مان مشرقی لندن مسلمانانءِ یک مزنین مچّیےءَ گون تران کنگءِ وھدا لارڈ فلپس گيئش کت: اَگر دوئین نیمگءِ مردم راضی بہ بنت گڈا اِسلامی قانون پہ صحلبندی کارمرز بیت کنت۔ اَلبت اَگر صحل مہ بیت گڈا سزا اِنگلش قانونءِ ھمردیءَ دیگ بہ بنت۔
لارڈ صاحبءَ دیمترا درّائینت: شرعی قانونءِ باروا باز مردم رَد وَرَگا اَنت۔ راستی اِش اِنت کہ شرعی قانونءِ لھتے اُصولان گون اِنگلش قانونءَ ھور کنگءِ راہ پچ اِنت۔ اَلبت اِشیءِ ھچ اُمید نیست اِنت کہ سِنگسار یا دست و پادانءِ بُرّگءِ ڈولین قانون برطانیاءَ رواج دیگ بہ بنت۔
اِمبریگین سالءِ اَوَل سرا برطانیاءِ مزنترین کرسچن پیشونک داکٹر ولیمزءَ ھم وتی گپانءِ توکا اِشارہ کتگ اَت کہ شرعی قانون مان برطانیا مسلمانانءِ سرا لاگو بیت کنت۔ چہ اِے گپا رند بازین حالتاک و ٹلوژن مراگشان داکٹر ولیمز اِیرجَنـَگ بیتگ اَت۔ بلوچی نیوز
هیچ نظری موجود نیست:
ارسال یک نظر
وتی کلوا چێرا نبیس إت