عبدالقادر قلندرانی کہ بلوچستان رپبلکن پارٹیءِ سرین رھشونان چہ یکے اِنت گشتگ کہ بلوچستانءِ سرا ھنـّی بیوکین فوجی یورش صوبہءِ واکدارانءِ ھمپتـّيا بیگا اِنت۔ مروچی بلوچستانءَ نہ اویس غنی، نہ جام یوسف و نیکہ شعیب نوشیروانی ظاھر اَنت، اَلبت پہ بلوچ کوشیا مشرفءِ حکمءِ سرا کار ھما ڈولا دیما روگا اِنت۔
واجہ براھمدغ بگٹی وتی بیانے توکا گشتگ کہ مارا بلوچستانءِ سلامتی پہ کار اِنت، نیکہ پاکستانئے۔ پہ بلوچستانءِ رکـّینگا اَگر مارا ھندوستان، اَفغانستان یا اِیران و دنیاءِ دگہ ملکے کمک بہ کنت، پہ زیرگا ما ساڑی اِنت۔
واجہ براھمدغ بگٹی دیئمترا گشتگ کہ ما پیئسرا مھلوکءِ دیما پدّرا کتگ اَت کہ بلوچان گون ھچ ڈولین مزاکرات نہ بیت اِنت، اِے ڈولین گپ چمشکا جنگ بیتگ اَنت کہ فوج وتی دما بہ سارینیت۔
آنگو چہ برطانیا بلوچ اَکشن کمیٹی یوکےءِ جھدکار واجہ غلامحسین بلوچ وتی بیانے توکا گوستگین شنبهءَ مان اوچ پاکستانی فوجءِ دستا شھید بیتگین بلوچ سرمچار ساڑایتگ اَنت و چہ سرجمین بلوچان دستبندی کتگ کہ وتی قومی خودمختاریءِ تحریکا ھؤر بہ بنت۔
.
بلوچستان نشنل پارٹی عوامیءِ سرین منشی اَسد بلوچ چہ بلوچستانءِ سرکارا لوٹ کتگ کہ ڈیرہ بگٹیءِ سرا فوجی یورشءِ دیما بہ داریت و اَگر نہ آ وتی پارٹیءِ نیئمگا صوبہءِ سرکارءِ حمایتا اَنگار کنت۔ آئی گیئش کتگ کہ گون صوبہءِ سرکارا ھور بیگا آصف علی زرداری گون ما یک بیست نقطہءِ قرارے بستگ اَت۔ اِے نقطوانءِ توکا آپریشنءِ بند کنگ ھؤر أت۔ چمشکا ضروری اِنت کہ اِشی سرا عمل بہ بیت و بلوچستانءِ وسایلانءِ سرا بلوچءِ حق منـّگ بہ بیت۔ آساپ
هیچ نظری موجود نیست:
ارسال یک نظر
وتی کلوا چێرا نبیس إت