اَھل سنـّتءِ پاکین ناما پہ بلوچان پولنگے کنگا انگار کن اِت

اِسلامدوستین راج بلوچءِ سرا مدتـّے بیت کہ دشمنان یک نوکین بلاھے دئور داتگ۔ یے بلاہ گالبند 'اھل سنـّت' اِنت۔ پیغمبرءِ پاکین رھبندءِ ناما اَڈ کتگین اِے پاکین گالبند لھتے سلگت و جاھلان زرتگ په بلوچان پولنگے جؤڑ کتگ۔ وتی کتگین ھر سلّ کاریا ھمے ناما بلوچءِ پشکءِ دامنا لگچّینگا اَنت و بلوچ راجی جُھدا نزور کنگا اَنت۔ ضروری اِنت کہ بلوچ چہ اِے سِلگـَتان وتا بہ رکـّین اَنت۔

بلوچانءِ سونـّی بیگءِ مانا اِے نہ اِنت کہ آ گون غیر سونـّیان گٹ مان گٹ بہ بنت۔ نیکہ بلوچءِ جیڑہ گون شیعوان مذھبی اِنت۔ جاھے کہ سونـّی مسیت نیست اِنت، بلوچان شیعہ مسیتان نماز کنگءِ ھچ مشکل نیست اِنت۔ دوئینانءِ قبلہ یکـّين نیئمگا اِنت وھر دو یکـّین اللہ، یکـّين قران و یکـّین پیغمبرءِ منّوک اَنت۔ بلوچءِ جنگ راجی پجّار جنگے اِنت و ضروری اِنت ھمے راھا بلوچ پیئش کنزان بہ بنت۔

دنیاءِ کجا کنڈا دوز، ڈرگ پرؤش و زنا کارے گرگ و بندگ یا سنگسار بہ بیت آئیا گون بلوچان کارے نیست اِنت۔ بلوچ یوکا اِنسانی ھمدردی کت کن اَنت، نیکہ وتی جیڑوی بہ زان اَنت۔ چہ وتی راجی جُھدا شموشکار بہ بنت وھمشیءِ پشتا وتی سرجمین واکا بہ ھلـّین اَنت۔ بلوچی حالتاک