جنبش مقاومت مردمی ایرانءِ نوکترین جار

جنبش مقاومت مردمی اِیران -جنداللہ وتی نوکترین بیانے توکا کہ مان پھرہ بلاگ شنگ بیتگ؛ گشتگ: جنبش مقاومت مردمی ایران بلوچستان و ایرانءِ عوامءَ سھیگ کنگ لوٹیت کہ جنبش و شیعہ رژیمءِ نیاما پہ بلوچستانءِ سیاسی بندیگانءِ آزادی بیوکین گپ تران بے ثمر کٹـّتگ اَنت و رژیمءَ پدّر کتگ کہ آئيا بنديگان ویل کنگءِ ھچ واھگ نیست اِنت۔ سرکار واھوک اِنت کہ مزاکرہ دراجکش بہ بنت تا آ وتی چيئرکائی سازتگین پندلان پیلو بہ کنت۔

جنداللہءِ جارءَ دیمترا نبیستگ: جنبش جار پرّینیت کہ اگر تا جمعہ 25 جولائی 08 (4 مرداد 87) شیعہ سرکارا سرجمین لوٹان منـّگءِ جواب مارا نہ دات، گڈا ما دگہ دو پاسدار کہ نامش علی خیدہ و علی زارعی اَنت کوشین۔

پیسرا کوشتگین پاسدار جنداللہءِ بیانا 6 ظاھر کنگ بیتگ اَنت و آوانءِ نام علی محمدی، محمد پیری، عیسا پودینہ، رضا راھداری، جواد حسنزادہ و علی اسماعیلزادہ نبیستگ اَنت۔

چہ جنداللہءِ نیمگا شش مردمانءِ کشگءِ جارانءِ چپ اِیرانی واکدار اَنگت وتی عوامءِ دیما منـّگا نہ اَنت کہ ششین کس کوشگ بیتگ اَنت۔ آوانءِ دلیل اِنت کہ ھچ جسدش دستا نہ کپتگ۔

آنگو پاکستان و اِیرانءِ تھی جاورانءِ وزیران مان پاکستان گِندوک کتگ و پاکستانءِ توکا شیعہ-سونی فسادانءِ دیما دارگا گون یکا دگر ھور کاری کنگءِ قرارش بستگ۔ پاکستانءِ توکا چہ ایرانءِ انقلابا رند بران برانا شیعہ-سونی جنگ چست بنت و خیال ھمے ظاھر کنگ بیتگ کہ اِشانءِ توکا اِیرانی شیعہ سرکارءِ دستمانجی ھؤر اِنت۔

اَلبت ایرانءِ توکا سونیانءِ سرا بیتگین زوراکیانءِ خلافا پاکستانی واکداران ھچ خبر نہ کتگ۔ اِیرانی سونیانءِ سرا زوراکیانءِ خلافا پاکستانءِ بے کِماری پہ مغربی بلوچان یک درسے اِنت و اگر آ سرپد بہ بنت گڈا وتی جھدانءِ راھان مٹـّین اَنت۔ چوناھیا پاکستان پہ زرّءِ خاطرا ناھودگین کنگا نامدار اِنت۔ ھنون کہ تیلءِ بھا مان جھانءَ باز اِنت و پاکستان اِشیا مؤکِت نہ کنت، گون اِیران لھتے سونیانءِ سودا جنگ شرترین و آسودگترین راہ گندگ بیگا اِنت۔

.

هنوگین پاکستانی سرکارا اِیرانءِ گورا مردم بھا کنگءِ بندات گون غلام حیدر رئیسانی نامین بلوچےءَ کت۔ غلام حیدر رئیسانی جنداللہءِ سروک واجہ عبدالمالک ریگیءِ برات ظاھر کنگ بیت و گون دگہ 4 بلوچان گوستگین ماہءَ ایرانءِ گورا بھا کنگ بیت۔