پاکستانی مروچی وتی ملکءِ شصت و یکمی سال روچءِ ردا جشن وشادِھی کنگا اَنت، آ دگہ نیمگا بلوچ یے روچءَ سوگ دارگا اَنت و سیاھین روچےءِ حسابا یاد کنگا اَنت۔ ھمے روچءِ آيگا چہ یک روچے پیئسر مان بلوچستانءِ اوارین کـُنڈان بازین بمبتراک و فوج، و سرکاری بـُنجاھانءِ سرا یورش بَرَگ بیتگ کہ اِشانءِ سببا 13 کس کـُشگ و لھتے ٹپّيگ بیتگ اَنت۔ گيئشتر چہ یے یورشان بی اِل اِے وتی سرا زرتگ اَنت۔
شِنگ بیتگین حالانءِ ردا زی -چارشنبہءِ بیگاہءَ چہ حب 3 کلومیٹر دور ساکران روڈءِ سرا اوشتاگین یک سواری گاڑییے گون بمبے تراکینگ بیتگ و اِشیءِ سببا خوشی محمد و ریاض نامین دو برات جاہ پہ جاہ کـُشگ بیتگ اَنت، و دگہ 9 کس ٹپـّی بیتگ اَنت۔ چہ ٹپـّيگان چار کسانءِ حال نِگيئگ اِنت و پہ علاجءَ کراچی دیئم دیگ بیتگ اَنت۔ یے بمبءِ نشانگ سلاحبندین رستگاری واک بیتگ اَنت کہ مان یک ھـَندی سِمِنٹ اَڈ کـَنوکین کارخانوےءَ کارکنوکانءِ رَسینگا راھی بیتگ اَنت۔
اوتل پولیس بنجاہءِ سرا یک دستی بمبے دئور دیگ بیگءِ سببا تؤکا نِندوکین محمد حسن نامین مردمے کـُشگ بیتگ و غلام حیدر، نظر محمد و غلام رسول نامین سئے پولیس ٹپـّی بیتگ اَنت۔ مرتگین محمد حسن اسکول اُستادے بیتگ و پولیس بنجاہءِ کلـّانترین اَفسرءِ سَنگت که په گِندوکی اودا شتگ بیتگ۔
آنگو کوھلوءَ رستگاری واکانءِ یک بُنجاھےءِ سَرا 9 راکٹ دئور دیگ بیتگ اَنت کہ واکانءِ گـُشگءِ پدا کـَش گـُوَرا کـَپتگ اَنت؛ اِشانءِ سببا ھچ کسءِ ٹپـّی یا کشگ نه بیتگ۔ البت بی اِل اِے بیورغ بلوچ گـُشتگ: آوانءِ یورشان فوجی بنجاہ پرؤشتگ، گاڑی سوتکـَگ اَنت و 7 فوجی کشتگ اَنت۔
مستونگءَ یک کسے موٹر سائکل سواران وتی تیرانءِ آماچ کـُتگ و تفتان "ریل لائن" گون بمبتراکےءَ تباہ کـَنـَگ بیتگ۔
تـُربتءَ لیاقت علی نامین رستگاری واکانءِ کارمندے تیر جنگ و کـُشگ بیتگ۔ پنجگوردَمَگا تاج محمد نامین درامدےءِ لوگءِ سرا لـَهتے دستی بمب دئور دیگ بیتگ اَنت کہ اِشانءِ سببا یک کسانسالین جَنِکـّے کـُشگ و تاج محمد و ملازم شاہ ٹـپـّي بیتگ اَنت۔
بی اِل اِےءِ بیورغ بلوچ اوتل و حبءِ حملہ وتی سرا زرتگ اَنت و گون حالکاران وتی ترانان آئی گـُشتگ: بلوچ 14 آگستءِ روچءَ سیاھین روچے یاد بہ کن اَنت و ھر کسے سرکاری جَشنان ھؤر بہ بیت، آئیءِ سرا یورش برگِ بیت۔ بیورغ بلوچ آیوکین روچان دگہ بمب تراک کنگءِ بیھار ھم داتگ۔
بلوچستانءِ لھتے گلانءِ تِپاکین ھؤربند 'بلوچ نشنل فرنٹ' جار پـِرّینتگ کہ آ سرجمین بلوچستانءَ 14 آگستءَ سیاہ روچءِ حسابا یاد کن اَنت۔ آوان چہ وتی باسک و بلوچستانءِ مردمان لؤٹِتــَگ کہ وتی دکان، گِس و کارجاھانءِ ماڑیانءِ سرا سیاھین بیرک ٹال بہ کن اَنت۔ ھمے ردا "بلوچ خواتین پئینل" جار پـِرّینتگ کہ مروچی آ مان کوئٹہ پہ پاکستانءِ ایئر جَنـَگا رالییے کـَشّ اَنت۔
چہ پاکستانی حالتاکان سرجم کتگین بلوچی نیوز رپورٹ
هیچ نظری موجود نیست:
ارسال یک نظر
وتی کلوا چێرا نبیس إت