درین ملکان جاہ منندین بلوچانءِ دو دیوان مان لندن برجم دارگ بیت اَنت۔ اِشانءِ توکا چہ شمالی امریکا و یورپءِ اوارین ملکان بگر تا مڈل ایسٹ بازین بلوچان بھر زرت۔ آوان بلوچ و بلوچانءِ چاگردی و سیاسی مشکلانءِ سرا بحث و تران کت۔ اولی روچءِ بندین دیوانءَ کہ 15 آگست 2008 برجم بیت؛ بحث و ترانءَ چہ رند ضرورت مارت کہ په بلوچانءِ چاگردی، لبزانکی و انسانی حقانءِ پانکجنیءَ یک ھوربندے اڈ بہ کن اَنت۔ آوان ھمے ردا دیوانءَ بھر زیروکانءِ رضاءَ "بلوچ یومئن رائٹس کونسل"ءِ نام گچین کت۔
دومی روچءَ پچین دیوانءِ دیما ھمے گچین کتگین ھوربندءِ نامش ایئر کت کہ دیوانءَ اِشی منّ اِت۔ پدا پیشی دیوانءِ گچین کتگین نام پہ اشیءِ رھشونی و پروگرامءِ ٹھینگا منـّائینگ بیت اَنت۔ پہ رھشونیءَ منـّینگ بیتگین مردمانءِ توکا لھتے زمانگی " ورلڈ بلوچ آرگنائزیشن"ءِ سروک و آدگہ نوکین بلے مان برطانیا جاہ منندین نامدارین جھدکار چؤ کہ واجہ حسن ھمدم، عبدالصمد بلوچ، میر غلامحسین و دگہ ھور اَنت۔
بلوچ یومئن رائٹس کونسلءِ لوٹ اَنت ' بلوچانءِ انسانی حقانءِ پانکجنی؛ ڈگار، ملک، زربار و دگہ قدرتی وسیلوانءِ سرا بلوچءِ حقءِ منـّينگا جھد کنگ؛ سیاسی بندیگانءِ ویل کنائینگا تچ تاچ کنگ؛ سیاسی و انسانی حقانءِ پانکجنوکین جھدکارانءِ گرگ وگار کنگءِ دیما دارگ؛ بلوچی زبانءِ دیما برگ؛ سرکاری واکانءِ دستا بلوچ جوانانءِ کشگ بیگءِ دیما دارگ؛ بلوچ دود ربیدگی مڈ ّیانءِ پھازگ و آوانءِ ردوم دیگا جھد کنگ؛ مذھبی و فکری مارشتانءِ درشان کنگءِ آزادیءِ راھان گيشینگ؛ بلوچ سرڈکار سرا انسان کـُشین اٹمی سلاحانءِ چکـّاسگ و یا دئور دیگ خلافا توار چست کنگ، و بلوچ سرڈگار سرا مذھبی کٹریءِ دیمرئیءِ دیما دارگ'۔
پچین دیوانءَ چہ ایران و پاکستانءِ سرکاران لھتے لوٹ ھم کت اَنت کہ بھر زیروکان اشانءِ پلانگری زرت۔ یے لوٹانءِ توکا بلوچستانءِ سرا پاکستانی فوجی یورشا بند کنگ، ایرانءِ دستا بلوچان درنجگ و کشگا انگار کنگ، بلوچانءِ ملک و زمینانءِ سرا درین مردمان آرگ و جاہ منند کنائینگا انگار کنگ، سیاسی بندیگانءِ ویل کنگ، بلوچی زبانءَ مان بلوچستان سرکاری زبانءِ حسابا رواج دیگ؛ ھؤر تنت۔
برجم داشتگین دیوان بازین راجی جھدکارانءِ دراجکشین تچ تاچانءِ بَروَرد تنت۔ یے جھدکاران کہ اشانءِ زحمت دیوانءَ ستا دات اَنت واجہ تاج بلوچ، عبدالستار بلوچ و میرغلامحسین بلوچءِ نام چہ پھکان دیماتر بیتگ اَنت۔
ھمے زیتان پہ بلوچ ھیومین رائٹس کونسلءَ مان لندن گارگِسے زیرگ و اشیءِ ڈس و ٹلفن نمبرءَ گون ھؤر ویبسائٹءِ ناما شنگ کنگءِ شوربندی ھم بیت۔ بلوچی نیوز رپورٹ
هیچ نظری موجود نیست:
ارسال یک نظر
وتی کلوا چێرا نبیس إت