نشنل پارٹیءِ نوک گچین بیتگین مرکزی اگدہ دارانءِ دیوان سئے شنبہءَ پارٹیءِ صدر داکٹر عبدالمالکءِ پاگواجھیءَ مان کوئٹہ برجم دارگ بیت۔ دیوانءَ دگہ سرحالانءِ ھؤریءَ بلوچستانءِ جاورانءِ سرا شرّیءَ بحث کت۔ گون دیوانءَ صدر داکٹر مالک بلوچ، چيئردستین صدر حاصل بزنجو، سرین منشی طاھر بزنجو، بلوچستانءِ صدر داکٹر یاسین بلوچ، جان بلیدی، عبدالخالق بلوچ و دگہ کسان تران کت۔.
داکٹر مالک بلوچءَ دیوان گشت کہ پاکستانی اسٹبلشمنت بلوچ راجءِ مزنترین دشمن اِنت و بلوچ راجءَ گار کنگا چہ رند بلوچ سرڈگار، وسایل و زربارءَ دستگرگ لوٹیت۔ پہ ھمے مقصدانءِ پیلو کنگا بلوچانءِ سرا بمبگواری کنگ بیت، نواب اکبر شھباز بگٹی و میر بالاچ مریءَ گون ھؤر صدانءِ حسابا بلوچ شھید کنگ بیت اَنت؛ سرجمین بلوچستانءَ مردمانءِ لوگانءِ ستر پروشگ بیت اَنت و چہ ڈیرہ بگٹی و کوھلو ھزاران بلوچ درکپگا مجبور کت اَنت کہ مروچی مان دگہ دَمَگان بے کـَسین مجاھرانءِ ڈولا زند گوازینگا اَنت۔
.
داکٹر مالک دیمترا گشت: بلوچ راجءَ قومی نابرابری قبول نہ اِنت، نے کہ غلامی زندگی! گون لٹ کٹ بلوچ راج ھچبر وتی سیاسی، معاشرتی، قومی و ثقافتی حقانءِ دستا آرگءِ جھدا ھم ویل نہ کنت۔ اسٹبلشمنٹ باید سرپد بہ بیت کہ پہ زور بلوچستانءِ راجی جیڑہ حل بیت نہ کنت۔
۔
داکٹر مالک بلوچءَ چہ بلوچان دستبندی کت کہ آ پہ وتی سرڈگار، ساحل و وسیلوان جنگ کنگا گون ھؤر قبیلوی رواج و جاھلیءِ خلافا ھم بہ مِڑ اَنت۔ روچتاک انتخاب. فوٹو آساپ
هیچ نظری موجود نیست:
ارسال یک نظر
وتی کلوا چێرا نبیس إت