ڈیرہ اللہ یارءَ بلوچانءِ مچّيءَ بمب پاکستانی چاریگان تراکینتگ؛ مالک بلوچ

ڈیرہ اللہ یارءَ بلوچانءِ مچیّءَ بمبتراک چاریگی بنجاھانءِ کار اِنت۔ تربتءَ ایمنین بلوچانءِ سرا تیرجنگا فوجءِ خلافا کئس ثبت کنگ بہ بیت۔ عبدالمالک بلوچ

نشنل پارٹیءِ سروک و پاکستانی سنئٹءِ باسک واجہ عبدالمالک بلوچ 25 آگستءَ مان تربت بلوچ نشنل فرنٹءِ مچّیءِ سرا فوجءِ تیر گواری اِیرجتگ و لوٹ کتگ کہ کـُشگ و ٹپـّيگ بیتگینانءِ میار فوجءِ چکـّا جنگ بہ بنت و فوجی کورٹءَ کـَشـّگ بہ بنت۔

سنئٹءِ توکا وتی زھرگِنکـّین ترانءِ توکا آئی مان ڈیرہ اللہ یار بلوچانءِ مچّی سرا بمب تراک ھم اِیر جتگ و گشتگ کہ یے پاکستانی چاریگان کتگ۔

دیمترا عبدالمالک بلوچ نواب اکبر بگٹی ساڑاھتگ و گشتگ: پہ بلوچانءِ واک و مالءِ رکـّينگا قربان بیگا گون شھید نواب اَکبر بگٹی بلوچستانءِ مردمانءِ سیاسی جھد انگت مُھر تر کت۔ ھمے جھد گون عقل و ھؤش اَنگت مھرترء بیت و دیما روان وتی منزلءَ الـّما رسیت۔

چدا رند عبدالمالک بلوچستانءِ مردم پرے حبرا ساڑاھتگ اَنت کہ آوان نواب اکبر بگٹیءِ شھادتءِ دومی سالروچءِ وھدا سرجمین بلوچستانءَ کار بار بند کتگ اَنت، جلسہ و مچّی کتگ۔ آئیءِ خیالا گون بلوچ راجی جھدا یے مردمانءِ ھمبلـّیءِ نشانی بیتگ کہ آوان پیئش داشتگ۔

عبدالمالک بلوچءِ باروا روچتاک آساپ آتکگین یے حالا نبیستگ کہ وتی گپانءِ سرجم کنگا رند عبدالمالک بلوچ چہ سنئٹءَ زھر کتگ و در کپتگ۔

.

ترانگ به کپ إت کہ زی؛ بزان 26 آگستءَ مان ڈیرہ اللہ یار جمھوری وطن پارٹی -میرعالی گروپءَ شھید نواب اکبر بگٹیءِ یادا یک مزنین مچّيے سرجم کته بیتگ کہ اشیءِ نزیکا یک موٹر سائکلےءَ لچّینتگین بمبے ترکـّتگ کہ چہ بیست کسان گيئش ٹپـّيگ بیتگ انت۔

.

آنگو مکرانءِ مزنترین شھر تربتءَ فوجیان 25 آگستءَ بلوچ نشنل فرنٹءِ مچّییے سرا تیر گواری کتگ کہ الطاف بلوچ نامین جھدکارے شھید و چارکس ٹـپـّيگ بیتگ اَنت۔