پہ وتی ملکءِ آزادیءَ گون جورجیا دراجین مدتےءَ مِڑوکین دو راج "جنوبی اوسِتیا" و "اَبخازیا" روسءَ 26 آگست 2008ءَ آزادین ملک مَنـِّت اَنت۔ یے ملکانءِ آزادیءَ منـّگءِ کاگدانءِ سرا وتی دستنشانءِ جَنـَگا رند روسءِ صدر'دِمِتری ویدیف' گـُشت کہ یے گامگیئجءِ مقصد چدا گيئشتر مردمان جورجیاءِ دستا چہ کـُشگ بیگا رکـّينگ اِنت۔دوئین ملک سوویت یونینءِ پروشگا دیم پہ انگو گون جورجیا پہ وتی آزادیءَ جنگا بیتگ اَنت۔ البت اَمن برجاہ داروکین میان اُستمانی فوجءِ اودا بیگءِ سببا لھتے سال بیتگ کہ جورجیاءِ فوجءَ یے دَمَگان باز دستمانجی نہ کتگ۔
وھدے 8 آگست 2008 جورجیاءِ فوجءَ جنوبی اوستیاءِ سرا یورش برت و بازین مردم کـُشت اَنت، گڈا روسءَ وتی فوج پہ جورجیاءِ دیما دارگا راہ دات۔ روسی فوجءَ جورجیاءِ فوج جَت و چه اودا تاچیئنت، پدا وتی فوج نِندارینت۔ پرے کارءِ کنگا دنیاءِ بازین ملکان کہ اشانءِ توکا امریکا و لھتے یورپی ملک ھؤر اَنت؛ روس اِیرجَت۔
روسءِ گشگ اِنت کہ آوانءِ گامگیج ھؤرین راجانءِ میان اُستمانی ھؤر بند (یو ان)ءِ 1970 و 1975ءِ ھِلسِنکی قراربندءَ گون ھمرد اِنت۔ یے قراربندان منـّوکین ملکان ھر قومءِ مردمانءِ رضا پہ وتی آزادی یا گون ملکےءَ ھؤر بیگ مَنِـّتــَگ۔ وھدے جنوبی اوسِتیا و ابخازیاءِ مردم گون جورجیا ھؤر بیگا راضی نہ اِنت آوان جدا بیگءِ حق اِنت و روسءِ گشگ اِنت کہ آ یے اِنسانی حقءِ پلانگریءَ زیریت۔
روس و روسیانءِ منـّوکین تبصرہ کنوکانءِ خیال اِنت کہ وھدے 'کوسوا' چہ ' سربیا' جدا بیگءِ جار جَت، یورپ و امریکا آئیءِ آزادی مَنِـّت، نین اِشانءِ سرا فرض اِنت کہ یے راجانءِ آزادیءَ ھم قبول بہ کن اَنت۔ البت جورجیاءِ توکا وتی فوجءَ دیم دیگءِ سببا اَنگت مغربی ملک روسءِ خلافا گرّگاپا اَنت و روسءَ یک زؤرگرین ملکے لیئکگا اَنت۔ بلوچی نیوز
هیچ نظری موجود نیست:
ارسال یک نظر
وتی کلوا چێرا نبیس إت