بلوچانءِ امریکائی دوستانءِ کاران پاکستانیانءِ واب حرام کتگ

چه سال 2006 دیم پہ انگو "بلوچانءِ امریکائی دوست" (اے اف بی) نامین جھدکارانءِ ٹولیےءَ پاکستانی سفارتکار نگيئگ کت بیتگ اَنت۔ نامدارین حالکار احمر مستی خان و داکٹر واحد بلوچءِ سرکشـیءَ اڈ بیتگین یے ھوربندءِ داکٹر واحد بلوچ وھدے اکتوبر 2006ءَ گون لھتے امریکائی سنئٹران ڈیک وارتگ اَت و بلوچستانءِ سرا بیتگین پاکستانی زؤراکی آوانءِ دیما بیان کتگ تنت، گڈا پاکستانیان پہ صفائی دیگا بازین تچ تاچءِ ضرورت بیتگ اَت۔ پدا ھم پاکستانیان امریکائی سنئٹر 'ادورڈ کنئڈی'، 'چارلز شمئر' و 'ڈک ڈربن' راها آرت نہ کت اَنت و آوان بازین جاھان بلوچستانءِ سرا بیتگین پاکستانی ناروائیانءِ باروا وتی لیئکہ گشتگ تنت۔

ھمے ھنـّيکان 'اے اف بی'ءِ جھدکارانءِ نام یک رندے پدا حالتاک و جالجاھانءِ توکا ظاھر بیگا اِنت۔ پدا پاکستانی وتی مؤٹانءِ چلاّنءِ شودائینگا ناموَرین امریکائیانءِ دروازگان ٹـُکـّگا اَنت۔ بلے گون نوکترین کاری راھنبدےءَ پیئش کنزان، یے بلوچ دوستین ھؤربند مان امریکائی مردم و حالکارانءِ توکا جاگہ گران اِنت۔

'اے اف بی'ءِ نوک چست کتگین مزنین گام 15 آگست 2008ءَ واشنگٹن ڈی سیءَ مزنین حالکاری کنفرانسے اَت۔ اودا داکٹر واحد بلوچ حالکار و دگہ مھمانین نندوک ایران و پاکستانءِ دستا بلوچانءِ لتگمالیءِ داستان گون مُھرین شاھدیان درشان کت اَنت۔

بلوچستانءِ جغرافیان ھند و آئی اھمیتءِ باروا مردمان سرپدی دیگا رند داکٹر واحد گيئش کت: پاکستان بید چہ کـُشگ و در پہ در کتگین بلوچان صدان حسابا دگہ بازین کس دستگیر کتگ و چیئر داتگ اَنت۔ یے مردمانءِ سیال ھر سرکاری و غیر سرکاری درءَ ٹکگا اَنت، بلے آوان وتی مردمانءِ باروا جوابے دستا نہ کپتگا اِنت۔

پاکستانی ناروائیانءِ کشا ایرانءِ دستا بلوچان سرا بیتگین زؤراکی داکٹر واحد بلوچ چؤ بیان کت اَنت: ایران کسان کسانین ڈؤبوان چؤکہ 'فساد فی الارض' سرا بلوچ ورنایان لس مھلوکءِ دیما درنجیت۔ ھر بلوچءَ درنجگءِ وھدا اؤدءِ ملا 'اللہُ اکبر، مرگ بر امریکا و مرگ بر اسرائیل' کوکـّار کن اَنت۔ آوانءِ خیالا بلوچءِ کشگ مذھبی ذموارییے اِنت، چیاکہ اؤدا بلوچ امریکا و اسرائیلءِ دوست و چاریگ زانگ بیگا اَنت۔

چدا پد 'بلوچانءِ امریکائی دوست' ھوربندءَ شئور بست کہ آ ماھے یک رندے "بلوچی حال" سرحال سرا پچین دیوان برجم داریت و دیوانءَ بهرزیرؤکین مردمان بلوچستانءِ نوکترین حالان سھیگ کنگا گون ھؤر اؤدءِ تاریخ، زبان و دودربیدگءِ باروا گيئشتر سرپدی دات۔ ھمے ردا واجہ احمرخان کہ آئی وت مان امریکا جاہ منندین نامدارین بلوچ جرنسلٹے اِنت، تچ تاچ کنگا گندگ بیگا اِنت کہ بلوچستانءِ و بلوچ جنبشءِ باروا گيئشا چہ گيئشتر شاھدی سرجم بہ کنت تا دیوانءَ آتکگین مھمان بلوچ و بلوچستانءِ باروا الکاپیءَ زانتکار کنگ بیت بہ بنت۔

بلوچانءِ امریکائی دوستانءِ آگستءِ دیوان مرؤچی امریکاءِ شهر 'مئریلنڈ' بیگاہ کلاک 2:30 برجم دارگ بیگی اِنت۔ مروچیگین سرحال 'بلوچستان نواب اکبر بگٹیءِ شھادتءِ دوسالءَ چہ رند'۔ یے سرحالءِ سرا گپ کنگا رند نوابزادہ براھمدغ بگٹیءِ کـُلوے دیوانءَ اشکنائینگء بیت۔ بلوچی نیوز