شھید یعقوب مھرنھادءِ شھادتءِ چلّمی رؤچءِ ردا چہ بلوچ کمیونٹی و بلوچ یومن رائٹس کونسلءِ نیئمگا مان لندن دیوانے دارگ بیت۔ دیوانءِ پاگواجھی شھید مھرنھادءِ عکسا کت و بُنداتا شهیدءِ یادا مردم دو دمانا بیتوار اؤشتات انت و پدا واجه محمد امین میرلاشاری فاتحه وانت. /
واجہ صمد بلوچ گؤن عطاشادءِ 'ساہ کندن' شعرءِ وانگا دیوان بنا کت۔ چہ آئی رند جبھہ متحدہ بلوچستانءِ راھشون واجہ جمشید امیری آتک و شھید مھرنھاد و بلوچستانءِ دگہ شھیدانءِ داتگین قربانی ساڑایت اَنت۔
/
کوران دامنی گؤن وتی نوکترین شعرءِ وانگا مھرنھادءِ جھد و قربانی ستا دات۔ آئی وانت:
مِھرنِھاد، گٶں ايران دادشاہءِ جنگءِ قصہ نوک کُتَگ
بلے نےکه گٶں تيرءُ تُپنگاں؛ گٶں قلم آس روک کُتَگ
/
چدا رند واجہ اسماعیل امیری آتک و شھیدءِ سِدَگ بیگءِ سرا وتی دل پدردی درشان کت۔ واجہ امیری گشت کہ چؤنائیا آ شاعرے نہ اِنت، بلے ھما رؤچ کہ چہ سرکاری واکانءِ نیئمگا مهرنهادءَ پاھو دیگءِ جار جنگ بیتگ ات، گڈا آئی ھم شعری درؤشما لھتے گال دپ مان دپ دات اَنت۔ واجہ امیری وتی شنگ بیتگین شعر 'مھر نمیران اِنت' وانت۔
/
ولید گرنبی چہ مھرنھادءِ قولان سر ریئچین نبشتانکے دیوانءِ دیئما وانت و گؤن دلیل شؤن دات کہ آ صدان ھزارءِ تؤکا یکےّ بیتگ۔ پدا میر غلامحسین بلوچ بلوچستانءِ شھید ساڑایت اَنت۔ مھرنھادءَ شوشل ورکر گـُشؤک رَد لیئکت اَنت۔ آئی کشت کہ مھرنھادءِ ھر قول و کار بلوچ راجی آزادیءِ باروا بیتگ۔
/
رحیم بندوئی وتی گپانءِ تؤکا ظاھر کت کہ مھرنھادءِ شھادتا چہ کردان بہ گر تا احوازی عربان پھک بلوچانءِ ڈؤلا پہ درد کتگ اَنت۔ وتی گپانءِ کـٹـّیئنگا چہ رند واجہ بندوئی 'کریم تھل'ءِ دیئم داتگین شعرے دیوانءِ دیئما وانت۔ داکٹر مصطفی زؤر دات کہ مھرنھادءِ فلسفہ وانگ و زانگءِ رندگری پہ بلوچان سک ضروری اِنت۔ حسن ھمدم مھرنھادءِ دانشورانہ کارکرد ستا دات۔
/
بلوچ یومن رائٹس کونسلءِ سروک داکٹر حبیب اللہ وتی خیالانءِ توکا گشت کہ مھرنھادءِ سرجمین نبشتانکانءِ کتابے اڈ کنگءِ ضرورت اِنت۔ تا آیوکین نسل چہ شھیدءِ فرمانان راھشونی زرت بہ کن اَنت۔ مھتاک بلوچی کوئٹہءِ شونکار واجہ عبدالواحد بندیگ ھم دیوانءِ دئیمکا بلوچ شھید ستا دات اَنت۔
/
گڈسرا واجہ اکبر بارکزئی کہ خاصین مھمان اَت وتی خیال درشان کت اَنت۔ واجہ بارکزئی گشت کہ مروچی دیوانا گپ کنؤکانءِ برکتا آئیا شھید مھرنھادءِ باروا انگت گیئشتر سرپدی رست۔ واجہ بارکزئی ضرورت ظاھر کت کہ یے ڈولین شھیدانءِ گفتار بلوچی زبانا ترّینگ بہ بنت تا گيئشا چہ گيئشتر مردم چہ اشان سیت زرت بہ کنت۔
/
یے دیوانءِ حبرانءِ گؤشدارگا اِشی سرا کِلِک کن اِت
هیچ نظری موجود نیست:
ارسال یک نظر
وتی کلوا چێرا نبیس إت