چہ کش گؤران لھتے حال

مسلمان بنیاد پرست و سرکاری واکانءِ نیاما ترکمنستانءِ بنجاھی شھر عشق آباد جنگے بیتگ کہ اِشی سببا نزیک 20 پولیس کشگ بیتگ اَنت۔ ملکءِ سرجمین حالجاھانءِ سرا یے ڈئولین حالانءِ شنگءِ بندش بیگ سببا حال اؤدا شنگ نہ بیتگ-

بی بی سی فارسیءِ ردا 12 ستمبرءِ یے جنگا رند اِنگت پولیس اؤدءِ دمکان ترّتابا انت۔ چہ بنیادپرستان کسےءِ کشگ بیگءِ حال دیگ نہ بیتگ۔

افغانستانءِ قندھار صوبوا مرؤچی وتکش حملوئیا یو انءِ سئے کارمند کشت و دگہ شانزدہ کس ٹپّيگ کت اَنت۔ بی بی سی شنگ بیتگین حالا نبیسگ بیتگ کہ کشتگین اصلا افغانی اَنت۔ اشانءِ توکا یکے داکٹر مامون طاھری اِنت کہ افغانستانءِ جنوبی دمگان "واکسنئشن" برناموانءِ سروک و آدگہ داکٹر شمس اِنت کہ داکٹر طاھریءِ ھمکارے بیتگ۔ اشانءِ ڈرائور ھم کشگ بیتگ۔

روسءِ گرابے کہ چہ ماسکو چست و دیئم پہ 'پرم' شھرا روگا بیتگ، دؤشی کپتگ۔ بالی گرابا سوارین 88 کشگ بیتگ انت۔ سوارینانءِ نیاما 21 درملکی بیتگ اَنت۔

ھندوستانءِ شھر دلیءِ توکا شنبہءِ رؤچا پنچ بمب تراکینگ بیتگ اَنت۔ اشانءِ سببا 20 کس کشگ و 90 ٹپـّيگ بیتگ۔ یے ردا پولیسا 10 کس دستگیر کتگ و چہ آوان پٹاسکاری بیگا اِنت۔