ھمے ھنیگان لھتے جنین آدمان کُشگ و کل کنگءِ سرا بلاھین چست یئرے پاکستانا بنا کُت کہ پدا درملکی میڈیاءَ رَند داشت و بلوچ باز بدء بلاہ کنگ بیت اَنت۔ خاص ھما بلوچ سنئٹر کہ اِشانءِ کشگءِ سرا بحثءِ وھدا چه ناسرپدی درائینتگ اَت کہ قبائلی رواجءِ ردا جنین آدم جنگ بیتگ اَنت، چمشکا اشیءِ سرا سنئٹ بحث مہ کنت؛ ڈؤبارگانءِ دیئمپان کنگ بیت۔ یے بلوچ سنئٹرءِ پھوالین گپءِ سببا چہ نمازیا بہ گر تا بے دینین کافر پھکان مؤہ دستا کپت کہ بلوچ و بلوچ چاگردءِ خلافا وتی دلانءِ زنگان بہ ریئچ اَنت۔ بلّی تورین ملاوانءِ سزا پہ ھمے ڈولین گناھان کہ یے جنین آدمانءِ سرا جنگ بیتگ اَنت سنگسار بیتگ اَت، بلے آوان ھم بلوچانءِ کِچّہ چنگا رستگین بھانہ رَوَگا نہ اِشت۔بازین سیاسی و چاگردی بلوچ تنظیم و جھدکاران یے باروا وتی نظر درشان کت اَنت و پھکان غیرتءِ ناما جنین آدمانءِ کُشگ و کل کنگءِ غیر انسانی حرکت یئر جت۔ لھتینان بلوچ سنئٹر ھم ڈؤبار اِت کہ آئی گؤن وتی ناسرپدین حبران بلوچانءِ دؤد سِل پیئشداشتگ اَنت۔ اشان بلوچستانءِ راجدپرا ھستین مثال دات اَنت و ثابت کت کہ بلوچ چاگردا جنین آدمان یک مزنین مقامے ھست۔ پہ جنین آدمانءِ ننگءِ پھازگا چست بیتگین جنگانءِ داستان ھم بیان کنگ بیت اَنت و دنیاءِ دیئما پدّر بیت کہ یے میڈیاءِ دھرا بلوچانءِ خلافا کسےءِ گشتگ یا نبیستگین ناھودگین حبر پيئسری ڈولا بے جواب پشتء نہ کپ اَنت۔
ھمے چست یئرانءِ توکا بازین ھنچین راستی کہ جنوبی اشیاءِ سرجمین قومانءِ تاریخ و ھستین دؤد ربیدگانءِ بھرے اَنت، سرگوئز کنگ بیت اَنت کہ نباید بہ بیتین اَنت۔ پچیاکہ اشانءِ آھونڈان ظاھر کنگا ابید اَصلی سرحال وتی جاگوا پشتء کپیت و دیئمترا ھنچین کپتے آئیا پدا روچتاک و حالجاھانءِ براہء کنت۔
حبر کہ جنین آدمانے بیت، گڈا یکّین چیز گندگا کئیت کہ غیرتءِ ناما مان دنیاءِ آ بھرا ھرجاہ کم گيئش جنین آدم یکّین ڈولا چارگ بیگا اَنت۔ چہ عربان و ایرانیان بہ گر تا بہ رؤت ھِندی و بنگلا دیشی؛ ھرجاہ جنین آدم راج و ٹکّانءِ ننگ زانگء بنت۔ یے دمگانءِ ھر کھول، ٹک و راجءِ مردین آدم جنینانءِ ننگانءِ پاسبان منّگء بنت۔ ھر گامے جنین چست بہ کن اَنت آئیءِ تؤکا مردین آدمءِ رضا ضروری لیئکگء بیت۔ پمشکا جنین آدم مجبور اَنت رواجین دؤدان گؤن ھمرد زند بہ گوازین اَنت۔
اؤدءِ دودانءِ ردا کہ مذھب آوانءِ رھبندان ٹھینوکین مزنترین بھر گِندگ بیگا اِنت؛ جنین آدم وتی رضاءَ چہ لؤگان درکپگ، چہ سانگا ڈن مِھر کنگ، وتی واھگءِ سرا سانگ کنگ، گؤن درامدین یا نامھرمین مردینیا ھمراہ بیگ و ھؤریا جاھے شپے گؤازینگءِ ڈولین گامانءِ چست کنگا زنڈین میارباریان چیئرء ترّ اَنت۔ ھنچین باورانءِ ساھگا جنین آدم رود اَنت و مزنء بنت۔ ھمے باورانءِ سببا اگر درامدین مردین آدمے گؤن بدین نیّتیا دست دراج بہ کنت، گڈا جنینءِ توکا ھمت نیست اِنت کہ پہ وتی رکّینگا زرانکے بہ سُرینیت۔ چیاکہ آ ھَزما وتی پانکجن زانت و ھمے باورء کنت کہ آئیءِ سرا دست دراج کنؤکا سزا دیگا ھزمء کئیت۔ گون هزمان بندؤکین ھمے اُمید گيئشتر وھدان جنین آدمانءِ سرا ناروائیءِ سبب بیگا اَنت۔
چشین مارشتانءِ گار کنگا اولا دؤدان مٹّینگ پہ کار اِنت کہ آسانین کارے نہ اِنت۔ پہ یے کارا وانندہ بیگ و فکری، و ربیدگی انقلابءِ آرگ ضروری اِنت۔ خاص ھمودا کہ غیرتءِ نامء کیئت، اودا جنین و مردین آدم دوئین درس دیگ بہ بنت کہ ھر کس وتی فیصلہ کنوک وت اِنت۔ و وتی پانکجنؤک ھم وت اِنت۔ وتی ستر و آبروا پهازؤک وت اِنت۔ بدء کنت یا نیئک ثمرئے وتء وارت. دنیا و آخرتا جواب چہ ھمائی جُستء بیت۔ وتی نپءِ ذمواری و وتی معاشءِ ذمواریءِ مارشت وھدے جنین آدمانءِ توکا ردؤم دیگ بہ بَنت، گڈا جنین آدم ھمتء کنت۔ ھؤریا مردین آدم ھم آسودگترء بَنت۔ گھارءِ باروا، ماتءِ باروا، جن باروا و جنین چکءِ زندگیءِ باروا کہ بارین چؤنء بیت، کے آئیا چاریت، کے آئیا گندیت، آ گؤن کے نندیت، گپ کنت، ٹلفن جنت، گؤن کے جنین چک یا گھار سانگ کنت؛ مردینانءِ فکر و توانءِ زوال بیگء بدلا یے فیصلہ آوانءِ جندءِ دستا دیگ بہ بنت. گڈا جنین آدم وت ھم خرسد بنت و مردینان کمتر دلسیاہ کن اَنت. مردینءِ فکر آسودگترء بیت و پہ وت و وتی چکّانءِ آیندوا شرترین فیصلہ کُتء کنت۔
ھنچین جاگوان کہ اودا وانگ گيئشتر بیتگ، میڈیا زؤراک اِنت و نوکین مارشتان سر کشّتگ، اؤدا جنین پہ وت رؤژنایین بانداتے گندگا اَنت۔ بنگلا دیش بہ بیت، ھندوستان بہ بیت یا پاکستان آنگرءِ شھری جنین آدم توانگرتر اَنت۔ وتی حفاظتءِ پھکین ذمواریان مردینانءِ سرا نہ دَے اَنت؛ چہ وتی نیئمگا ھم توجیل کن اَنت۔ ھمے ڈول جنین آدمانءِ زندگیءِ آدگہ تکان؛ چؤکہ پہ وتی لاپءِ درگيئجگا، وتی پسندءِ سانگ کنگا یا وتی ھر روچی ضرورتان گيشینگا وت پاد کاینت۔ مھمانداریءِ تکا ھم بازین شھری جنین سرپد اَنت کہ چنچوک دیما بہ رو اَنت و کیا مھمان بہ کن اَنت یا نہ۔
پرے کارا راستے مذھبی سیمسر؛ تورین اسلامی بہ بنت، ھندوانے یا کرسچن؛ گؤازینگ بنت۔ بلے مردم ھُرد بہ چاریت مذھب پہ مردمانءِ آسودگیا آتکگ، نے کہ آوانءِ دلسیاہ کنگا۔ و اگر ریاست سالانءِ سالءِ پرگؤزگا رند مذھبی رھبندانءِ رواج دیگا بے سؤب بیتگ، گڈا ھنچنائین مردمانءِ سرا ھچ ڈؤلین زؤرے بیت نہ کنت کہ آ پہ وتی زندءِ آسودگتر کنگا درے در مہ گیئج اَنت!
هیچ نظری موجود نیست:
ارسال یک نظر
وتی کلوا چێرا نبیس إت