بالاچ گؤرگیجءِ اؤبادگانءِ مات جسدانءِ سرا اَرس نہ ریئچ اَنت۔ بی اس او

بی اس او -آزاد کراچی زؤنءِ باسکان بلوچ و بلوچستانءِ سرا نوکترین زؤراکیانءِ خلافا مظاھرہ کت و گؤن پرجوشین نعروان سرکاری کارپد ئیر جت اَنت۔

تنظیمءِ کراچی زونءِ صدر جواد بلوچ گؤن ھمراھان مظاھرہ کنؤکانءِ دیئما کوئٹہءِ نزیکا نیوکاھان میئتگءِ سرا واکانءِ یورش، مردمانءِ سرا تیرگواری و پدا بے میارین شاگرد نگینہ مری و میا خان مریءَ گؤن ھمراھان ٹپیگ و دستگیر کنگءِ سرکاری کارکرد ڈؤبارت اَنت۔

ھمے ڈئول کراچیءِ تھا سلیم کاشانیءَ کـُشگ و گوادرءِ تھا بی اس اوءِ جھدکار قیومءِ لؤگءِ سرا یورش برگءِ خلافا مظاھرہ کنؤکان وتی دلانءِ پاھار کشّت اَنت۔

گؤن مظاھرہ کنؤکان وتی گپانءِ تھا جواد بلوچ، جمیل جمالی، سلیم بلوچ، ظھیر بلوچ، عدنان بلوچ و پرویز بلوچ پاکستانی حالکار هم باز ایراز گپت اَنت، چیاکہ آ بلوچانءِ سرا بیتگین زؤراکیانءِ خلافا ھچ نہ گش اَنت، بلے وھدے بلوچ دَمَگان سرکارءِ تبءِ چَپ کارے بہ بیت گڈا بلوچانءِ خلافا بے حد زھرشانی کن اَنت۔

مردمانءِ دیئما گپ کنؤکان یے راستی ظاھر کت کہ بلوچان جسدانءِ تحفہ دیگ نؤکین حبرے نہ اِنت۔ بلوچءِ راجدپتر پہ سرڈگارا سران قولیگ کنوکانءِ شاھدیا دنت۔ البت پاکستان و ایرانءِ واکدار باید بہ زان اَنت کہ آ بالاچ گؤرگیئجءِ اؤبادگ اَنت۔ آوانءِ ماس لاشانءِ سرا ارس ریئچگءِ بدلا شاد بنت کہ بچش پہ وتی سرڈگارا قولیگ بیت اَنت۔ آنلائن