حق گشگ و لؤٹگا خاصین وھدے پہ کار نہ انت۔ شھید مھرنھاد

شھید یعقوب مھرنھاد یک شھریور 1385 برابر گؤن 23 آگست 2006ءَ وتی ویبلاگءِ توکا آیوکین دو-پنچ شنبہ و جمعہ -رؤچان 'حوزه علیمه دارالعلوم زاهدان'ءِ تھا 'ختم صحیح بخاری شریف'ءِ دیوانانءِ برجم دارگ بیگءِ حال شنگ کتگ اَت۔ پدا چہ مدرسہءِ انتظامیہءِ نیئمگا غرفہ –اسٹال –جنگءِ دعوت رسگءِ حال ئی داتگ اَت۔

آئی گيئش کتگ اَت کہ انجمن جوانان صداءِ عدالت اؤدا اسٹال جَنت و وتی جندئی پہ انجمنءِ باسکانءِ کمکا ھمودا حاضرء بیت۔

دئومی روچا مھرنھاد نبیستگ اَت "مروچیین رؤچا ما سک گـَسی بیتگ اِنت و پھر بند اِنت کہ چہ مختلفین قومان چؤکہ کرد، بلوچ، ترکمن، گیلکی، خراستانی و دگران بہ گر تا درملکی؛ ھزاران مھمان انجمن جنوانان صداءِ عدالتءِ اسٹالءِ چارگا آتکگ اَنت۔ یے سلسلہ باندا هم تا شپا برجاہ بیت انت۔ ما انجمنءِ اسٹال سرا آيوکین پھکین مھمانانءِ منتوار اِنت" -پنجشنبه 2 شهریور1385 شپءِ کلاک 10:59-۔

شاید پہ لھتیان حیرانی گپے بہ بیت کہ دئومی رؤچءِ دستگٹیانءِ باروا آئي ھچ شنگ نہ کتگ۔ رَندی نبشتانک 4 شھریور بزان 26 آگست 2006ءِ بیگاہءِ کلاک 4:32 شنگ بیتگ۔ اؤدا داتگین نبشتانکءِ سرحال کہ جستے اِنت، چه وانؤکانءِ دلان ھم بازین سوال چست کنت۔ آ ئی جُست کتگ اَت "پرچا لھتے مردم اَبید چہ وتی توارا دگرئیگا گؤشداشت نہ کن اَنت؟"

آئی پدا تبصرہ کتگ: لھتے مردم وتی واھگءِ سرا پہ خدا گری، انصاف، برابری، دوستی و تپاکیا جاک جن اَنت، البت ھر وھد وتی فایدوا بہ گند اَنت، گڈا بے توار بنت و بھانہ کن اَنت کہ جاہ ئی یے نہ اِنت، وھد انگت نہ رَسِتگ؛ گـُش اَنت کہ وھدءِ ضرورت ھچ نہ گشگ اِنت! منی خیالا پہ حق گشگ و حقءِ لؤٹگا خاصین وھدے پہ کار نہ اِنت۔ پہ ھر بُھا بہ بیت، راستی گشگ بہ بیت۔

چؤکہ گشگ بیتگ:
در صف مردانگی شمشیر باید گرفت
حق خود را از دهان شیر باید گرفت