مروچیین دئورا ھر کس پہ مصقدے پریات کنت۔ کسے پہ نام و ننگ، کسے پہ واک و اگدہ و دگرے پہ وتی کیسگءِ پُرتر کنگا؛ دگہ بازین ھست اَنت کہ پہ چُنڈے نان و وتی زھگانءِ جانءِ مانپؤشگا ٹکّرے گـُدا جھد و چلوپگ کن انت۔ اگر نیزگارچہ اشان بہ گیش اَنت، گڈا پہ وتی سرءِ ساھیل کنگا سارتین ساھگےءَ ضرور تکاثر بیگا گندگ بنت۔ پہ ھر مقصدےءَ بہ بیت؛ یے تچ تاچ شؤن دے اَنت کہ مردم سرپد اَنت و زان اَنت کہ دستانءِ سرا کنگ و نندگا کارونءِ گنج ھم کٹـّيت۔
چہ جاھلیءَ مردمانءِ در کـَپَگ و سوھِندہ ترّگ برے برے لھتیان بژنیگ کنت۔ ھرکسءِ بژن وتی جاهءَ، بلے پہ لبزانکی جھدکاران بلوچی لبزانکءِ زیگین بتلانءِ مروچی بے مانا بیگ پریشانی آرگا اِنت۔ اگر ھمے ھنّیگین ڈئول و رواجا جاور دیما روان بہ بنت، گڈا باندات یے لبزانک یوکا گالانءِ غلامء مانیت۔
گالانءِ غلامیءَ قدرت ھچ زبانءِ؛ خاص بلوچانءِ بھتا میاریت۔ چیاکہ یے سکترین جیڑوے بیت کہ گؤن اشی بلوچی لبزانکءِ جھدکار دیم پہ دیم بنت۔ نوکین دنیا کہ ٹکنالوجی و ٹرمنالوجیءِ پڑا بؤر تاچگا اِنت، بلوچی لبزانک ادا گـُنگ اِنت۔ بلوچی زبانءِ جھدکاران نِندگ و یے ٹرمنالوجیانءِ بزانت درگيئجگا سک بازین وھد و واک خرچ کنگءِ ضرورتء بیت۔ اِنچو تھمل (حوصلہ) اشانءِ تؤکا گِندَگ نہ بیگا اِنت۔ چمشکا آسرا بلوچیءَ درین زبانانءِ بندیگ کنگا چہ ابید دگہ کِشکے پشت نہ کپیت۔ وھدے گپ غلامیءَ رسیت، گڈا ھنچینانءِ غلام بیگ کہ وتی لاپءِ سیئر کنگا دگرانءِ چمدار مہ بنت، شرتر اِنت۔ بزان چہ اردو و فارسی و یا اوغانیءَ انگریزی پہ بلوچیءَ شرترین واجھے جؤڑ بیت کنت۔ یے نقطہءِ بیان کنگا رند پدا بہ روین ھما بنداتی گپ، بزان بتل و گالبندانءِ نیمگا کہ آوانءِ بے مانا بیگءِ سرا بژنیگیءِ حبر ظاھر کنگ بیتگ اَت۔
اگر شرّی سرا چارگ بہ بیت گڈا بازین ھنچین بتل دستا کپ کن اَنت کہ زیین بلوچان کار بستگ اَنت۔ البت اگر مروچی آ کارمرز کنگ بہ بنت، گڈا مردم کارمرز کنوکءِ سرا کـَند اَنت۔ چہ ھمے بتلان یکے اِنت "یک جاھلے چل کارگر/کائیگر/کاجگرءِ زؤرا جنت"۔ ھمشیءِ سرا دؤشیگینے منء ولید فکر کنگایان۔ وتی چاگردا چارگایان۔ پدا خیال آیگا اِنت کہ مروچی علم و زانت ھرجاہ باز اِنت، ھر کس وانندہ و سرپد اِنت۔ سیاسی و چاگردی گل یا گلانءِ واھند اَنت۔ یا کمّا چہ کمتر یکے وبیتاکے ضرور ھستش۔ انٹرنٹءِ سرا نشتگ و سرجمین دنیاءَ وتی مؤردانءِ سرا ناچیئنگا اَنت۔
پدا ھم اگر کسے به گشیت کہ بلوچستانءِ ھما ھند و دمگان کہ برق، تلفن نہ رستگ اؤدا جاھل درء کپیت۔ پہ اشانءِ جوابا عرض کنگ ضروری اِنت کہ اؤدا ماشاءاللہ تبلیغی جماعتیان مردمانءِ توکا زانتءِ کشار رؤدینتگ۔ صد حبرا یک حبرے کہ نین توانگرین جاھل ھچ جاہ نہ گواھیت، و داتگین بلوچی بتل بے پکار اِنت؛ پہ اشیءِ بے پکاریءَ من بژنیگان۔
هیچ نظری موجود نیست:
ارسال یک نظر
وتی کلوا چێرا نبیس إت