بلوچی زبانا درس دیوکین فروفسر 'حسن جانان' پاکستانءِ بندیگ

بلوچ ندکار و بلوچستان یونیورسٹیءِ توکا بلوچی زبان وانیئنوکین فروفسر حسن جانان بادینی کہ 25 آگست 2008 چہ وتی وابجاھا پاکستانی چاریگان دستگیر کتگ اَت؛ انگت بندیگ اِنت۔ پاکستانی حالرسینوکین بنجاہ 'اے پی پی'ءِ شنگ کتگین حالءِ ردا حسن جانان سرا کوئٹہ سٹی پولیس اسٹئشن چَکّا بمبے دئور دیگءِ ڈؤبہ اِنت۔

راڈیو گوانک آنلائن حسن جانانءِ دستگیریا وتی چمان گندؤکین شاھدانءِ حبر شنگ کتگ تنت کہ آوانءِ ردا آ بے میار اِنت۔

نوکترین حالان آتکگ کہ واجه بادینی پہ دگہ پنچ رؤچ پولیسا ریمانڈ کتگ؛ بزان تا پنچ رؤچ آئیا جنگ و لٹ کٹ کنگءِ اجازت چه قاضیءِ نیئمگا دیگ بیتگ تا یک نہ یک وڑے آئیا نہ کتگین گناھے کنگا بہ منّین اَنت۔

.

ھمے درگتا بلوچ جھدکاران کوئٹہءِ توکا یک تھرؤزی 'کمپے' جَتـَگ کہ تا پنچ رؤچ برجاہء بیت۔ اِشیءِ تؤکا جنین و مردین بلوچ وانوک نندؤک اَنت۔ چارشنبہءِ رؤچا بازین دوستواہ کمپا آتکگ اَنت و وتی ھمپلی پہ پروفسر حسن جانان بادینی درشان کتگ اَنت۔ بلوچی نیوز