ھنچوش کہ بلوچ مان بازین ھند و دمگ چؤکہ مڈل ایست، سویڈین، ناروے، کنئڈا و امریکاءَ جھدا اَنت و مان آ ملکان وتی پجّارا برجاہ دارگءِ کشا بلوچستانءِ لگتمال و زبھرین مردمانءِ واستا یک نیمگے جاک سلوات کنگا اَنت و آدگہ نیمگا پہ آوانءِ کمکا پنڈ سنڈ کنگا اَنت؛ ھمے پئیما یوکےءِ بلوچ کمیونٹیءَ مدام جھد کتگ کہ وتی راجی ذمواریان ادا بہ کنت۔لس بلوچ مدام گؤن مشکلان دیم پہ دیم بیتگ اَنت۔ بلے گؤستگین چیزے سالان آوانءِ سرا زؤراکی گيئش ترّتگ اَنت۔ گيئشترین زؤراکی چہ ملکانءِ سرکارانءِ نیمگا بیتگ اَنت، بلے لھتے بران قدرت ھم آوانءِ سرا باز مھربان نہ بیتگ۔
امبریگین سالءِ اولسرا بلوچستانءِ بازین دمگ شرتگ، ھئور، ھار و طوفانانءِ آماچ بیتگ تنت۔ خاص میرانی ڈئمءِ تانین آپا کش گوئرءِ بازین میتگ بُک داتگ تنت، و مردمانءِ لؤگ پرؤشتگ و مردم بے لؤگ کتگ تنت۔ پہ تاوانبارانءِ کمکا درین ملکان جاہ منندین بلوچ جھدکارانءِ کتگین کارانءِ بازین حال شمارا وا سر بیتگ اَنت، بلے یکّے پشت کپتگ کہ اشیءِ حال مارا نؤکی سر بیتگ، و بیت کنت کہ دگہ لھتے مردم سھیگ مہ بنت۔ چمشکا ادا چیزے ستر ھمشیءِ باروا ردء بند ديگا ضروری زانین۔
بلوچ کمیونٹی -یوکےءِ سرین جھدکار میرغلامحسین بلوچ وتی شخصی جھدانءِ برکتا په ھمے سیلابءِ آماچان چيزوکے زر سرجم کتگ اَت و دیم داتگ تنت۔ چؤ منین بازین کسان فکر کت کہ میر صاحبا ھم آدگرانءِ ڈئولا لھتے کیسگ آرت، چیزے گونی کـَنـَک یا دوا درمان زرتگ و پہ ضرورتمندان سر کتگ اَنت؛ بلے نہ! میرغلامحسین دیرتر چہ مئے ڈئولینان چارتگ۔ آئی اشیءِ بدلا شئور بستگ کہ اؤدا پہ یک ضرورت مندےءَ لؤگے بہ بندائینیت۔
یے ردا آئی ھندی مردمانءِ راهشونیانءِ پدا پہ بلوچی زبانءِ جھدکار و نامدارین شاعر و ندکار واجہ منظور بسمل لؤگے بندگءِ فیصلہ کتگ۔
ما سهیگ بیت اِنت کہ میر غلامحسین بلوچءِ یے شیرکنین واب پیلو بیتگ و واجہ منظور بسملءِ سرا ساھگے ساھیل کنگا آ سوبین بیتگ۔ پرے کارا بلوچ واجہ غلامحسین بلوچءِ منتّان گرگا تاوان نہ کنت۔ خاص مان برطانیا جاہ منندین بلوچ واجہءِ منتوار اَنت۔ و ھمے ڈئول واجہ منظور بسمل مبارکیءِ لایق اِنت۔ مئے دعا اِنت کہ یے لؤگ پہ واجہءَ بھشتءِ دَروَر بہ بیت و ھمشیءِ ساھگا آ مدام بلوچیءِ خدمتا ساڑی بہ بیت۔
داتگین عکس مان کیئچ اڈ کتگین منظور بسملءِ لؤگے اِنت۔
هیچ نظری موجود نیست:
ارسال یک نظر
وتی کلوا چێرا نبیس إت