شمئے راہ داتگین إیمئلانءِ منتواری

ھر روچ مارا إیمئل رس أنت و گيئشتر چہ آوان مئے کاران ستا دے أنت و پھلّی لوٹ أنت کہ آ بلوچی نبیسگا نزور أنت چمشکا آوانءِ گپ مان فارسی، اردو یا إنگش زبانان أنت۔ پرے خبرا ما شادین کہ مئے إے درّین وانوکان بلوچی وانگ و سرپد بیگا مشکل نیست إنت و ألما گون کموکین جهدا نبیسگ هم هیئل کن أنت۔

چہ ھمے إیمئلان یکے مئے تفتان نامین چاروکےءَ راہ داتگ أت۔ إے بانک یا واجہءَ شکایت کتگ أت کہ ما آئیءِ ویبتاکءِ لنگ مان بلوچی نیوزءَ نہ جتگ وھدے کہ نوک أڈ بیتگین بلوچ نیوزءِ لنک ما رسگا داتگ۔ إے إیمئلءِ وانگا رند ما تفتان ویبلاگ شوھاز کت و در گپت، گندین کہ إے ویبلاگءِ توکا قابل وانگ و چہ آئی چیزے ھیئل کنگا هچ نیست۔

پدا ھم اوپار نہ شـُت و ملا سلیمءِ درگتا شنگ بیتگین یک حالےءِ راست بیگءِ باروا ما نظرے دات۔ دو روچ پر گوَزگا رند گندیں کہ إے نظر شنگ نہ بیتگ۔ إیشیءِ سبب یکّے إیش بیت کنت کہ ما داتگین حالءِ راستی سرا سوال کتگ و ویبتاکءِ واھند نہ لوٹیت کہ آئی داتگین خبر دروغے ظاھر کنگ بہ بیت۔ دومی سبب إے بیت کنت کہ تفتانءِ واھند وتی دستگٹیانءِ سببا پہ مئے نظرءِ شنگ کنگا نہ رستگ أنت۔

گپ إیش إنت کہ بلوچی نیوز یک ھنچنائین و نزورین ویبتاکے اِنت۔ مئے جھد إنت کہ بلوچی زبانءِ نبیسگءِ راهبندانءِ سرا کار بہ کنین۔ کسےءِ سیاستءِ دیما برگ مئے مقصد نہ إنت۔ ألبت ھما جاھان که ما پہ بلوچ راجءَ تاوانبار کنگی چیزے بہ گندین گڈا جھد کنین کہ آئیا پاشک بہ کنین و کمّا چہ کمتر ھمے ڈولین جھدءِ دیما برگا کمک مہ کنین۔ نـَے پہ زانت دروغےءِ شنگ کنگا مئے إیمان مارا إجازت دات۔

آ ویبلاگان کہ ما لنک داتگ أنت، ھما أنت کہ آوانءِ کار ما سالان سال چاران کتگ أنت و سرپدین کہ إیشانءِ کار پہ راجءِ آیندوا شر أنت۔ ما طالبانءِ وڑین سیاستءِ دیما برگا کمک کت نہ کنیں و مارا اُمید إنت که بلوچ ویبتاک نبیسوک و وانوک مارا إے بابتا میاریگ نہ کن أنت۔

.
بلوچ نیوز سک نوک إنت۔ آئی چہ ملکءِ توکا جھد کنگ بندات کتگ۔ آئیءِ أولی پیام کہ مارا سر بوت لایق ستا أت۔ و ما ھمے سرپد بئین کہ إیشیءِ واھند بلوچستانءِ حال و خبران چہ نزیکا چاران کنت و دنیاءِ أوارین کنڈان جاہ منندین بلوچان گون إیمانداری سر إش کنت۔ إے ڈولین جھدکاران ما إحترام کنین و پہ آوانءِ سوبینیءَ دُعا کنین۔

Rights reserved by www.balochinews.com