مغربی بلوچستانءِ بلوچی تاکبند "سھاتو"ءِ أولی تاک۔ چمشانک: ولید گربنی

من ملکءِ ترّ تابا بازین تاکبند و مھتاک دیست۔ بازین بلوچی کتاب ھم مرچان شنگ بیگا أنت۔ ھر نامیین بلوچ ندکار أگر ھچ نہ گڈا یک کتابےءِ واھند إنت۔ بزان آئيءِ شعر و یا نبشتانکانءِ یک کتابے ألّما شنگ بیتگ۔

وھدءِ سرا شنگ بیوکین تاکبند مھتاک سچکان –گوادر، بلوچی کوئٹہ و بلوچی زند أنت۔ إیشانءِ کشا سئے ماھی لھتے تاکبند ھم شنگ بیگا أنت۔ روچتاک "ندائے وطن" که چه کوئٹہ شنگ بيگا إنت؛ أنگت یکین دانگ إنت۔ توار اردو و براھوی زبانانءِ کشا بلوچی شنگ کنت۔ وژنری ھم یک نوکین تاکے إنت کہ اردو و بلوچی زبانان شنگ إبیت۔

چہ إے پھکان لائق چارگ و نام گرگ مغربی بلوچستانءِ بلوچی تاکبند "سھاتو" إنت۔ سھاتوءِ أولی تاک منا وتی ترّ تابءِ گڈی روچان دستا کپت۔ إیشی منا باز دوست بیت۔ نامیین بلوچ ندکارانءِ نبشتانک، چمشانک، آزمانک و شعر إیشیءِ توکا گندگ إبنت۔ هما بهر که تا إے وھدی من ونتگ أنت پیش دارگا أنت کہ إملاءِ حسابا چہ آدگران بھتر وا نہ إنت، بلے إیشیءِ سیاھگ أدبیاتءِ قالبا شر تر کپ أنت۔
سھاتوءِ سیاھگانءِ رد بند بلوچی تر أنت۔ گرامر ھم بلوچی إنت۔ جاہ کیئت کہ إیشیءِ شونکار بلوچیءِ تک و پھناتان سرپد إنت۔ جملوانءِ توکا گالانءِ رد بند پہ وڑ أنت۔ چہ آ دگہ تاکبند چؤ بلوچی، بلوچی زند و سچکانءَ واناکتر إنت۔ داتگین شعر ھم نامیین شاعرانءِ گچینی شعر أنت و لائق وانگا أنت۔

إے تاکبندءِ أولی تاکدیما شنگ کنوک و ندکارانءِ لڑ إنت۔ دومی تاکدیما ندکارانءِ عکس أنت و سئمیءَ شونگال إنت۔ شونگالءِ بنی کــُلہ بلوچی زبانءِ نبشتہ کنگا راھبندءِ نہ بیگءِ سرا إنت۔ چہ إیشی رندترا عبدالحمید إیرانژادہء نبشتانکے کہ بلوچی، کردی و فارسیءِ سیادیء سرا إنت۔ صدانءِ حسابا واجھا گال در چتگ و دیم پہ دیم کتگ أنت۔ دیمتری نبشتانک واجہ غلام حیدر کزوری ئے إنت کہ سرحال ئی "زبان و دودمان" إنت۔ إیشی بلوچی زبان و دودمانءِ سرا یک علمی و سرجمین چمشانکے إنت۔

إسلام و لچہ کاری سرحال سرا أحمد نور بلوچ چہ دارالعلوم حقانیہ –پھرہ سیاھگے نبشتہ کتگ کہ تاکدیم نوزدہ و بیست ئی گپتگ أنت۔ غلام بھارءِ سیاھگ " أدب زیک، مرچی" سئے تاکدیمان شنگ بیتگین گونڈ بلے واناکین نبشتانکے إنت۔ جی آر ملاءِ "چت و چینگ" مولابخش رئیسیءِ "لبزانک و گدارءِ نوکی" کنارکءِ ملا چمّلءِ نبشتانک "بلوچی لبزانک مان روبرکتی بلوچستانءَ"، "بلوچی کار لوٹیت" کہ محمد أکرم حسینبور چہ گـُشت نبشتہ کتگ، واجہ رمضان بامری بلوچءِ "تصوّف" منا أنگت وانگی أنت۔
آزمانک و کسمانک من أنگت نہ وانتگ أنت۔ ھنچو کہ من پیسرا گشتگ أت لھتے وشّین شعر ئي ھم مان۔ ألبت منا چہ پھکان دوستر عبدالحمید أیرانژادءِ دومی نبشتانک " جی آر ملاءِ شاعری" دوست بیت۔ إیشی توکا شاعرءِ شعرانءِ جُھلی پٹاسگ بیتگ و گون دگہ شاعران دیم پہ دیم کنگ بیتگ أنت۔ جی آر ملاءِ شعرانءِ توکا بتلانءِ کارمرزیءِ لھتے مثال ھم ديگ بیتگ أنت۔ پہ درور نبشتہ إنت:
عطا شاد گشیت:

تو نہ دیستہ منی أرسءِ بچکند
کہ دلءِ زیملا افّار گشئے
جی آر ملا گشیت:

منی أرسانءِ سرگواران بہ چار إت
گشے وشین رگام أنت جمبران ئی

سید ھاشمی گشیت:

چو دلـــــوتا نہ بئے گر نیکراھے أنبازئے
چہ زرتشت، چہ بدھا، چہ رامے إیرجیگ
جی آر ملا گشیت:

چے مسیت، چے کلیسا و چے مڑی
واللہ عشقءِ سربتگ ھـــر جاہ تچیت

بلوچی بتل گشیت:

فلانیءِ بینگ مرچان گزّا إنت
جی آر ملا گشیت:

مرگ پہ نزور و بے وسان
آسان چـــو گـزّءِ بینگا إنت

إے سیاھگ واجہ إیرانژاد گون جی آر ملاءِ شعرےءِ چیرا داتگین بندان سرجم کتگ۔

بیبگر و سدو لاشاریءِ لچہ واجہ عبدالرحمان کاروانی پٹ پل کتگ و شنگ کنائینتگ۔ إے شعر تاکدیم 75 تا 77ءَ شنگ إنت۔ عزیز بلوچ مقدمءِ سیاھگ "سید نمیران إنت"، "اُستاد یادگاری" سرگالا کریم باشندہءِ نبشتانک رندتری دو تاکدیمان شنگ إنت۔ پدا بابل ھمرازءِ " دیوان گون غمان" پہ وانوکان کـَـلــَنڈ إنت۔ آ گشیت:
پیشیگین جُستءِ رند پدا
من گون غمان چوش گشت
إینچو چہ من دلگران مہ بئے
لیکان شمارا من وتی
إے ھنـّیگین گپے نہ إنت
سالانءِ سال گوست و شت أنت
مئے و شمئے ھمراھیءَ
دروھان شمارا من چے پیم!

صد گپ یک گپے ھمے بہ گشان کہ "سھاتو" یک واناکین تاکبندے إنت۔ إیشیءِ توکا کمپوزنگءِ ردی سک کم أنت۔ 50 روپیا یا 1000 تمن دانگے پہ إیشی ھچ نہ إنت۔ اُمید بہ کنین کہ إیشی پہ وھد شنگ بہ بیت و ھر تاک ئی چہ پیسریءَ شرتر بہ بنت۔

تاکبند سھاتوءِ شونکارءِ گپّال (إی میل): sahato_dashtyari@yahoo.com

Rights reserved by www.balochinews.com