سوئی و حضدارءَ بمبتراک، دو فوجی کشگ بازین کس ٹپّیگ بوت أنت

مشرقی بلوچستان: سوئیءَ ریموٹ کنٹرول بمبتراکےءَ گئس پائپ تراکینت و راکٹانءِ کپگا دو فوجی کشت۔ حضدارءَ فوجی گاڑییے گوزگءِ درگتا موٹر سائکلءَ پر لچّتگین بمب ترکّ إت۔ یک فوجییے و لھتے راھگوز ٹپـّی بوت۔

بی بی سی و پاکستانی حالجاھان شنگ بیتگین حالان آتکگ کہ سوئیءِ کوھنین بازارا ریموٹ کنٹرول بمبے تراکینگ بوت۔ إیشیءِ سببا فیضو نامین مردمے ٹپّی بوت۔ آنگو 'لوٹی'ءَ چہ چات نمبر ھشت و نمبر دھا دیم پہ پلانٹا گئس بروکین پائپ ھم گون بمبان پروشگ بوت أنت۔ بی آر إےءِ سرباز بلوچءَ پھکین بمب تراک وتی ذموا زرت أنت۔

سرباز بلوچ دیمترا گشت کہ سوئی و نصیر آبادءِ سیمسرا فوجی بنجاھےءِ سرا سرمچاران راکٹ دئور داتگ۔ إیشیءِ سببا دو فوجی کشگ و ھفت ٹپّي بوتگ أنت۔

نوکترین حالے کہ بی بی سی شنگ کتگ گشگا إنت کہ حضدارءَ فوجی ٹرکےءِ گوزگءِ درگتا موٹر سائکلےءَ لچّتگین بمبے ترکـّتگ۔ إیشیءِ سببا ٹرکا سوارین یک فوجییے ٹپّی بوتگ۔ إیشان أبید ھفت راھگوز ھم کموک ٹپّی بوتگ أنت۔ خیال ظاھر کنگ بوتگ کہ ٹپّیانءِ نیاما یکـّے بیڑ بروک وت إنت۔
Rights reserved by www.balochinews.com