لندن (نماینده بلوچی نیوز) سئے ھفتگءِ چست إیرا رند فیض بلوچ و میر خیربیار مریءِ کئس گڈی مرحلوا سر بوت۔ پنچ شنبہ و جمعہءَ سرکاری وکیلا میر خیر بیار مری جرح کت۔ إے روچانءِ لھتے خاصین نقطہ که گشگا أرز أنت چیرا داتگ أنت۔ پنچ شنبہءَ سرکاری وکیلا پیشدارگءِ جھد کت کہ إدا حقانءِ ورگ و قومءِ سرا ظلم بیگءِ هچ کپ نیست إنت. أصلا میر خیربیار مری پنجابیانءِ مخالفے إنت، پمیشا مدام آوان ڈوباریت؛ گڈا میر خیربیار گشت که مئے شاہ (سلیمان داود) کہ یک کسے إنت، إدا (برطانیاءَ) آتکگ و چہ إے ملکا سیاسی پناہ ئی لوٹتگ، درخواست ئی رَد کنگ بوتگ؛ ما دیم په وتی ملکا ھزاران کسانءِ رُنب کنگءِ خلافا گپ کنین، ٹرورسٹ گشگ بیگا إنت!
یک دگه جاھےءَ سرکاری وکیلا گشت کہ شمئے جنگ پہ شمئے وتی جندءِ سیتانءِ رکـّینگا إنت، إدا راجی حق و إنصافءِ جنگ هچ نیست! میر مری درّائینت کہ منی پتا نیم عمر بندیگجاھان گوازینتگ، مئے چک ٹرورسٹ حساب بیگا أنت و براتے کشگ بوتگ و آدگہ گون خطران دیم پہ دیم أنت؛ إدا مارا شخصی فایدہ چے رسيت!
جمعہءَ کورٹءِ دیما خبر ظاھر کنگ بوت کہ میر خیر بیار مری دستگیر بیگا رند سئے روچءِ تھا پنچ رندا پولیسا چست پرس کتگ۔ إے پنچین رندان لھتے جستانءِ پسوا میرءَ هچ نه داتگ أنت۔
سرکاری وکیلا چه میر مری جست کت کہ آئیا پرچا جستانءِ پسّو نه داتگ أنت! میر مری گشت کہ چہ منی دستگیریا پیسر، مارچ 2007ءَ برطانیاءِ حالتاکان سیاھگے شنگ بیتگ أت کہ پاکستان چہ برطانیاءَ 8 بلوچ جهدکارانءِ دستگیریءِ لوٹا کنگا إنت۔ پدا منی براتے مان دبئی دستگیر کنگ بیتگ أت، رندترا براتے شھید کنگ بوت۔ آنگو چہ پاکستانءَ منا تچکا بیمتراپ رستگ أت کہ وتی خیالا گوَر بہ کنان۔ إیش پھک سبب بوتگ أنت کہ من بہ ترسان کہ پولیس منا پاکستانءِ دستا دات۔ ھمے ترسا گون ھمرد من وتی وکیلءِ سوج گپتگ أنت و ھچ نہ گشتگ۔
وھدے سرکاری وکیلا گشت کہ تو زانتگ ترا دستگیر کن أنت، پمیشا تو لھتے شاھدی پیسرا گار یا خراب کتگ أنت!میر مری گشت که آئیا بیم تراب رستگ، حالتاکان ھم نبشتہ کنگ بوتگ کہ پاکستان منا لوٹوک بوتگ، بلے من دلجم بیتگان کہ برطانیا یک جمھوری ملکے و إدا إنسانی حق لگتمال نہ بنت۔ و من چشین ردییے نہ کتگ کہ آئیءِ نشانیان گار بہ کنان۔
جمعہءِ کورٹءَ خلاص کنگءِ جارا جنگا پیسر قاضیا سرکچ دات کہ پدا دیمی دوشنبہءَ کورٹ نندیت و پولیسا گشتگین میر خیربیار مریءِ خبر وانگ إبنت۔ چہ إیشی رند سرکاری وکیل وتی گپان سرجم کنت و گڈی خیالان درشان کنت۔ پدا فیض بلوچءِ وکیل وتی گڈی خیالان گشیت و گڈسرا میر خیربیار مریءِ وکیل وتی گپان سرجم کنت۔ پدا جیوری پہ شوربندیا راہ دیگ إبیت تا فیصلہ بہ کنت۔ إے حسابا کئس دگہ دوھفتگ دراجکش بیت کنت۔
Rights reserved by www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت