برطانیاءِ درملکی جاورانءِ وزیر 'ڈیوڈ ملی بنڈ' گشت کہ ٹرورزمءِ خلافا جنگی راھبندان دوارچاریءِ ضرورت إنت۔ پہ 'گارڈین' حالتاکا وتی نظران درشان کنگءِ درگتا آئی نبشتہ کت کہ 9/11ءَ بڈے سال پر گوَزگا پد نین مردما ٹرورزمءِ خلافا کتگین کارانءِ سرا بنردی دوارچاریءِ ضرورت مارگ پکار إنت۔ملی بنڈ نبشتہ کت "چہ 9/11 دیم پہ إنگو 'وار آن ٹئرور' گالبندا بازین درس مردمان داتگ و سرپدی رستگ کہ ٹروزمءِ خلافا تپاک بیگ و إشتاپی کار کنگ ضروری إنت، و ھمودا کہ زور کارمرز کنگی إنت ھم بہ بیت؛ ألبت إے گالبندءِ بنی لوٹ رد سرکچ ورگ بیگا إنت و مردمان گسر کنگا إنت۔ راستے، پہ ٹرورزمءِ روتگان برّگا مارا وتی سرجمین وسیلہ کارمرز کنگی أنت۔ جست إیش إنت کہ چونـَکا؟"
ملی بنڈ نبشت "'وار آن ٹئرور'ءِ گپ کہ بوت مردم ھمے سرپد بوت أنت کہ دنیاءَ ألقائدہ و اُسامہ بن لادنءِ خلافا یکجاہ بیگی إنت۔ راستی چوش إنت کہ ھر ٹرورسٹ ٹولیءِ لوٹ و پجّار چہ آدگرا دگہ پیما أنت۔ لشکر طیبہ پاکستانءَ إنت، بلے گشیت پہ کمشیرءَ جنگا إنت، حزب اللہ پہ 'گولان ھائٹ'ءَ جنگا إنت، عراقءِ تھا جنگا دستگٹین شیعہ و سنیانءِ وتی وتی ھزاران لوٹ أنت۔
1970ءِ دھرا مان یورپ 'آئی آر إے، بادرمینوف و إٹا' زرمبش بوتگ أنت کہ ٹرورسٹی راھبند إش کارمرز کتگ أنت، و باز بران گون یکـّا دگرا ھورکاری إش ھم کتگ، ألبت آوانءِ مقصد یک نہ بوتگ أنت، ھورکاری إش پہ وتی وتی ھداروکی فایدوان بوتگ؛ مروچی ھم ھمے وڑا بیگا إنت"۔
ملی بنڈءِ خیالا " ھمنچو گيئشتر ما ٹرورسٹ ٹولیان مُچ بہ کنین و آوانءِ نیاما شر و گندہ گیشینان بہ کنین، گڈا بزان کہ ما ھماوانءِ مقصدان دیما برگا بیین و گون یکا دگرا آوان نزیکتر آرگا بیین۔ پمیشا باید ٹرورزمءِ روتگ گوَجگ بہ بنت؛ سلاح و زر رسینگءِ راہ بندگ بہ بنت، آوانءِ بٹاکانءِ بُن ٹـُگ کنگ بہ بیت و إیشانءِ رندگری کنوک دیم پہ جمھوری سیاستا تِھلانک دیگ بہ بنت"۔
وتی سیاھگا واجہ ملی بنڈ یک جاھے سرکچ دیگا إنت "ٹرورزمءِ جواب قانونءِ بالادستی إنت، نے کہ لگتمالی۔ پرچا کہ جمھوری چاگردان تچکین راھا داروک قانون إنت۔ ما باید إنسانی حق و مردمانءِ آزادیءِ خبران مان وتی ملک و در ملکان یک ڈولا بہ کنین۔ 'گوانتانامو'ءَ بندگءِ باروا 'باراک اوباما'ءِ واھگا چہ مئے نیمگا پلانگری زیرگءِ سبب ھم ھمیش إنت"۔
گڈسرا ملی بنڈ چؤ بنشتہ کتگ "ٹرورزمءِ خلافا جنگ'ءِ گوانک یک ھنچین گوانکے أت کہ گشگا أت لانکا بند إت، سرجمیا ھؤر بہ بے إت و وتی یکـّین دشمنا بہ جن إت. باید چوش مه بیتین أت۔ مئے تپاکیءِ بن ھشت إے خبرءِ سرا إیر بیتین أت کہ ما کے ئین و مئے أرزش چنچو یک وڑ أنت، نے کہ ما بہ چارین کہ ما کے ئی خلافا ئین۔ ٹرورسٹ ھما وھدی سوبین زانگ إبنت وھدے ملک چہ آوان بہ ترس أنت و پہ بیئڑ گرگا جنگا به لانکار أنت"۔
Rights reserved by www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت