جمعہ 23 جنوری، 09 نمایندہ بلوچی نیوز: مروچی بــِلمارش کراؤن کورٹ لندنءَ فیض بلوچ و میرخیر بیار مریءِ خلافا ثبت کتگيں کئساںءِ ردا میر خیر بیار مریءِ وکیلا وتی دلیل سرجم کت أنت و پدا کئسءِ گچینی نقطواں قاضی بیاں کنگا لگـّّت۔ و جیوریءِ باسک ئی نقطہ پہ نقطہ سوج دات أنت۔أولسرا چہ دوئیں کسانءِ لوگاں پولیسءَ دستا کپتگیں شاھدی قاضیا بیاں کت أنت۔ پدا ماں 'پراگ' چہ یک لوگےءَ رستگیں چیزانءِ نام گرگ بیت۔ سرجمیں رستگیں شاھدیانءِ نیاما بازیں موبائل ٹلفن، لھتے کمپوٹر، یک ٹارگٹ لسٹے کہ إیشیءِ توکا لھتے سریں مردمانءِ نام ھؤر بیتگ أنت و سلاحانءِ یک لسٹے گوں بیتگ۔ إیشاں أبید یک 'سی ڈی' یے کہ آئیءِ تھا گوریلا جنگءِ سر سوج ماں بیتگ أنت ھم پولیسا دستا کپتگ۔
لائق گشگی گپ کہ جیوریءِ دلگوش قاضیا آئیءِ نیمگا ترّینت إیش أت کہ چہ 'ٹارگٹ لسٹ'ءِ مردماں چار کسانءِ سرا بیڑ برگ بیتگ۔ ألبت لسٹ باروا میر خیر بیار مری گشتہ بیتگ کہ إیشی چہ بلوچستانءَ آئیءِ سرا راہ دیگ بیتگ۔ آئی وت أڈ نہ کتگ و نے کہ لسٹ ئی حسابا آرتگ۔ پمیشا چارگا رند وتی أنبارا گوں دگہ بے پکاریں چیزاں دئور ئی داتگ۔
دیمترا ویبسائٹانءِ نام ھم آتک أنت و قاضیا سرکچ دات کہ جیوری باید خیال گور بہ کنت کہ باریں ویبسائٹانءِ مقصد سرپدی دیگ بیتگ یا مردماں جنگ کنگءِ سکین دیگ بیتگ۔
أخباری بیانانءِ ردا جیوری ترانگ دیگ بیت کہ میر خیربیار مری وت گشتگ کہ بیاں ماں بلوچستانءَ نندوکیں ورنایاں آئیءِ ناما داتگ أنت۔ و ھمودا حالتاکاں شنگ بیتگ أنت، نے کہ ماں برطانیا۔
ٹرورزمءِ جندءِ باروا سرکچ دیگءِ درگتا قاضیا گشت کہ مردمانءِ توکا آوانءِ کشگ بیگءِ بیم دئور دیگ، سرکاری مڈیانءِ سرا بیڑ برگ و آوان تاوان دیگ ٹرورسٹی کار حساب إبنت۔
إدا مزنتریں جُست کہ 'پبلک گارلری'ءَ نندوکیں أستمانءِ وت ماں وتی گپانءِ تها چست بوت إیش أت کہ آیوکیں دوشنبہءَ وھدے قاضی وتی گپاں دیمترا بارت، باریں آ بلوچستانءِ گئس پائپاں سرکاری مڈی لیکیت یا إے راستیا جیوریءِ دیما تچک کنت کہ آ بلوچانءِ وتی أنت کہ چہ آوانءِ سرڈگارا درکنگ و دگہ صوبواں برگ بیگا بیتگ أنت۔ چہ بلوچستانءَ در کنگ بیوکیں گئسءِ بھاءِ بیلیناں روپیا مرکزی سرکارا أنگت پر أنت!
چہ قاضیءِ گپاں پیسر میر خیربیار مریء وکیلا زی بیگاھا بندات کتگیں وتی گپ سرجم کتگ أنت۔ زی وھدے وکیلا وتی خبر بندات کتگ إتنت، جیوری ئی سرکچ داتگ أت کہ ثبت کتگیں کئسانءِ بحث سرجمیا دو ویبسائٹانءِ بحث أت۔ إے سائٹانءِ تھا ماں دگہ جاھاں شنگ بیتگیں حال چنگ و لچّینگ بیتگ أنت۔
وکیلا گشت کہ أگر میر خیر بیار مری بس وتی و وتی کھولءِ سیت بہ چارتین أنت، گڈا مروچی أماراتءِ شیخانءِ ڈولا سیر سراگاہ بیتگ أت، بلے چوش نہ أنت؛ "ما گندگائیں کہ آئیا وتی براتے چہ دستا داتگ۔ کماشیں پت ئی چہ وت دیر إنت۔ کھولءِ ھر باسک جاھے کپتگ. پاکستان په آوانءِ گرگ و جنگا تکانسر إنت"۔
سلاحانءِ لسٹءِ باروا وکیلا جیوری سرکچ دات کہ إے سلاح چہ پاکستانءَ رس أنت، پہ وتی دفاعا ھمودا نندوکیں بلوچ إیشاں زیرگا أنت، چے ضرورت إنت کہ خیربیار مری ماں لندن بہ یئت و سلاحانءِ سوداءَ بہ جنت! ھمے خاطرا لسٹا ھچ أھمیت نیست إنت۔
پنچ شنبہءَ واجه مریءِ وکیلا بلوچستانءِ جیڑہ سرکچ دات کہ بلوچ ٹرورسٹ نہ أنت؛ پہ وتی دفاعا جنگا أنت۔ پمیشا إیشانءِ دستگیریءَ گون ٹرورزمءَ ھچ رشتگ نیست إنت۔ ألبت برطانیا و أمریکائیاں پہ مشرفءِ راضی کنگا دوئیں کس دستگیر کنائینتگ أنت تا إیشاں راشد رؤفءِ بدلا پاکستانءَ بہ دے أنت۔
جعمہءِ روچا بازیں بلوچ کورٹءِ تھا ماں 'پبلک گالری'ءَ نندوک إتنت۔ بلوچ یومن رائٹس کونسلءِ لیڈر واجہ صمد بلوچ و میر غلامحسین إیشانءِ نیاما گون إتنت۔
قاضی وتی گپاں دوشنبہء روچا دیما بارت۔
Rights reserved by www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت