أوگانستان و بلوچستان‏ءِ إلحاق؛ أچ آیندوا حالے. قصّه ساچ: ولید گربنی

مختنفیں ٹک و ٹولیانءِ نیاما کشت کوشءِ کٹینگا و إیمنی آرگا ناکام بیگا رند وھدے 4 جولائی 2021ءَ أمریکائی أچ أوگانستانءَ در بوت أنت، اودا په إیمنی آرگ و برجاہ دارگا بلوچستانءِ گوَرا أبید أچ تها پترگا دگھ درے پشت نھ کپتگ أت۔ پمیشا بلوچ فوج ماں أوگانستانءَ پترت أنت۔

بلوچستانءِ آ وھدیگیں وزیر أعظم بانک بانڑی بلوچءَ ٹکـّا گشتگ أت کھ بلوچ سرکارءِ نیمگا فوجا دیم دیگءِ مقصد أوگانستانءَ وتی غلام دارگ نھ أت. بلوچستانی فوجءِ لؤٹ اوداں ماں ٹک و ٹولیانءِ نیاما إیمنی آرگا أچ رند وانگ و زانگ، إنسانگری، سیاسی بیداری، معاشی و معاشرتی سرپدی، و یک لبرل چاگردے ٹاھینگ أت کھ آئی توکا اؤدءِ پھکیں ٹک یکا دگرءِ قدر و عزت ءَ به کن أنت۔ ھوریا بلوچستانءَ لؤٹ إت کہ إنفراسٹرکچرسازی به کنت تا اؤدءِ قوم چہ دگنیاءِ نؤکتریں وسیلواں سوبمند به بنت۔

آ وھدی ھچ کسا گشت نھ کت کھ باریں بلوچانءِ وھد و واک ھم چؤکہ روس و أمریکائیاں زوال إبنت یا ھما کامیابی کھ بلوچ فوجا ماں سعودی جمھوریوا گوں آ ملک ءِ شورشیانءِ کنٹرول کنگا رستگ أت؛ أوگانستانءَ ھم ھما وڑا سوبین إبنت۔
ترانگ به کپ إت کھ سعودی بادشاھیءِ پروش دیگا پد اودءِ أولی جمھوری سرکار تا یک دراجیں مدّتےءَ گوں ملایاں گرچیلا أت۔ گڈا بلوچستانءَ وتی فوج دیم دات و جاھے گوں سیاست وگپ تراں و جاھے پھ زور ملا ماں جمھوری پڑا آرت أنت۔ بلوچانءِ منّتا مروچی سعودی أچ دگنیاءِ کامیابتریں جمھوری ملکاں یکّے حساب بیگا إنت۔

أچ بیست سالءِ دردسر و دلسیاھیا رند أوگانستانءَ ھنوں بلوچ وتی مقصدا رستگ تنت و أوگانستان إش یک کامیابیں ملکے جؤڑ کتگ أت۔ نیں اؤدءِ مخلوقءِ تؤکا فکری دیمرئی آتکگ أت۔ وت مان وتی ھر پیمیں إختلافاں گوں گپ تراں ٹھینگا إتنت۔ بلوچانءِ برکتا ملک إش أچ ھنّوگیں دئورءِ ھر ڈولیں آسراتیان بھرمند أت۔ جنین و مردیں آدم بروبریءَ أچ بلوچانءِ داتگیں وانگ زانگی سھولتاں سؤب چست کنگا إتنت۔ ملکءِ دیمرئیا جنین و مردیں ھوریا زحمت کشّگا إتنت۔ تمامیں أوگانی راج؛ ھزارہ، تاجک، ازبک و پٹان وتی ریاستانی توکا وت واجه إتنت-

گش أنت 'مارءِ وارتگیں أچ سادا ھم ترسیت'. ھمے حال أوگانانے أت۔ آواں ترس أت کھ چؤ مه بیت أچ بلوچانءِ درکپگا رند آ پدا گوں یکادگر گرچیل به بنت۔ پمشکا بازین سیاسی أوگاناں گوں بلوچستان إلحاقیءِ لؤٹ کتگ أت۔ إے درگتا بلوچستانءِ سرکارءَ لازمی لیک إت کھ پٹ پل به کنت۔ أچ زنڈیں مدتےءِ پٹّاسگ و چکّاسگا پد رفرانڈم برجاہ دارگ بوتگ أت۔ اودءِ بلوچ وا پیسرا گوں وتی مزن زمینا ھؤر بوتگ إتنت؛ آ دگھ راجانءِ نیاما ھزارواں 99٪ ، تاجکاں 81٪ ، اُزبکاں 69٪ و پٹانانءِ 58 ٪ ءَ بلوچستانءِ هور بیگءِ لوٹءِ پلانگری زرتگ أت۔ ھمے ڈولا أوگانستان ماں بلوچستانءَ ضم بوت۔

31 جنوری 2041ءَ بلوچستانءِ نوکیں مزن وزیر واجھ سربازیءَ بلوچستانءِ دارالحکومت "نیمروز" ءَ گوں إلحاقی مچیا ماں وتی ترا نا گشت " راجدپتر شاھد إنت کھ بلوچستانءِ مخلوقا أچ وتی آجوئیءِ روچا دیم پھ إنگو په دگنیاءِ بنیادمانءِ گھبودی و دیمرئیا وتی إنسانی کرد أدا کتگ۔ ھمے إنساندوستیءِ برورد إنت کھ مرچی بلوچ أوگانستانءِ وڑیں پدمنتگ و بھربانگیں راجانی نیاما إنسانگریءِ تخما کشگا سوبین بیتگ أنت۔ نینکھ أوگانستانءِ راج گوں یکادگر ألکاپیں إنسانانءِ ڈولا زند گوازینگا أنت؛ منی خیالا بلوچاں ھم گونایاں نزّیگی کنگ گران نه کپیت۔"

واجھ سربازی گیش کت " من ألـّماں کھ نوکیں بلوچستانءِ سرجمیں راج شادہ تر إبنت و بلوچستان پیسری ڈولا یک آبادیں ملکے مانیت۔ إے آبادیءِ بروردا ملکءِ پھکیں مردم بروبریا ور أنت۔"

Rights reserved by www.balochinews.com