زاھدان بمب ویڈیو -انگریزی توار

بلوچ رپبلکن إسٹوڈنٹس آرگنائزئشنءَ ظاھری دات

شنبه 30 مئے‏ءَ کوئٹہ پرئس کلبءِ دیما بلوچ رپبلکن إسٹوڈنٹس آرگنائزئشنءِ جھدکاراں ظاھری دات۔ ظاھریءِ مقصد بلوچ بندیگانءِ آزادیءِ لؤٹا دیما برگ أت۔

تنظیمءِ جھدکار گلزار بلوچ، عطاءُاللہ بلوچ و کوئٹہءِ صدر نعیم قمبرانی ظاھری دیوکانءِ دیما تران کت و گشت "ھما نواب و سردار کہ ھنونیں سرکارءِ ھمراہ أنت، ما آواں شئور دییں کہ سرکاریا یلہ بہ دی أنت و گوں ما ھمراہ بہ بنت"۔

آواں گشت کہ أگر بندیگ یلہ دیگ و گاریں بلوچ درگیجگ نہ بیت أنت، گڈا إے ناروائیانءِ ذموار سرکارا ھمراھیں سردار و نواب إبنت۔

روچتاک توارءِ ردا گشتانک دیوکاں 'بی إن پی -مینگل'ءِ ثناءُاللہ بلوچ ھم إیرجتگ۔ پرچاکہ آئیا میر خیربیار مریءِ خلافا بی إل إےءِ راھشون بیگءِ بیان داتگ أت۔ وتا بلوچ گشوکیں إے مرد‏ءِ دپا راجی راھدربر میر خیربیار مریءِ خلافا ناروائیں بیان سرا دلپدردی درشان کنگ بوت۔

ظاھریا بھر زیروکاں پاکستانی سرکار، چاریگ و سلاحبندیں واکدارانءِ خلافا، و بلوچستانءِ آزادیءِ پلانگریا دانک کوکـّار کـُت أنت۔
Rights reserved by www.balochinews.com

نواب یوسف عزیز مگسیءِ بیرانیءِ 74 می سالروچ مرچی إنت

نواب یوسف عزیز مگسی کہ بلوچ سیاستءِ بنھشتا سائنسی راھبندےءِ إیر کنوکیں أولی سیاستکار أت، 1935ءَ مرچییں روچا ماں کوئٹہ بیران بوتگ أت۔ 1901 ودی بیتگیں إے بلوچ نوابا نوکی 34 سال أت کہ یک بیمناکیں زمین چنڈےءِ آماچ بوت۔

مشرقی بلوچستانءِ بنجاھی شھر کوئٹہءَ 31 مئے 1935ءَ شپءِ کلاک 3:30ءَ یک سئے دمانی دراجکشین زمین چنڈےءِ سببا 40،000 مردم کشگ بیتگ إتنت۔ زمین چنڈا کوئٹہ و چپ چاگرد تاکہ 200 کلومیٹر دیر سر چیر کتگ أت۔

آ زمانگا کوئٹہ إنگریزانءِ دستا بیتگ و اودا نادینتگین إنگریز فوجءِ بازین مردم ھم کشگ بیتگ إتنت۔ کوئٹہءِ سرجمین مردمی آبادی 50،000 بیتگ۔ إے حسابءِ ردا إیوکا 10،000 مردم پشت کپته بیتگ أنت۔ زمین چنڈا نامیین بلوچ راجی سیاستکار نواب یوسف مگسی ھم زوال کت۔

نواب مگسی سیاستکارے بیگءِ کشا زنڈیں لبزانکی پؤلکارے بیتگ و آئیا بلوچیءَ شاعری ھم کتہ بیتگ۔

سنگت أکاڈمی بلوچستان و أکادمی أدبیاتءِ ھورکاریا إے نامداریں بلوچ ھستی باروا یک دیوانے مرچی بیگاہ کلاک 5ءَ ماں 'إدارہ أدبیات آڈیٹوریم' کوئٹہءَ برجم دارگ بیگا إنت۔ إے دیوانا بلوچ شھزانت داکٹر تاج محمد بریسی لکچرے دات و پدا میر مگسیءِ کارکردانءِ سرا دگہ مردم تران کن أنت۔
Rights reserved by www.balochinews.com

جندا۔۔۔ءِ کارکرد راجپھازاں نِگـوَم کنگا أنت۔ چمشانک: ولید گربنی

زاھدانءَ جوڑ بیتگیں 'أمیرالمومنین علی إبن أبی طالب' شیعوی مسیتا عشاءِ نمازءِ درگتا پنچشنبہ 28 مئے 2009ءَ جانفدا بیڑے برگ بوت۔ إیشیءِ سببا 25 کس کشگ و دگہ بازیں ٹپـّی بوت أنت۔ لھتے جاگھاں مرتگیں مردمانءِ حساب 130 ظاھر کنگ بیتگ، ألبت إیشی أندازوے إنت۔ مرتگ و ٹپـّیانءِ حساب ھرچے بہ بیت، بیڑ بروک وتی مقصدا سوبین بیتگ؛ ألـّما آئیءِ مقصد باز مردم کشگ نہ بیتگ۔
ھمے بیڑءِ سئمی روچا إیرانی واکاں سئے بلوچ درتک أنت و ثابت کہ مردمانءِ کشگ و کوشارینگا آواں ھچ گـَـرَز نہ بیت۔

إے جانفدا بیڑا بروک حافظ عبدالخالق ملازھی نامینے بیتگ کہ عبدالمالک ریگیءِ ٹولی جندا۔۔۔ راھی کتہ بیتگ۔ عبدالمالکءِ ٹولیا وتی بیانےءَ نبشتہ کتگ "۔۔۔ عبدالخالق ملازھیءَ ھما درگتا وتا بستگیں بمب تراکینتگ کہ بسیجی ماں وتی بجاہ 'علی إبن أبی طالب'ءِ تھا حضرت عمر رضی۔۔۔ءَ بد بلاہ کنگا بیتگ أنت۔ بی بی فاطمہ رضی۔۔۔ءِ بیرانی سالروچءِ درگتا شیعواں وتی دیوان برجم داشتہ بیتگ۔۔۔"۔

بیانءِ وانگا پد و چدا پیسر شنگ بیتگیں جندا۔۔۔ءِ بیانانءِ ترانگا کپگ مردمانءِ دیما راستییے ألکاپیا درا کنت کہ جندا... وتی جهدءِ تها شہ راجیا گيئشتر مذھبءِ ناما پیئشدارگا إنت۔ پمیشا جدا۔۔۔ گوں وتی سلاحبندیں کارکرداں بلوچ راجپھازاں مدام مشکلیں جاورانءِ دیمپان و نِگوَم کنگا إنت۔ پہ راجپھازاں سک مشکل إنت کہ آ جندا۔۔۔ءِ کتگیں لھتے کاراں ستا بہ دے أنت یا إیر بہ جن أنت! بے توار بیگ وا سکّ إنت. پرچاکہ شہ بیڑ بروکا بہ گر تانکہ بیڑءِ آماچ پھک بنیادم أنت۔ خاص جندا۔۔۔ءِ وتی باسک أگر زوال بہ بنت، شہ بلوچانءِ جندا رو أنت۔

راستے إنت کہ کـُشگ بیتگینانءِ نیاما باز ھنچیں مردم بوت کن أنت کہ آواں وتی دست گوں بلوچءِ خوناں ھنّی کتگ أنت و وتی لاپ گوں بلوچءِ وارتگیں حقاں رودینتگ، و زنڈ کتگ أنت۔ ألبت مردم بہ چاریت باریں بلوچءِ خون ھنچوش أرزان إنت کہ آ پہ چشیں مردمانءِ کشگا مذھبی فرقوانءِ ناما ندر بہ بیت! إیشیءِ پسّوا ھر کس وتی وڑا دات۔

ھمے بیڑءِ سرا تبصرہ کنگءِ درگتا نامدارین بلوچ جھدکار و کوّاس واجہ محمد کریم بلوچءَ وتی سیاھگےءِ بندات چؤش کتگ "هزاران سلام شهید حافظ عبدالخالق ملازهی ءِ پاکین روحا که کٹرین شیعہ؛ خاص گنوکین زابلی ئی پیش داشت أنت که بلوچ گلزمینءِ سرمچاریں پسّگ ڈنیانءِ لولوک کُـدان و إیمن و دلجم ترین جاگهاں سرا یورش برگا شر زان أنت"۔

مغربی بلوچستانءِ سنـّیانءِ کلانتریں مسیتءِ بُنپان مولوی عبدالحمیدءَ رَسَگا بیان دات و جانفدا بیڑ ئی إیر جت۔ ساریا مولویءِ ھر بیانا وتی ویبجاہ و ویبتاکانءِ براہ کنوکیں سیاسی گل و جھدکار أناگتا برگشت أنت۔ 'آژانس خبری تفتان' و 'بلوچستانءِ راجی زرمبش -إیران' کہ گوں جنداللہ ھمتوار أنت؛ جندا۔۔۔ءَ إیر جنگءِ بیان إش شنگ نہ کت۔ چدا ساری 'تفتان' و 'زرمبش' ھردواں وتا سنـّیانءِ گوانکو ظاھر کته بیتگ۔ نیں أناگتا إیشانءِ دیما مولوی صاحب شہ دینداریا دراتک، سربتگ ترّ إت و سنیانءِ راھبند ئی شموشت أنت۔ حدیث و قرانی آیانءِ رجانک و مقصداں عبدالمالک ریگی پھتہ تر بیت۔ پمیشا نیں مولوی عبدالحمید دلءِ کرّا شـُت و عبدالمالک ریگی دلءِ پل جؤڑ بوت۔

ما بہ چاریں مولویءَ آخر کجا کفر کت کہ أناگتا جندا۔۔۔ و جندا۔۔۔ءِ پلانگری زیروکانءِ ڈوبارگانءِ دیمپان بوت و دگہ بازیں کسانءِ چمانءِ دیہ! عبدالحمید زییں جعمہءِ 'خطابا' درّائینت " زی ماں علی إبن أبی طالب مسیتا مجرمی کارے کہ کنگ بیتگ و إیشیءِ سببا مئے لھتے مسلمان برات شھید بیتگ أنت، إیشی دشمنانءِ کارکرد إنت۔ مقصد ئی ریاستءِ توکا نفرت پیم کنگ و نا أمنی آرگ إنت۔۔۔ ھما کساں کہ إے کار کتگ، کوردل وحشی أنت کہ گوں بنیادماں ھچ سیادی إش نیست إنت۔۔۔ مئے شیعہ برات بہ زان أنت کہ ما سک پہ دردیں و إے وڑیں مردمانءِ خلافا شہ شیعواں پیسر ما وت چست بییں۔۔۔"

إدا پہ ھنچنائیں مردماں یک چیزے درا إبیت کہ جندا۔۔۔ءِ سروک إسلامءِ گپا جنگا إنت۔ بلے إسلامءِ راھبنداں پؤہ نہ إنت۔ پرچاکہ ھر کس زانت شہ عبدالمالک ریگیءَ گیئشتر عبدالحمیدءَ إسلام دربرتگ۔ پمیشا مرچی عبدالحمید إیرانءِ سنـّیانءِ نمایندہ زانگ إبیت، بلے پہ وتی خبرءِ منـّینگا عبدالمالک وتی مردمانءِ کوشارینگا مجبور إنت۔ مردم إنچو ھم پوہ أنت کہ شیعواں کافر گشوکیں عبدالمالک ریگیءِ لیکوانءِ چپ إسلامءِ بُنجاہ مکـّہ معظمہ، مدینہ منورہ و مصرءِ ألاضھر بنجاھانءِ عالم شیعواں مسلمان منـّگا أنت۔

إے خبرانءِ درشان کنگءِ ھوریا منـّگ ضروری إنت کہ ھچ بلوچ شہ عبدالمالکءِ مارشتاں شموشکار نہ إنت۔ ھر سرپدیں مردم شرّی سرا پوہ إنت کہ بلوچءِ سرا إیرانی سرکار زوراکی کنت، مذھبءِ ناما، قومءِ ناما، کم وانندویءِ ناما، شپوکیءِ ناما، ڈرگ بھا کنوک و دگہ بازیں ناماں بلوچ لٹ کٹ بیگا أنت، کشگ بیگا أنت، بندیگ و درنجگ بیگا أنت۔ بلے ضروری نہ أنت کہ ملا نصرالدینءِ وڑا عبدالمالک ریگی شہ پشیءِ ترسا بٹاگءِ ناما جگر بھا بہ کنت۔ بلوچءِ ناما گيئشتر بلوچ گوں ریگی ھمکوپگ بی أنت۔ و آئیءِ جھد پہ بلوچانءِ حقاں شرتر دیم پہ سوبینا رئوت۔ تاریخ ھم قومی جنزءِ دیما برگءِ برکتا عبدالمالک ریگیءَ شرتریں مقامے دات۔
Rights reserved by www.balochinews.com

ایرانی واکاں پنچشنبہء بمبتراکء ڈوبوا 3 بلوچ مرچی درتک انت

إیرانءِ سرکاری حالجاہ إرناءَ شنگ کتگیں حالےءِ ردا شنبہ 30 مئے 2009ءِ صحبءِ کلاک 6ءَ سئے کس ماں زاھدان درنجگ بوت أنت۔ إے سئیں بلوچانءِ نام حاجی نوتی زھی چکء إسماعیل، غلام رسول شاھو زھی چکء أغوان و زبیح اللہ ناروئی چکءِ رسول ظاھر کنگ بیتگ أنت۔

سرکاری واکدار إبراھیم حمیدی إیشانءِ باروا گشت کہ إے سئیں کس نشوی درمانءِ سوداگر بیتگ أنت و ھمیشاں بمبتراکءِ شورہ ماں زاھدان سر کتگ، و أصلی ٹرورسٹا داتگ أنت۔ آئی گیئش کت کہ إے سئیں کس شہ بمبتراکا چیزے روچ ساری دستگیر کنگ بیتگ أنت۔

إیشانءِ میار 'خدائی سرڈگار'ءِ سرا فساد و ملکءِ إیمنیا خراب کنگ نبشته أنت و إبراھیم حمیدیءِ ردا سی کلاکانءِ تها إیشانءِ سرا ثبت بیتگیں کئسءِ فیصلہ کنگ بیتگ۔
Rights reserved by www.balochinews.com

پولیس بنجاہءِ سرا حملوا رند ھشت کس ماں مند دستگیر بوت أنت

جمعہءِ روچا ماں مند بیتگیں جیڑوءِ باروا رستگیں حالان ظاھر کنگ بیتگ کہ وھدے سرکاری واکاں بازارءِ پشتگورا ٹالیں بلوچستانءِ بیرق إیر گپتگ، گڈا بازیں مردم زھر گپتگ أنت۔ لھتے کساں ھندی پولیس بنجاہءِ سرا تیر گواری کتگ و یک بمبے ھم ترکـّتگ۔ ھمے بمبتراکءِ سببا یک پولیسے کشگ و دگرے ٹپـّی بیتگ۔ ھر دوئیں پولیس گومازیءِ جاھمنند بیتگ أنت۔ شہ إیشی رند سرکاری واکاں شہ مند ھشت کس دستگیر کتگ أنت و پہ جست پرسا دیم پہ تربت راھی کتگ أنت۔
Rights reserved by www.balochinews.com

ھر کس سر وت بی إن إفءِ ناما بیان مہ دات، بنجاھی دیوانءِ فیصلہ

بلوچ نشنل فرنٹءِ بنجاھی دیوان أنور أڈوکئٹءِ پاگواجھیا برجم دارگ بوت۔ دیوانا بی إن إمءِ صدر عصا ظفر، بی آر پیءِ داکٹر بشیر عظیم، بی إس اوءِ زاھد بلوچ، بی آر سیءِ عبدالوھاب بلوچ و بی ڈبلیو إمءِ میر قادر بلوچءَ بھر زرتگ۔

دیوانا میر غلام محمد بلوچءِ شھادتا پد ھورک بیتگین بی إن إفءِ کارگشادیءِ جاگھا عصا ظفر گچین کت۔ شہ إیشی رند فرنٹءِ کاری راھبندانءِ سرا گپ و فیصلہ کنگ بیت أنت۔

کتگیں فیصلوانءِ ردا فرنٹا ھوریں گل شہ وتی نیمگا فرنٹءِ پالیسیانءِ سرا گپ مہ کن أنت۔ إیوکا بنجاھی چیرمئن و کارگشادا ھمشوریا پالیسیانءِ سرا بیان دیگءِ حق ھست إنت۔ إیشیءِ کشا فیصله بیت که فرنٹءِ سرجمیں گل ھرجاہ کہ دیوانے کن أنت، گڈا ھوری و ھمشوریا به کن أنت۔

دیوانءِ دیما میر براھمدغ بگٹیءِ کلوے هم وانگ بوت۔ بیانا میر براھمدغ بگٹی گشتگ کہ ھما گل کہ پارلمنٹءِ سیاستا کن أنت، بی إن إفءِ باسکیں گل گوں آواں گند گدار مہ کن أنت و ھچ جیڑوءِ ردا گوں آواں تران کنگ مہ بیت۔
Rights reserved by www.balochinews.com

مندءَ یک پولیسے کشگ و دگرے ٹپـّی کنگ بوت۔

ماں مند تیرگواریءِ سببا پولیس فیض چک قاسم منندجاہ گومازی کشگ بوت و إیوب چک شیرمحمد منندجاہ گومازی ٹپـّی بوت۔ همے درگتا سرکاری واکاں مند بازارءِ پشتگوری کوھا ٹالیں بلوچستانءِ بیرق إیر گپتگ۔ کوکارءِ داتگیں حالا یک بمبتراکےءِ خبر ھم آتکگ۔ ھمے کہ گيئشتر سرپدی إیشیءِ باروا بہ رسیت، وانوک سھیگ کنگ إبنت۔
Rights reserved by www.balochinews.com

کوئٹہ: 3 کسانءِ کشگ بیگا رند 60 کس دستگیر بوت أنت

کوئٹہءَ 60 کس دستگیر بوت أنت۔ إے مردم شہ سریاب، کلی شابو، کلی إسماعیل، نواں کلی، أخروٹ آباد، سٹلائٹ ٹاؤن و دگہ ھنداں دستگیر بیتگ أنت۔ إیشاں دستگیر کنگءِ سبب دوشی ماں جیل روڈ -قلات إسٹریٹءَ بیتگیں تیرگواری ظاهر کنگ بیتگ۔ تیرگواریءِ سببا سئے کس -أرشد محمود، محمد آصف و عبدالخالق کشگ و دو کس -زوھیب و نیلم ٹپـّی بیتگ إتنت۔ روچتاک توار، جنگ
Rights reserved by www.balochinews.com

زاهدان: مرتگیں 19 بوت أنت، مولوی عبدالحمیدءَ بمبتراک إیرجت

پنچشنبہءِ شپا عشاءِ نمازءِ درگتا ماں أمیرالمومنیں مسیت -زاھدانءَ بیتگیں بمبتراکا مرتگیں مردمانءِ حساب 19 کساں سر بیت۔ بمبتراکا 125 کس ٹپـّی بیتگ أنت۔ إیشانءِ نیاما 45 کس دوا درمانا پد چٹــّتگ أنت و 80 کس نادراھجاھاں واپینگ بیتگ أنت۔ شه واپیتگیناں لھتے کس سک ٹپـّی أنت۔

أمیرالمومنین مسیت شیعہ مسیتے إنت۔ سرکاری واکانءِ گشگ إنت کہ إیشی یک جانفدا بیڑے بیتگ۔ ألبت نوکتریں حالانءِ ردا یک کسے دستگیر بیتگ کہ سرکاری واکاں بمبتراکءِ أصلی مردم ظاھر کتگ۔ بی بی سیءَ نبشتہ کہ دستگیریں مردم شہ زاھدان تچگءِ درگتا واکاں دستگیر کتگ۔ دستگیریں مردم 'ٹرورسٹی ٹولی'ءِ باسکے ظاھر کنگ بیتگ۔

چدا پیسر ھنچوش بیتگ کہ إیرانی واکاں وتی مردمانءِ سرا برتگیں ھر بیڑءِ بدلا بے میاریں بلوچ نوجواں دستگیر و لٹ کٹ کتگ أنت۔ ھمے درگتا شہ آوانءِ دپا نہ کتگیں جرم منـّینتگ و درتکگ أنت إش۔

بی بی سی فارسی کہ آئیا بازیں کس برطانیاءِ رودینتگیں إیرانی سرکارءِ گوانکو گش أنت؛ نبشتہ کتگ کہ سنیانءِ پیشونک مولوی عبدالحمید بمبتراک إیر جتگ۔ پدا گيئش کتگ کہ إے کارکردءِ مقصد شیعہ و سنی براتاں وت ماں وتا میڑینگ إنت۔ پمیشا شیعہ و سنی شہ بزدلیں سلکارانءِ پندلاں وتا بہ رکـّین أنت۔
Rights reserved by www.balochinews.com

نوکتریں حال: زاھدانءَ بمبتراک، 15 کشگ و 50 ٹپـّی بوت أنت

إیرانءِ سرکاری حالرسان 'إرنا'ءِ ردا ماں زاھدان حضرت أمیرالمومنیں نامیں مسیتےءَ بمبتراکےءِ سببا 15 کس کشگ و 50 ٹپـّی بوت أنت۔ مرتگ و ٹپـّی بیتگیں مردمانءِ حساب گيئشتر ھم بوت کنت۔ إے بمب مرچی (پنچشنبہ 28 مئے 2009)ءِ سرشپا ترکـّتگ۔ أنگت سرکاری واکاں إیشیءِ باروا بیان نه داتگ۔

نیم سرکاری حالرسان 'فارس'ءَ شہ بمبتراکا کلاکے رند حال شنگ کت و اودا مرتگیں مردم 10 کس ظاھر کت أنت۔ پدا گيئش ئی کت کہ مرچی بی بی فاطمہءِ بیرانیءِ سالروچءِ درگتا ماں مسیتا نمازی سک باز بیتگ أنت، پمیشا مرتگینانءِ حساب بُرز تر شـُت کنت۔
Rights reserved by www.balochinews.com

مرچی پاکستان و دنیاءِ مسلمان شادھی و بلوچ أفسوز کن أنت

28 مئے ھما روچ إنت کہ پاکستانی واکاں بلوچستانءِ چاغی دمگا ماں 'کمبران' کوھاں أٹومی بمب تراکینت و بلوچ سرڈگار سراماد کت۔ ھمے روچا پاکستان و دنیاءِ بازیں مسلماناں شادھی کت پرچا کہ إیشی أولی إسلامی إٹومی بمب أت۔ ھمے أٹومی بمبتراکءِ یادا بلوچ ھموک سالانءِ ڈولا إمبری ھم سوگ دارگا أنت۔

درملکی بلوچ سیاسی گل و إنسانی حقانءِ پانکجنیں ٹولیانءِ نیاما مزنتریں دیوان 29 مئے 2009ءَ شہ 'بلوچستانءِ أمریکائی دوست' نامیں تنظیمےءِ نیمگا ماں أمریکاءِ شھر 'واشنگٹن ڈی سی' برجم دارگ بیگا إنت۔

نامداریں بلوچ حالکار و پؤلکار أحمر مستی خانءِ دیم داتگیں حالےءِ ردا 'إے إف بی'ءِ دیوانا زانوگر أٹومی سلاحانءِ تاوانان بیان کن أنت۔ پدا شہ أٹومی بمبتراکاں رند پاکستانءِ سیاسی زوالیانءِ باورا مردم سرکچ دیگ إبنت۔

إیشی کشا مرچی ماں مشرقی بلوچستانءَ دیوان برجم دارگ بیگا أنت و أٹومی بمباں تراکینگءِ پاکستانی کارکرد إیر جنگ بیگا أنت۔ بلوچ نشنل فرنٹءَ ھوریں گل إے روچا 'سیاھیں روچے'ءِ حسابا گوازینگا أنت۔ آ ماں کوئٹہ و جیوانی مزنیں مچّی ھم برجم دارگا أنت۔
Rights reserved by www.balochinews.com

سی سال إنت کہ یک فاشسٹ ٹولییے إیرانءِ واکدار إنت؛ داکٹر دوشوکی

نامداریں بلوچ دانشور، سیاسی جھدکار و بلوچستانءِ سیاسی، چاگردی و دودمانی جاورانءِ کوّاس، و 'بلوچستانءِ سرا پٹ پؤل کنوکیں میاں اُستمانی بنجاہ'ءِ سروک داکٹر عبدالستار دوشوکی گشت کہ سی سال إنت یک فاشست ٹولییے إیرانءِ واکدار إنت۔ إیرانءَ بیوکین گچینکاریاں بھر زیروکین پیشونک ھمے سرکارءِ بھرے أنت۔ بزان یکیں راھنبدءِ منوک و ھؤرکار بیتگ أنت۔

بی بی سی فارسی ٹلوژنءِ گالگداری دیوانےءَ داکٹر دوشوکی سرکچ دات کہ بلی توریں إیرانءِ تاریخءَ أولی بر إنت کہ قومانءِ جیڑوانءِ سرا گپ بیگا إنت و آوانءِ نام گرگ بیگا أنت، بلے مردم فریب مہ ور أنت و بہ زان أنت کہ بس پہ پیشدارگا گچینکاری برجم دارگ بیگا أنت۔ پرچاکہ ھمے اُمیدوار کہ مرچی قومانءِ گپا جنگا أنت، سی سال گوں ھمے واکداریں فاشست ٹولیا گوں بیتگ أنت۔

گالگداری دیوانءِ آدگہ مھماناں یک خاتمی نامیں کرد سیاسی کوّاسے و دگہ أحمدی نامیں فارس دانشورے إنتت۔ یک جستےءِ پسّوا خاتمی گشت کہ مارا گشگ بیگا إنت کہ 'زبانءِ أول' فارسی إنت؛ آ دگہ زبان رندا کاینت! راستیا فارسیءَ دومی زبان بیگ لوٹیت، أولی زبان مردمانءِ ماتی زبان بہ بنت۔

فارس زانوگر أحمدیءَ زور پر دات کہ باید أولا مردمانءِ ھر روچی زندءِ ضرورتانءِ نیمگا دلگوش دیگ بہ بیت۔ رندا قوم و زبانءِ جیڑہ وت آسودگیا ٹھینگ إبنت۔

27 مئے 2009ءَ شنگ بیتگیں بی بی سیءِ مراگش 'صفحہ 2'ءَ وھدے شہ داکٹر دوشوکی جست کنگ بوت کہ زاناں إے وشیں گپے نہ إنت کہ ھنوگیں گچینکاریاں قومانءِ نام چست إیر بیگا أنت؟
داکٹر عبدالستار دوشوکی گشت کہ إے مردماں گلائینگءِ پندلے إنت۔ مردم باید سرپد بہ بنت کہ إے رژیم تچکیں راھا آرگ بیت نه کنت۔

Rights reserved by www.balochinews.com

واشءِ نزیکا جنگے بوت، یک بلوچ و 5 دولتیانءِ کشگ بیگءِ حال

إیرانءِ سرکاری حالجاہ 'إرنا'ءَ شنگ بیتگیں حالےءِ ردا واشءِ نزیکا نشوی درمانءِ سوداگر و سرکاری واکانءِ نیاما جنگے بیتگ إیشیءِ سببا یک کسے گشگ، لھتے مردم گوں دو گاڑی و نشوی درماناں دستگیر بوتگ أنت۔ دگہ لھتے کس ٹپـّییں حالتا شہ اودا تچکا سوبیں بیتگ أنت۔

إرناءِ ردا لھتے سلاح و ماھوارئی ٹلفن ھم گرگ بوتگ و پولیس پہ ٹپـّییں مردمانءِ دستگیریا راھی کنگ بوتگ۔ شہ بھا کنوکانءِ گورا رستگیں نشوی درمان 1200 کیلو تریا و خشیش ظاھر کنگ بیتگ أنت۔

تفتان حالرسانءِ ردا ھندی مردماں آ سھیگ کتگ أنت کہ گوستگیں روچا بیتگیں إے جنگا سلاحبندیں بلوچ جواناں سرکاری واک باز تاوانبار کتگ أنت و 5 پاسدار کشتگ أنت۔ إدا شہ سرکاری حالجاھا نقل کنگ بوتگ و یک بلوچےءِ زوال بیگءِ خبر داتگ۔

.

إیرانءِ سرکاری حالجاھاں شنگ بیتگیں حالانءِ ردا ماں مغربی بلوچستان ھر روچ یک کسے کشگ، ٹپـّی یا درنجگ إبیت۔ إے مردمانءِ نیاما صدا 99 کس نشوی درمانءِ سوداگر یا خدائی سرڈگارءِ سرا فسادکار ظاھر کنگ بیتگ أنت۔ إشیءِ کشا ھر دومی روچا مزنیں حسابےءَ درمانءِ دستا کپگ و سوداگرانءِ دستگیر بیگءِ خبر شنگ بیگا أنت۔

.

مرچاں نشوی درمان بها کنوکانءِ کشا سوچگی تیلءِ سوداگر بیگءِ ڈوبواں ھم بازیں کس دستگیر بیگا أنت۔ پہ مثال زی ماں زابل 17 کس ھمے ڈوبوا دستگیر کنگ بیتگ أنت۔ شہ إیشانءِ گورا سوچگی تیلءِ 7260 'دفترچہ' دستا کپتگ أنت و أندازه إنت که إیشاں تنے وھدی ھشت میلیون و ھشتصد ھزار لیٹر سوچگی تیل أفغانستانءَ راہ داتگ۔

Rights reserved by www.balochinews.com

إیرانشھری جوانانءِ شاھین فٹبال ٹیم برندہ بوت

إیرانشھری جوانانءِ شش فٹبال ٹیماں پہ شھرءِ نمایندگیا یکـّا دگرءِ خلافا لیب کت۔ دیم پہ دیمی گڈی لیب 'شاھین' و 'آبفا'ءِ نیاما بوت۔ إے لیبا شاھین ٹیما پنچ گول جت و آئیءِ دیما آبفا گولے دیگا سوبیں نہ بوت۔ إے وڑا شاھین برندہ بوت۔ برندویں ٹیم ریاستءِ تھا بیوکیں لیباں شھرءِ نمایندگیا کنت۔ إرنا
Rights reserved by www.balochinews.com

بلوچاں پہ بحرینءِ فوجا زیرگءِ کارکرد بی إل إفءَ إیر جت

بلوچستان لبریشن فرنٹءَ شہ مکرانءِ أواریں شھراں پہ بحرینءِ فوجا بلوچاں زیرگءِ کارکرد إیر جت و گشت کہ بلوچ إے وھدی وتی آزادیءِ جنگا مڑگا أنت، بلوچ جوان دریں ملکاں روگ و دستبوگ بیگءِ بدلا آزادی مڑوکیں گلاں ھؤر بہ بنت۔

بشام بلوچءَ شہ سٹلائٹ فونےءَ 'آنلائن' نیوز حال دات کہ شہ ھرجاگھا گيئشتر بلوچ جوانانءِ ضرورت آوانءِ وتی ملکءِ تھا إنت۔ بلوچ جوان در ملکی فوجان ھؤر بیگءِ بدلا 'بی إل إف، بی آر إے و یا بی إل إے'ءَ ھؤر بہ بنت و پہ وتی سرڈگارءِ آزادیا جنگ بہ کن أنت۔ راجستان

Rights reserved by www.balochinews.com

گار کنگ بیتگینانءِ سببا بلوچستانءِ تکانستری ردان أنت

سیاهگ: قرات العین صدیقی –رجانک: ولید گربنی

"من شہ کالجا پیداگ إتاں، إسپیتیں گاڑییے أت، منا دستگیر إش کت، گوں سیاھیں پچّےءَ منی دیم إش گپت۔ منی دست إش بست أنت و رسگا منا جنگ إش بنا کت" 18 أپریل 2009ءَ شہ کوئٹہ چست بیتگیں عدنان بلوچ گشت۔ پدا گئیش ئی کت " گاڑی لٹ کٹ کنگءِ جاھےءَ اوشتات و اودا منا سرجمیں روچا کرنٹ إش جت کہ إیشیءِ سببا من شہ دوئیں پاداں لنگ بیتاں"۔

قول آئیا "شہ دستگیریا یک روچے رند ماں مستونگ یلہ دیگ و نادراھجاھا برگ بوتاں۔ پولیس ھمودا أت و شہ منی گالایگا پیسر درائینت إش کہ منا جنوکانءِ خلافا کئس ثبت کنگءِ ھچ عدزا آ نہ منّ أنت"۔

بلـّی توریں سیاسی دستگٹیانءِ سببا دستگیریں چاکر قمبرانیءِ براتزھگ عدنان بلوچ لٹ کٹ بیگا رند یلہ دیگ بوتگ، بلے چاکر قمبرانی و بلوچستانءِ دگہ صداں مردم أنگت بیگواہ أنت۔

26 مارچ 2009ءَ بلوچستان إسٹوڈنٹس آرگنائزیشن -آزاد کوئٹہءِ صدر شاھزیب بلوچ چکانپگ بوت۔ آئی بادے مروچی بیگواہ إنت۔ شاھزیبءِ برات اورنگزیب گشت کہ آ کوئٹہ 'سٹی' پولیس بنجاھا چکانپوکانءِ خلافا کئس ثبت کنگا شتگ أنت، بلے آ تچک تچکا گشگ بیتگ أنت کہ کئس ثبت کنگ نہ بیت۔ آئی گيئش کت "بلی توریں ما کلانیں کورٹا شکایت کتگ، بلے ھچ سرکاری مردم مارا کمک نہ کنگا إنت"۔

سٹی پولیس بنجاہءِ حسیب غفور گشت کہ شاھزیب بلوچءِ چکانپگ بیگءِ باروا آوانءِ گورا ھچ کئس ثبت نہ إنت۔ وھدے غفور گشگ بوت کہ پہ کئسءِ ثبت کنائینگا مردم آتکگ أنت و شما گامگیج نہ زرتگ، گڈا درائینت ئی " مئے گورا أگر کسے بہ یئت، گڈا ألـّما ما کئس ثبت کنیں۔ ألبت بہ گشاں کہ مئے بنجاہءِ 'حدود'ءَ ھچ کس گار نہ إنت"۔

یک دگہ پولیس بنجاھےءِ بُنپانا وتی نام چیر دات و مارا گشت "من ترا باز گشت وا نہ کناں، بلے ھو؛ لھتے براں شکایت آروکیں مردمانءِ چهر دیگ ألـّما سکّ إنت۔ ألبت ما ھچ کت نہ کنیں، مارا ھنچوش حکم دیگ بوتگ"۔

شاھزیبءِ یک دگہ ضیا نامیں براتےءَ گشت "مارا یاد ھم نہ إنت کہ ما گوں چنچو مردماں و چنچو برا ڈیک وارتگ۔ شہ سروزیر رئیسانیءَ بگر تاکہ رحمان ملک و گورنر مگسی گوں پھکاں ما ڈیک وارتگ۔ پھکاں مارا دل أڈی داتگ۔ ألبت تیوگیں حال کہ شاھزیبءِ باروا رستگ، آئیءِ سنگت رازق جمالدینیءَ مارا داتگ۔ رازق جمالدینی سئے ماہ ساریا چکانپگ بیتگ أت و ھنوگاں یلہ دیگ بیتگ۔ آئیا شاھزیب ماں بندیگجاھا دیستگ، ألبت مردمانءِ دیما شہ إے گپءِ ظاھر کنگا ترسگا إنت"۔

بی إس او –آزادءِ چیردستیں صدرءِ چیردست ذاکر مجید بلوچءَ گشت کہ اورنگزیبءِ سرجمیں گپ راست أنت۔ پدا گيئش ئی کت " بی إس او –آزادءِ باسکانءِ نیاما گاریں کس إیوکا شاھزیب بلوچ نہ إنت، إقبال بلوچ شہ 14 مارچ 2007ءَ دیم پہ إنگو گار إنت، مشتاق بلوچءَ ماھے بیت کہ شہ خضدارءَ چکانپگ بیتگ"۔

23 جولائی 2007ءَ چکانپگ و بیگواہ کنگ بیتگیتیں ذاکر مجید بلوچ گشت کہ 'إسٹبلشمنٹ' إنت کہ بلوچ سیاسی جھدکاراں کشگ و یا بندیگ کنگا إنت۔ آئیءِ گشگ إنت "مئے بازیں جھدکار پولیس، سیمسری فوج و فوجءِ دستا ماں کوئٹہ کشگ بیتگ أنت"۔

پاکستان یومن رائٹس کمیشن بلوچستانءِ صدر فرید أحمد گشت کہ صداں کس ھمے ڈولا چکانپگ و گار کنگ بیتگ أنت۔ ألبت آوانءِ گورا 150 کسانءِ نام ھست أنت، إیشیءِ سبب ھمے بوت کنت کہ ھمے مردمانءِ نام سیالاں آرتگ و ھؤر کنائینتگ أنت۔ هما مردمءِ نام هؤر کنگ إبیت کہ نام ئی آرگ بہ بیت۔

فرید أحمد گشت "ھنچوش کہ مئے گورا کسےءِ ناما آرگ إبیت، ما کلانیں کورٹءَ کئس ثبت کنائینیں۔ یا ما عاصمہ جھانگیرءِ سرا ناماں لاھورءَ راہ دییں۔ ھنوں ما جھد کنگائیں کہ کلانتریں کورٹءَ گاریں مردمانءِ کئسان پدا ظاھر بہ کنیں"۔
۔۔۔
گاریں مردمانءِ قصہ طالبانءِ خلافا پاکستانی جنگءِ جیڑوا گوں ھمردیا دیما روگا إنت۔ پاکستان و أمریکا ھر دواں گوں طالباں نزیکی کنگءِ باز جھد کت۔ ألبت بلوچاں سیاسی پڑا آرگءِ باروا ھنچیں جھدےءِ نہ بیگءِ خبر پہ مردماں سکّ إنت۔ گوں بلوچاں گپ ترانےءِ سوبینی گوں چکانپگ بیتگیں مردماں بندوک إنت۔ تناوھدی کہ إے مردم ظاھر کنگ نہ بیتگ أنت و أگر میارے زرتگ إش؛ قاضییےءِ دیما برگ نہ بیتگ نت؛ (گوں بلوچاں) ھچ گپ تران سوبین نہ بیت إنت۔

إنگریزی حالتاک ڈانءِ منـّتا۔ Rights reserved by www.balochinews.com

برطانیاءِ ھاؤس آف لارڈءِ ماڑیا بلوچانءِ باروا برجمیں تاریخی دیوان

لندن- 5 مئے 2009ءَ برطانیاءِ پارلمنٹءِ ماڑیا یک پچیں دیوانے برجاہ دارگ بوت۔ إے دیوانءِ مراد بلوچستانءِ سیاسی جیڑوانءِ سرا تران کنگ و آواں دنیاءِ دیما درا کنگ أت۔ ھوریا میر خیربیارمری و فیض بلوچءِ بے میاری ثابت بیگءِ سرا وشی درشان کنگ بوت۔ ماں إے پچیں دیوانا لندنءَ جاھمنندیں بازیں بلوچانءِ ھؤریا إنگریزاں ھم بھر زرت۔

گوں مچّيا وتی تراناں میر خیر بیار مری گشت کہ پاکستانی فوجا 27 مارچ 1948ءَ پہ زور بلوچستان کپتگ. شہ زورگرگ بیگءِ روچا دیم پہ إنگو پہ وتی آزاد کنگا بلوچ یکـّوئی جنگا أنت و إے وھدی پنچمی دیم پہ دیمی جنگ بیگا إنت۔

میر خیر بیار مریءَ تاریخی چمشانکے دیگا پد گشت کہ ھما روچا کہ مشرف پاکستانءِ واکداریءِ کرسیءِ سرا نشت بلوچستانءِ سرا زوراکی گيئش کنگ بوت أنت۔ آئی سرکچ دات "جنوری 2000ءَ یک مری بلوچ قاضییے پاکستانءِ چاریگاں کـُشت و آئیءِ ڈوبہ مئے کٹمءِ سرا جنگ بوت۔ إے ججءِ کشگ بیگءِ وھدا من گوں براتاں ماں لندن نندوک إتاں۔ ألبت مئے سرا کئس ثبت کنگ بوت أنت و منی کماشیں پت إش دستگیر و بندیگ کت۔ پداھنوں کہ 10 سال پرگوَستگ أنت، أنگت مئے کٹمءِ سرا کئس ثابت نہ بوتگ"۔

شہ إیشی پد واجہ خیر بیار مریءَ جنوری 2005ءَ داکٹر شازیہ خالدءِ ننگءِ سرا فوجی حمّادءِ برتگیں بیڑءِ گپ بیان کت و گشت کہ مشرفءَ شہ پٹاسکاریا پیسر کپٹن حماد بے میار ظاھر کتگ۔
چدا پد دیوان مشرفءِ بیمتراپءِ ترانگ دیگ بوت کہ اودا آئیا بلوچ گشتگ إتنت کہ إے ھفتادءِ دھر نہ إنت۔ نوکیں دھرا بلوچاں شہ کجا نیمگا لگيت، آ زانت ھم نہ کن أنت۔ شہ ھمے بیھارا پد ماں ڈیرہ بگٹی فوجی گراب و گن شپ ھلی کاپٹراں بمبگواری کت۔ 60 بلوچ إے بمبگواریا گشگ بوت أنت۔ نواب بگٹیءِ قلاتءِ سرا هم بمبگواری کنگ بوت۔ یک ھندو مندرےءَ عبادت کنوکیں ھندو جنیں، چک و کماش بمبگواریءِ سببا کشگ بوت أنت۔

زوراکیاں بیان کنانا میر خیربیار مریءَ مرغاپءِ شھید میر غلام محمد، شیرمحمد و لالامنیرءِ کشگ بیگءِ درگتا درّائینت کہ آ شہ وتی وکیلءِ دفترا روچءِ ٹاکا دستگیر کنگ و برگ بیتگ أنت۔ لٹ کٹ کنگا پد تیر جنگ و ماں تلپیں پڑےءَ دئور دیگ بیتگ أنت۔ إے سئیں کس سیاسی جھدکار إتنت و آوانءِ نیاما غلام محمد بلوچ سیاسی گل بی إن إمءِ سروک أت۔

میر خیربیار مریءَ وتی خبراں سرجم کنگا پیسرتر گشت "بیان کتگيں زوراکی شون دے أنت کہ پاکستان بلوچانءِ گار کنگا گولائیش إنت، پمیشا ضروری إنت کہ إنٹر نشنل کمیونٹی بلوچستانءِ نیمگا دلگوش بہ دات و بلوچانءِ آزادیءِ جُنزا کمک بہ کنت۔ تاکہ بلوچ غلامیءِ طوقا سنندگ؛ دئور دیگا سوبین بہ بنت۔

یک جستےءِ پسّوا میر خیربیار مری گشت کہ پاکستانی پہ بلوچانءِ بھر بانک کنگا إنگریزانءِ راھبندا کارمرز کنگا أنت۔ بزاں لھتے مردم ھمے باور کنائینتگ بیتگ أنت کہ آ پاکستانءِ بھرے أنت و آوانءِ مرگ زند گوں پاکستانءَ بندوک إنت۔ دگہ لھتے شہ پاکستانءِ زورگریءِ راستیا سرپد أنت و ملکءِ آزادیا وتی منزل لیکگا أنت۔

فیض بلوچءَ وتی تران گوں چاگردی جیڑوانءِ بیان کنگا بندات کت و گشت کہ 1952ءَ شہ بلوچستانءِ دمگ سوئیءَ گئس درکنگ بوتگ، بلے بلوچستانءِ آدگہ دمگانءِ ھوریا شہ گئس پائپاں لھتے میٹر دیر نندوکیں بلوچ أنگت شہ إے آسراتیا زبھر أنت۔ ھمے گئس صداں میل دور ماں پنجاب و سرحدءَ سر کنگ بیگا إنت۔
واکداراں گئس درکنگءِ باروا بستگیں سرجمیں قرار پروشتگ أنت۔ شه گئسءَ رند رستگيں سیتءِ زرّانءِ کمّوکیں بھرے دمگءِ إسکول و دگہ آسراتیاں خرچ کنگءِ قول ھم پیلو کنگ نہ بیتگ۔
وھدے ترقیءِ گپ بیت، گڈا مردماں چارگ لوٹیت کہ پیسری ترقیانءِ برکت چے بیتگ أنت۔ ما أگر بہ چاریں، گڈا زاھدان، کوئٹہ، بندرعباس و کراچیءَ گندیں کہ بلوچانءِ شھر بیتگ أنت، اودا ترقی آرگ بیتگ، بلے پدا ھم بادے مروچی بلوچ ماں کـُٹِگاں کپتگ أنت۔ درامداں شھر دست گپتگ أنت و سرجمیں فیصلواں ھما کن أنت۔
ماں بلوچ دمگاں بلوچ زھگ مجبور کنگ بیگا أنت کہ آ اُردو یا فارسی گپ بہ جن أنت، بہ وان أنت و بہ نبیس أنت۔ بلوچ ندکار و شاعر دستگیر و جیل کنگ بیگا أنت۔

بلوچستان شہ پیسرا ملک و سیمسری فوجءِ أنگرّا بیتگ و نیں چاریگ ماں بلوچ مچّیاں رو أنت و گچینی بلوچ جھدکاراں یکـّا دستگیر کن أنت و وتی ٹارچر سلاں دئور دے أنت۔

اعلا حضرت سلیمان داؤد کہ چوناھیا گپ جنوکیں مھمانانءِ لڑا ھؤر نہ أت شہ دیواندار بانک ھلینا کنیڈیءِ نیمگا دستبندی کنگ بوت کہ وتی خیالاں درشان بہ کنت۔ إے ردا آئیا درّائینت کہ سرجمیں فسادءِ کِشوک برطانیا إنت۔ برطانیا زانتگ کہ ما ھچبر ھندوستانءِ بھرے نہ بیتگیں، بلے پدا ھم شہ اودا درکپگا رند شہ ما شموشکار بوت۔ پاکستانءِ دستا بلوچستانءِ زورگری باورا برطانیاءَ وتی چم بند کت أنت۔
شہ 1947ءَ بگر دیم پہ إنگو برطانیا یکـّوئی پاکستان و إیرانءِ پلانگریا زیرگا إنت۔ إیشیءِ نوکتریں مثال ھمے ھنـّوگاں گوں إیرانءَ بستگیں یک قراربندے إنت کہ إیشیءِ ردا دو برطانیائی کمپنیاں دو میلین بیرل تیل همک روچ کشگءِ إجازت دیگ بوتگ۔
سلیمان داؤد بلوچانءِ جنزءِ باروا گشت کہ آوانءِ گورا أبید شہ مڑگا دگہ ھچ درچارگ نیست إنت۔ آ تا سوبینیا وتی جنگا بہ دار أنت۔

إنسانی حقانءِ پانکچنیں وکیل مس گیریس پیرسءَ میر خیربیار مری و فیض بلوچءِ دستگیری و پدا آوان بے میاری ثابت بیگءِ ردا وتی خیال درشان کت أنت و گشت "إے کئس دو ھنچیں بلوچانءِ خلافا أت کہ آواں ھچ میار پر نیست أت۔ بس درامدانءِ گـُشگءِ سرا برطانیاءِ واکاں آ دلسیاہ کت أنت"۔
آئی گیئش کت کہ نیں وھد آتکگ کہ برطانیا ٹرورسٹانءِ نیاما شر و گندگ گچین مہ کنت، ٹرورسٹ ھر کس بہ بیت ٹرورسٹ إنت۔ ألبت پدردیں گپے إنت کہ مردم گندیت برطانیاءِ واکداراں فلسطینی و إسرائیلیانءِ نیاما إسرائیلی گچین کتگ أنت، تاملانءِ بدلا سری لنکاءِ سرکار إش گچین کتگ، چچنیاءِ مردمانءِ بدلا روسی سرکارءِ پلانگریا زیگا أنت و إدا بلوچانءِ جاگھا مشرف سرکار حمایت کنگ بیتگ۔
آئی گشت کہ نیں وھد إنت کہ ما وتی إنسانی فرضا أدا بہ کنیں و تچکیں راھا بہ گریں۔

بلوچانءِ أنگریز سنگت و جنزءِ ھمراه، و نامداریں جھدکار واجہ پیٹر تاچل گوں ترندیں گالوارےءَ درّائیت کہ برطانیا باچکولو یک جمھوری ملکے إنت۔ مئے سرکارا گوں یک ڈکٹیرےءَ ھورکاری کت و دو بے میاریں بلوچ إش بے بُنیں کئساں مانگیشینت أنت۔ آئی گيئش کت "ما سرپد بیین کہ برطانیاءِ چاریگ و پولیسا میر خیربیار مری و فیض بلوچءِ باروا باز رد وارتگ۔ مئے جھد بیت کہ برطانیاءِ پارلمنٹا إے درگتا گپ کنائینگ بہ بیت۔ إیشیءِ برکتا بلوچستانءِ باروا ملکءِ مردماں گیئشتر سرپدی ھم رسیت۔
شہ مچّی سرجم بیگا رند ماں یک نزیکیں رسٹورانٹےءَ ورگءِ بندبست کنگ بیتگ أت کہ اودا میر خیربیار مری و أعلا حضرت سلیمان داؤدءِ ھوریا مردماں وراک وارت۔

ورلڈ سندھی کانگریسءِ لیڈر ثریا مخدوم گشت کہ سندیاںءِ جیڑہ ھم بلوچانءِ ڈولا إنت۔ ألبت ما گوں تفنگ جھد کنگا نھیں۔ سبب إیش إنت کہ مئے دودماں مارا سلاحبندیں جنگءِ إجازتا نہ دات۔ ما گوں سیاسی گند نند و دیوان وتی جنگا مڑگائیں۔

Rights reserved by www.balochinews.com

میر اسراراللہ زھری وتی نام مٹـّینت و میر اسراراللہ بلوچ کت

بلوچستان نشنل پارٹی -عوامیءِ سروک میر إسرار اللہ زھریءَ وتی نام مٹینت و میر إسرار بلوچ کت۔ آئی گشت کہ ناما مٹـّینگءِ مقصد بلوچستانءِ توکا ٹکـّی رواجءِ بدلا قومی فکرا ردوم دیگ إنت۔

إسراراللہ بلوچ سرکچ دات کہ تناوھدی بلوچ ٹکـّانءِ نیاما بھر بہ بنت، قومی لیکہ ھچبر رشت نہ کن أنت۔

آئی گشت کہ أختر مینگلءِ ماں زھری گوں دیوانے وتی تراناں گشتگ کہ مارا ٹـکـّانءِ نیاما بھر بیگءِ بدلا قومی لیکہ دیما آرگی أنت۔ أخترمینگلءِ ھمے واھگ ردا من دستبندی کناں کہ چدا پد منا زھریءِ بدلا بلوچ بہ گش إت۔

آئی گشت که ٹکـّانءِ نیاما بھر بیگءِ ھوریا سرداری رواج مارا پہ یک قومے بیگا نہ إلـّگا إنت۔ پمیشا ماں بلوچستان سرداری رواجءِ زوراکتر کنگا بیوکیں تچ تاچانءِ برورد بیمناک بی أنت۔

وتی گپانءِ گڈسرا آئی درّائینت "منا اُمید إنت که وتا زنڈیں راھشون گشوک وتی نامانءِ تھا ٹکّءِ بدلا بلوچ ظاھر کنگ بنا کن أنت۔ خاص شہ أختر مینگل منا اُمید إنت کہ آئی مینگلءِ بدلا وتی ناما بلوچ کنت و وتی قوم دوستیا ثابت کنت۔ انتخاب

ترانگ بہ کپ إت کہ غیرتءِ ناما ماں بلوچستان لھتے جنیں آدمانءِ کشگ بیگءِ سرا گپ کنگءِ درگتا ماں پاکستانءِ سنئٹا میر اسرار زھری گشتگ أت کہ ٹکـّی رواجءِ ردا جنیں آدم کشگ بیتگ أنت۔ شہ إے گپا رند آئی سک ڈوبارگ بیتگ أت۔

Rights reserved by www.balochinews.com

کوئٹهءَ پہ فوجیاں جوڑ کنگ بیتگيں لوگانءِ چابی آواں دیگ بوت أنت

پہ پاکستانی فوجیاں ماں کوئٹہ جوڑ کنگ بیتگیں لوگانءِ چابی آواں دیگ بوت أنت۔ إے لوگانءِ أڈ کنگا 725 میلین روپیا چرچ کنگ بیتگ۔ نوک أڈ کنگ بیتگيں لوگانءِ کشا ماں کوئٹہ فوجی 'چاونی'ءَ پیسری لوگ ھم شرتر و رنگ روغن کنگ بیتگ أنت۔

روچتاک جنگءِ ردا پاکستانی فوجءِ کماندار جنرل خالد شمیم وائین چابیانءِ بھر کنگءِ درگتا زبان دات کہ آ فوجی و آوانءِ کنبءِ عاقبتا شرتر کنگا مدام تکشیت۔

ماں کوئٹہ أڈ کنگ بوتگیں لوگاں نوکیں دهرءِ سرجمین آسراتی مان أنت۔ پہ فوجیانءِ چکـّاں لیبجاہ، سلـّویں آپ و دگہ نوکتریں آسراتیانءِ بند بست کنگ بیتگ۔ اودا پہ زنڈیں أفسراں 34 أپارٹمنت، پہ آوانءِ چیردستاں 52 فلیٹ و شہ إیشاں جھلترینانءِ 186 لوگ أنت۔

حالءِ ردا ماں 'چاؤنی'ءَ سرجمیا 61 کوارٹر ھست أنت کہ إیشانءِ تھا 4337 دستشودجاہ أڈ کنگ بوتگ أنت۔
Rights reserved by www.balochinews.com

پہ بندیگانءِ یلہ کنائینگا جھد أنگت إنت

مشرقی بلوچستانءِ أواریں ھنداں پہ بے میاریں بلوچ بندیگانءِ یلہ کنائینگا سیاسی و چاگردی جھدکارانءِ تچ تاچ أنگت أنت۔ إے درگتا مروچی ماں مند شہ پی آر پیءِ ھندی جھدکارانءِ نیمگا لشکرے درگپت. إیشیا أواریں دگاں ترّ تاب کت و سرکاری واکانءِ زوراکیانءِ خلافا کوکـّار جت۔

'کوکـّار'ءِ راہ داتگیں حالےءِ ردا لشکرءِ مردماں بلوچستانءِ بیرق ٹال کتگ إتنت و میر واحد کمبر، فضل حیدر، إقبال بلوچ، جلیل ریگی، چاکر قمبرانی و بے میارا بندیگیں دگہ بلوچانءِ آزادیءِ لوٹا کنگا إتنت۔ گڈسرا لشکر ماں سورو چار راھا سرجم بوت و سروکاں تران کت۔

ماں تمپ بی إس او -آزادءِ سرجم کتگیں پنچ روچی شدکـشّی دیوان وتی گڈی روچا سر بیتگ أنت۔ ألبت جھدکاراں گشت کہ تناوھدی آ وتی منزلا نه رستگ أنت، جھد وڑ وڑیں دروشماں برجاہ دارگ إبیت۔ ھمے ردا مرچی ماں تربت لشکرے کشگ بوت۔

کوکـارءِ ردا ماں مند مرچییں لشکرا پیسر بی آر پیءِ ھندی سروکانءِ نیمگا یک سئے روچی شدکشـّی دیوانے برجم دارگ بیتگ۔

دگہ جاھاں شنگ بیتگیں حالاں نبشتہ إنت کہ کراچی و کوئٹہءِ تھا ھم پہ ھمے بندیگاں یلہ کنائینگا شدکشّی کنوکانءِ پتر پچ أنت۔ و ھر روچ بازیں کس آیگا أنت و آوانءِ لوٹانءِ پلانگریا وتی خیالاں درشان کنگا أنت۔
Rights reserved by www.balochinews.com

جنداللهءِ کله: إیرانءِ ووٹاں تھروز کن إنت

تپاکی و جهد- تبصرہ: مسعود سردارزئی

مرچی مئے مظلومیں راج ظلمانءِ آماچ إنت۔ تھران و إسلام آبادءِ حاکماں مئے ماتيں وطنءِ سرا یورش آورتگ۔ چشیں روچے نہ گوزیت کہ مئے زانتکاریں سیاسی ومذھبی راھشونے کشگ مہ بیت۔ چشیں روچے نیست کہ بلوچ جنیں آدمے جنوزام مہ بیت و روچے نہ گوستگ کہ مئے راجءِ چکـّے چورہ مہ بیت۔ إے سرجمیں کار شون دی أنت کہ تھران و إسلام آباد پہ مئے راجءِ گارکنگا ھمدست أنت۔

أگر ما چمشانکے بہ دئیں و بہ چاریں، گڈا ودی إبیت کہ بازیں راج و ڈگار مئے وڑا ظلمانءِ آماچ بوتگ أنت۔ بلے تپاکیں جھدءِ برکتا آواں آزادی گپتگ و راجی مرادانءِ منزلا سر بوتگ أنت۔ چوش کہ أفریقا، إنڈونیشیا، یوگوسلاو و دگہ بازیں ھنداں إیردستیں راج و قوم چہ غلامیءِ طوقا آجو و وتی منزلاں سر بوتگ أنت۔
نوں باید إنت که درستیں بلوچ پارٹی و گل یک جاہ بہ بنت و بزگیں بلوچ راجا وتی منزلا سر کنگا ھوردست بہ بنت۔

Rights reserved by www.balochinews.com

بیرق. چمشانک: دوستین لاسی، رجانک: ولید گربنی

دنیاءِ کجا یکـّیں کنڈ بہ بیت، بیرق ھنچیں نشانے إنت کہ آئیءِ ٹال کنگا اُستمان پھر بند أنت۔ أگر جاھے جنگے مڑگ بہ بیت، گڈا جنگا سوبین بیوک وتی بیرقا ٹال کن أنت تاکہ دیمءِ واکانءِ باھینگ پیشدارگ بہ بیت۔ ھمے وڑا أگر جنگءِ درگتا کسے کشگ بہ بیت، گڈا گوں پھربندی آئیءِ جسد بیرقءِ تلا پتایگ و کل کنگ إبیت۔ بزان کہ وتا پیشدارگءِ شرتریں نشانی بیرق إنت. إیشی شہ وانگ دربرگءِ بنجاھاں بگر تاکہ سرکاری کارگسانءِ سرا گوں شادھی ٹال کنگ إبیت۔ یک قومےءِ بیرقءِ توھین شہ گندہ تریں میاراں حساب إبیت کہ کسے آئیا بہ زیریت۔

کش گوَراں چماں شانگ دیگا رند پہ ھر کسا ودی إبیت کہ وھدے یک قومے شہ ناروائی و زوراکیاں دم به بارت، گڈا زوراکیں قومءِ بیرقا ماں مچّیاں سوچ أنت و وتی تکانسریاں پیئشدار أنت۔

ماں بلوچستان سرکاری واک و مزاحمتکارانءِ نیاما شہ گپڑے سالاں أنگتیں جنگءِ درگتا ھم گوں بیرقا مھر و نادوستیءِ کارپد ودی بیگا أنت۔ بلوچستانءِ بیرق کہ چدا ساری إیوکا بی إل إےءَ ماں وتی دستا آرتگیں ھنداں ٹال کتہ بیتگ، نیں (بلوچانءِ) ھر مچّی و دیوانا ٹال کنگ بیگا إنت۔

نیں نوجواناں وتی گلانءِ بیرق یلہ داتگ أنت و آوانءِ بدلا قومی نشانیا ماں ھر دمک و دگـّا گوں دلیری ٹال کنگا أنت۔ إیشیءِ کشا پاکستانءِ بیرقا إیرگيجگ و سوچگءِ کارکرد ھم ھر نیمگا ودی أنت۔

بلوچستانءِ بیرقا ٹال کنگ و پاکستان أیگا تھروز کنگءِ کاراں سرکاری واکدار سربتگ کتگ أنت۔ پرچاکہ إے کارکردءِ سببا پاکستانی واکدار دنیاءِ دیما شرمندہ بیگا أنت۔ و إے شرمندگیءِ دیر کنگا سلاحبندیں واکاں یک گورےءَ بلوچستانءِ بیرقاں إیرگيجگ بنا کتگ و آ دگہ گورا سرکاری بنجاھاں پاکستان أیگاں پدا ٹال کنگا أنت و پہ آوانءِ چارگ وارگا سلاحبندیں پانک نندارینگا أنت۔

راستی شموشگ مہ بنت کہ تناوھدی مردمانءِ دل راضی نہ أنت، یک بیرقے ھمنچو برز ٹال بہ بیت تاکہ دیرا اودا نہ داریت۔ نے کہ دلدوستیں بیرق شہ ٹال کنگ بیگا دارگ بیت کن أنت۔ پمیشا زھگ و جنیں آدماں شہ وتی نیمگا مدرسوانءِ سرا بلوچستانءِ بیرق ٹال کنگ بنا کت و پاکستانءِ راجی سوتءِ وانگ إش ھم أنگار کت۔ ھمے کارکرد روچ در روچ گيئشتر بیگا إنت۔ إیشیءِ سببا سرکاری واکدارانءِ کشا بلوچءِ حقانءِ ناما سیاست کنوک کہ سالاں سال وتی گاڑیانءِ سرا پاکستانءِ بیرق إش ٹال کتہ بیتگ و أمیراں شہ أمیرتر جوڑ بیتگ أنت، ھم سربتگ ترّ تگ أنت۔

وھدے شہ وتی بندیگیا پد سردارزادہ أختر مینگل کوئٹہءَ سر بوت، اودا جسلوے برجم دارگ بوت و جلسوا صدانءِ حسابا بلوچستانءِ بیرق مردماں ٹال کت أنت، گڈا آئیءِ ھمسنتیں 'سئے' سک پزنیگ بیت أنت۔ شہ إیشی رند وھدے سرکاری واکدارانءِ دستا ماں 'مرغاپ' بلوچ شھید کنگ بوت أنت، گڈا أختر مینگل مدامی وڑا گرمیں تینءِ سرا پہ وتی کولا جنگءِ مقصدا مکرانءِ أواريں ھنداں جسلہ برجاہ دارگا رھادگ کپت۔ اودا ھم آزادیءِ کوکار'سئیں ھمسنتاں' وھدے إشکت أنت، گڈا وتی دیوان إش گوَنڈ گپت أنت۔

أختر مینگل ھمے درگتا گشت کہ بیرقانءِ ٹال کنگ و کوکـّار جنگا آزادی نہ رسیت۔ ألبت أگر آئیا بیرقءِ سیت و أھمیتءِ سرا چیزے بہ وانتیں أت، گڈا سرپد بیتگ أت کہ سوبینیءِ إیوکیں نشانی بیرقانءِ برزی أنت۔

أختر مینگل ترانگ بہ کپیت کہ وھدے راسکوہءِ براھداریں کوہ پاکستانی سائنسداناں گوں زھری بمباں ٹپـّی کت، گڈا پرچا پاکستانی سروزیرءِ گاڑی أختر مینگل کاربست و نواز شریف ئی راسکوہءَ رسینت؟ ألمـّا إیشیءِ مقصد راسکوہءِ تباھی سرا دلپدردی درشان کنگ نہ أت۔ ألبت سوبینیءِ شادھیا اودا پاکستانءِ بیرقا ٹال کنگ أصلی مقصد أت۔ بزان آ وھدی سوبینیءِ نشانی بیرق أت!
پدا نیزگار و پادمالیں بلوچاں گِرّ کنانا برگ، آواں وتی پلانگریا کوکـّار کنگ و پدا ووٹ دیگا پرمایگ؛ سوبینا رند پاکستانءِ بیرق جتگین سرکاری گاڑیا سوار بیگ و أسلام آبادءَ ترتاب کنگءِ درگتا ھم بیرق ضروری أت۔ پہ ووٹءِ گرگا تا گپڑے سالاں بی إن پیءَ گوں یک بیرق و دو بھراں دارگءِ درگتا بیرقا أھمیت ھست إنت! گڈا بلوچستانءِ آزادیءِ ناما پرچا بیرق و آزادیءِ کوکار ضروری نہ أنت؟

أگر بیرقا أھمیت مہ بیتین أت، گڈا پاکستانءِ سنئٹ، قومی أسمبلی و دنیاءِ دگہ ھنداں آزاد بلوچستانءِ بیرقءِ ٹال بیگءِ سرا چست إیر نہ بیتگ أت و شہ سلاحبندیں رستگاری واکاں پُرّیں درزنان گاڑی ھر روچ پہ پاکستانی بیرقءِ ٹال کنگا ماں مدرسواں نہ شتگ إتنت۔
بیوکیں کارکرد پیشدارگا أنت کہ مرچی بلوچ مردیں، جنیں، جوان، نوجوان و کسانسال گوں زانت و سرپدی دیم پہ وتی منزلا پیشکنزگا أنت۔ إے رندییں جنگ ٹکانءِ دستا چست کتگینے نہ إنت۔ إیشی گوں زانت و سرپدی مڑگ بیگا إنت۔ أگر کسےءَ إے راستیءِ سرا شکّ إنت، گڈا آئی گوں بی إس او –آزادءِ ھندی سروکےءَ گدار بہ کنت، تاکہ سرپدی و ناسرپدی سنگ و شاھیم کنگ بہ بنت۔ شہ اودا وتواجھی و آزادیءِ فرق، آزادیءِ جنگ، ملکءِ بیرقءِ أھمیت و گوں بیرقا بندوکیں راجی مارشت و پدا إیشیا ٹال بیگا گِندؤکیں دشمنانءِ نگیگیانءِ باروا سرجمیں سرپدی رس إت کن أنت۔ روچتاک توارءِ منتا
Rights reserved by www.balochinews.com

ماں إیرانشھر یک کسے پاھوا درنجگ بوت

ماں إیرانشھر یک کسے مردم کشیءِ ڈوبوا درنجگ بوت۔ إیرانی کورٹےءَ چیزے ماہ ساری إیشیا کشگ حکم داتہ بیتگ۔ پدا کلاّنیں کورٹا کشگءِ حکم بروبر منـّتگ و مردا درنجگءِ إجازت داتگ۔

شہ إیسنا زرتگ و راڈیو بلوچی إف إم سویڈنءِ ویبتاکا شنگ بیتگیں حالا دیمترا داتگ کہ 9 ماہ ساریا ماں بمپور دوکس سلاحءِ سودایے جنگءِ درگتا وت ماں وتا جیڑتگ أنت و جیڑگ جیڑگا 'عبدالغفور -ک' نامیں مردا دیمءِ کس تیر جتگ، کشتگ۔ پدا شہ جاھا تتکگ۔
Rights reserved by www.balochinews.com

نادانیں دوستا شہ دانائیں دشمن گِہ إنت۔ تبصرہ: بلوچی نیوز

لھتے روچ پیسرا 'گوانک' ویبسائٹا 'بلوچی نیوز'ءِ سرا إیرانی سرکارءِ پلانگری زیروکےءِ ڈوبہ جتگ أت۔ إیشیءِ پدا بلوچی نیوزءَ یک دستبندییے شہ گوانک ویبسائٹا کت کہ بلوچی نیوزءِ سرا مفتیں ڈوبہ مہ جنت۔ إے دستبندی گوانکءِ واھند سمندرءَ مئے نزوری لیک إت و بلوچی نیوزءِ خلافا ماں پچیں دیواناں زھرشانی بنا کت۔ پمیشا ما مجبوریں کہ صداں ردیانءِ نیاما یکے پیش بہ داریں تاکہ آئی‏ءِ وتگلائی تـُشے إیرموش بہ بیت و دیمترا گيئشتر خیال گوَر بہ کنت۔

بیا إت وتا بلوچ قومءِ گوانکو گشوکیں ھمے سمندرءِ ناسرپدیءِ سرا چمشانکے دییں و ھوریا چاریں کہ إے نادانیں دوستءِ کارکرد پہ بلوچاں چنچو تاوان أنت۔
بلوچی نیوزءِ چاروکاںءِ دیما پاشک کنگ ضروری إنت کہ راڈیوءِ ناما گروکیں 'گوانک' بس یک ویسائٹے إنت و إیشیءِ خبر إیوکا إنٹرنٹءِ سرا شنگ إبنت۔ إے ناما ھچ ملکا راڈیو یا ٹلوژنے شنگ نه بیگا إنت و چدا ساری هم نه بیتگ۔ شہ بلوچستانءَ در إیوکیں راڈیو 'بلوچی إف إم' إنت کہ شہ سویڈنءِ شھر إسٹاکھوم شنگ إبیت و آئیءِ سروک مسعود بلوچ إنت۔

إے تبصرہءِ گڈ سرا داتگیں توار سمندر و یک بلوچےءِ گپ أنت کہ ماں کیچ دمگا دستگیر و گار کنگ بیتگ أت۔ إے گپ دستگیریں بلوچءِ آزدایا پد سمندرءَ 30 أپریل 2008ءَ ضبط و شنگ کتگ أنت۔ ھمے سمندر مرچاں ماں آنلائن دیواناں نشتگ و سرمچارانءِ پلانگری زیروکیں بلوچانءِ گپاں ضبط کنگا رند پہ آئی إس آئیءِ آسودگیا شنگ إش کنگا إنت۔

ما زانیں کہ نبشتہ کنگ و رکارڈ کتگیں ھر بلوچءِ گپاں دشمنیں ملکانءِ چاریگ یک پہ یکـّا چار أنت و گوشدار أنت۔ إدا بہ چار إت کہ گپانءِ تھا یک سادویں بلوچے کجا ڈولا چاریگانءِ دیما سرمچارے ظاھر کنگ بیگا إنت و پہ نزانتی آئیءِ دپا ناھودگیں خبر دیگ بیگا أنت۔ ھوریا دگہ مردمانءِ نام ھم ظاھر کنگ بیگا أنت۔ ترانگ بہ کپ إت کہ ھمے بلوچ شہ یلہ دیگ بیگا رند همے ھنوگاں پدا دستگیر و بیگواہ کنگ بیتگ۔

یک گورےءَ بلوچ سیاسی جھدکار، قانونزانت و إنسانی حقانءِ پانکجن جھدا أنت کہ بے میارا بندیگیں بلوچاں بہ رکـّین أنت۔ دومی گورا بے میاریں بلوچاں سرمچار ثابت کنگ و پیشدارگءِ جھدا پاکستان و إیرانءِ چاریگانءِ کارا سمندر آسودگ کنگا إنت۔

شہ راڈیو گوانک زرتگیں خبرانءِ تھا بلوچی نیوزءَ پہ گپ جنوکءِ رکـّینگا آئیءِ نام دیر کتگ، ألبت ھمے توار بادئے مروچی گوانک ویبسائٹا إیر أنت۔ مہ شموش إت کہ مئے مقصد إیوکا إیش إنت کہ سادویں بلوچ سمندرءِ ناسرپدیانءِ آماچ مہ بنت۔ پدا سرمچار و آوانءِ پلانگری زیروک وتا شہ چشیں ناسرپدیں دوستاں بہ رکـّین أنت۔

Rights reserved by www.balochinews.com

من گلے أڈ نہ کتگ، مسلم لیگییے آں؛ ظفراللہ جمالی

نامداریں بلوچ سیاستکار و یکـّے شہ پاکستانءِ پیسری سر وزیراں میرظفرالله جمالی ماں لاھور گوں دیوانےءَ وتی ترانانءِ تھا گشت کہ آئیا ھچ ڈولیں گلے أڈ نہ کتگ و أصلا مسلم لیگی مردمے إنت۔ آئی لوٹ کت کہ بلوچستانءِ زبھری دیر کنگ بہ بنت و ریاست بروبر چارگ بہ بنت۔

میر ظفراللہ جمالی سرکچ دات کہ پاکستانءَ گيئشتر ریاستاں بھر کنگ و درملکی سیاستءِ تھا بدلی آرگا بازیں جیڑہ آسودگیا گيش أنت۔ دیمترا آئیا ضرورت مارشت درشان کت أنت کہ بلوچستانءِ جیڑوانءِ سرا سیاسی گلانءِ ھوریں دیوانے برجم دارگ بہ بیت۔ آج ٹی وی
Rights reserved by www.balochinews.com

بلوچستانءَ دستگیریانءِ تھا گيئشی آرگ بوت

إیرانی واکاں گچینگاریانءِ نزیک بیگءِ درگتا بلوچستانءِ توکا گربند گيئش کت۔ نوکتریں یورشاں بازیں کس دستگیر و بندیگ کنگ بیت أنت۔

تفتانءِ شنگ بیتگيں حالےءِ ردا گوستگیں ھفتگا ماں بلوچستانءِ أواریں دمگاں شہ 40 کساں گيئش بلوچ جوان دستگیر کنگ بیتگ أنت۔ شہ إیشاں دستا کپتگیں زاھدانءَ نندوکیں چار نام چیرا داتگ أنت۔

1۔ منصور ریگی
2- یحیا ریگی
3- حاجی أعظم شہ بخش
4- نصراللہ شہ بخش
Rights reserved by www.balochinews.com

شہ راڈیو گوانکءِ سمندر آسکانیءَ دستبندییے

شہ 'راڈیو گوانک'ءِ سمندر آسکانیءَ دستبندی إنت کہ 'بلوچی نیوز'‏ءِ سرا زوراکیانءِ پلانگری زیرگءِ نہ بیتگیں ڈوبہ مہ جنت و وتی کارانءِ نیمگا دلگوش بہ دات شرتر إنت۔ پرچاکہ راڈیو گوانکءِ ردیانءِ درچنگا بلوچی نیوز واهوک نہ إنت۔ www.balochinews.com

پاکستانءِ واکداریں گل ماں بلوچستان دو ٹولیاں بھر إنت

پاکستانءِ واکداریں گل 'پی پی پی' ماں بلوچستان دو ٹکـّراں بھر إنت۔ شہ گلا نواب حاجی لشکری رئیسانیءِ درکپگا رند إے دوئیں ٹولی جؤڑ بیتگ أنت۔ حاجی لشکریءَ گوستگیں ماھا شہ گلا درکپگءِ جار جتگ أت۔ آئیا وتی درکپگءِ سبب وزیرانءِ ھورکاری نہ کنگ ظاھر کتگ أت۔ رئیسانیءِ إستعفا أنگت منـّگ نہ بیتگ۔ ألبت رستگیں حالانءِ ردا آئیا بنجاھی سرکارا ماھےءِ مھلت داتگ کہ إستعفاءَ بہ منـّیت یا سرکچ ئی بہ دات کہ پرچا گلا ماں بلوچستان سروکی بہ کنت۔

وراکءِ وزیر حاجی علی مدد جتکءَ چارشنبہءَ لشکری رئیسانی إیرجت و گشت کہ پی پی پیءِ وزیرانءِ سرا أبید شہ ثبوتا 'کرپشن'ءِ ڈوبہ جنگ بیتگ۔ واجہ جتک گشت کہ لشکری رئیسانیءَ پارٹیءِ راھبند سرگوَز کتگ أنت۔ شہ گلا آئیءِ درکپگ مزنیں گپے نہ إنت۔ پرچا کہ پی پی پی ھنچنائیں مردمانءِ گل إنت۔ إیشیءِ تھا ٹکانءِ سروک و سرداراں جاگہ نیست إنت۔ ڈیلی ٹائمز

Rights reserved by www.balochinews.com

گوں برزیں دیوالانءِ بندگا إیرانءَ ڈرگءِ کاربار سرکاری کت۔

عکس و تبصرہ: غلامرضا حسینبور۔ رجانک: ولید گربنی

داتگیں عکسا پاکستان و إیرانءِ سیمسرا جوڑ کتگیں دیوال ودی إنت۔

بلی توریں پیسرا إیرانی مردم و دریں ملکاں باور کتہ بیتگ کہ نشوی درمانءِ سوداگر بلوچ بیتگ أنت، بلے پاکستان و أفغانستانءِ سیمسرا برزیں دیوال، جُھلیں دِرّ و زنڈ و برزیں آسنی پسیلاںءِ گندگا رند باور نہ کن أنت۔ درّ، دیوال و پسیلانءِ کشا سیمسرا صداں پٹاسکاری بنجاہ ھست أنت۔ أگر یک کسے گوزگءِ جھدا بہ کنت، رستگاری واک آئیا آسودگیا گند أنت۔ پدا إیشاں گوازینگ پہ مردماں ناممکن إنت۔

خیال ھمیش إنت کہ سیمسرا بندگءِ مقصد إیرانءِ تھا نشوی درمان آرگءِ کاربارا سرکاری کنگ إنت۔ ھمے ڈرگ شہ إیرانءَ میاں اُستمانی مارکٹا راھی کنگ إبیت۔ پمیشا ھر کس بہ زانت کہ نیں 'جمھوری إسلامی إیران'ءَ وتی ملکا نشوی درمان رسینگءِ کاربار سرکاری کتگ۔

پاکستان و أفغانستانءِ زنڈیں سوداگر نشوی درمانا کار أنت و إیرانءِ سیمسری واکانءِ دستا دے أنت۔ ھمے سیمسری رستگاری واک أنت کہ إے درمانا إیران و عراقءِ تھا، و ترکیءِ سیمسرا رسین أنت۔

یونائٹڈ نئشنءِ ردا ماں تھران ھر شپ سئے ٹن تریاک کشگ و یا ورگ إبیت۔ یک تھرانی مردمے 10 دمانءِ تھا شہ بھا کنوکےءِ گورا تریاک یا دگہ سراماد کنوکیں درمان زرت، آرت کنت۔ إے حسابا تریاک کارمرز کنوکیں مزنتریں ملک إیران زانگ إبیت۔ ھوریا شہ ھر ملکا گيئشتر تریاک ماں إیرانءِ أنباراں إیر إنت۔

حدّاد عادل کہ إیرانی پارلمنٹءِ گوانکو إنت و آیت اللہ خامنہ إی کہ مذھبی پیشونک إنت؛ دوئیں تریاک کشگءِ ھیلءِ آماچ أنت۔ ھنییں دھرا پہ إیرانءِ مردماں تریاک کشگ دلاں شاد کنگءِ إیوکیں دستگٹی إنت۔

إے سرجمیں راستیاں زانگا پد ھم نیزگاریءِ آماچیں بلوچ اُلس نشوی درمانءِ کاربارا کنوک ظاھر کنگ بیگا إنت۔ 'إنٹر نشنال مائنورٹی'ءِ حالےءِ ردا بلوچانءِ 76٪ نیزگاراں شہ نیزگارتر أنت۔
Rights reserved by www.balochinews.com

بی إس او آزادءَ پہ بندیگانءِ رکـینگا شدکشـّیءِ کمپ جت أنت

شہ تمپ رستگيں حالےءِ ردا بی إس او -آزادءِ باسکاں شدکشـّیءِ کمپ جتگ أنت۔ گلءِ جنیں باسکاں 'نادراھجاہ چار راہ'ءَ و مردمیں باسکا ماں 'بازار چار راہ'ءِ کشا وتی وتی ھفتگی کمپ جت أنت۔
واحد کمبر و فضل حیدرءِ 'جسمانی ریمانڈ'، فیض محمد بلوچ و إقبال بلوچءِ یکــّوئی بندیگیءِ خلافا شد کشـّگ بیگا أنت۔ بی إس او -آزادءِ ھندی سروکان گوں حالکاراں وتی تراناں گشت کہ واحد کمبر و فضل بلوچءَ سئے سال إنت کہ ماں کوئٹہ بندیگ أنت۔ باز وھد بیتگ کہ آ کورٹےءَ برگ نہ بیتگ أنت۔ نیں کہ برگ بیتگ أنت، قاضیا آ پولیسءِ دستا داتگ أنت کہ لٹ کٹ و جُست کنگ بہ بنت۔
آواں گيئش کت کہ واحد کمبر و فضل حیدرءِ کٹم ماں تربت و کراچیءِ پرئس کلبانءِ دیما شدکشـّیا نشتگ أنت۔ پدا حیرانی درشان کنگ بوت کہ پاکستانءِ سپریم کورٹ إے ردا بے توار إنت۔

شدکشّی کنوکاں اُمید کت کہ یو إن و دگہ میاں اُستمانی گل إے بلوچانءِ سرا بیتگيں زوراکیانءِ باروا وتی ذمواریاں أدا کن أنت۔
Rights reserved by www.balochinews.com

شہ زاھداں بازیں پٹان دستگیر و پاکستانءَ راہ دیگ بوت أنت

سرکاری حالجاھاں شنگ بیتگيں حالانءِ ردا إیرانی واکاں زاھدانءِ کش گوری میتگاں بیڑ برت و لوگ پہ لوگ پٹان، و دگہ درملکی شوھاز کت، پدا دستگیر کت أنت۔ یورشءِ درگتا بلوچ میتگاں کرایہءِ سرا نندوکیں صداں پٹان و پنجابی دستگیر بیگا رند شہ تفتان سیمسرا پاکستانءَ راہ دیگ بوت أنت۔ بازیں بلوچاں دلپدردی درشان کتگ کہ یورشءِ وھدا سرکاری واکاں جنیں و چوریگانءِ خیال نہ کتگ۔ و ستر پروشتگ أنت۔ زانگ ضروری أنت کہ گيئشتر پٹان بے جنیں آدماں نندوک أنت۔ و لھتے کساں أگر وتی جنیں آدم گون أنت، گڈا آ بلوچی پوشاک گورا کن أنت، تاکہ پہ سرکاری واکاں پجّاہ آرگ إش گران بہ بیت۔

لوگ پہ لوگ پٹاسکاریءِ إے سرکاری کارءِ یک دگہ مقصدے نشوی درمان و آوانءِ تاجراں درگیجگ بیتگ۔ إے یورشءِ درگتا 'یو أن او ڈی سی' بزاں میاں اُستمانی گلءِ نشوی درمانءِ کاربارءِ خلافا کار کنوکیں تکءِ 'أنتونیو ماریا کوستا' نامیں أفسرے گوں بیتگ۔

Rights reserved by www.balochinews.com

شہ مکران سر بیتگيں لھتے نوکیں عکس۔ کوکـّار کوکـّارءِ منتا

Rights reserved by www.balochinews.com

میر خیربیار مریءِ خلافا مینگل ٹولیءِ بیان 'بی إن اف' إیرجت

بلوچ نشنل فرنٹءِ باسک میر قادر بلوچ و إیلم إتحادءَ وتی جدا جدائیں بیانان مینگل پارٹی إیرجت و میرخیاربیارءِ خلافا داتگیں آوانءِ بیان ڈوبار إت۔

روچتاک توارا شنگ بیتگیں بیانےءَ میر قادر بلوچ گشت کہ میر خیربیار مری ستک دل پہ بلوچستانءِ آزادیا جھدا إنت۔ آئیءِ تچکیں جھدا إیرجنگءِ مقصد بی إن پی مینگلءِ سکلکاریاں چیردگ و بلوچ اُستمانءَ غلام برجاہ دارگ إنت۔ میر خیربیارءِ خلافا بی إن پی مینگلءِ دپا 'جی إچ قیو'ءَ خبر درایگا أنت۔

إیلم إتحادءِ بنجاھی گوانکوا وتی جدائیں بیانےءَ گشت "میر خیربیار بلوچ قومءِ سفیر إنت۔ آئیءِ شانا بی إن پی مینگلءِ بے أدبیا ما سک إیر جنیں"۔

إیلم اتحادءِ بیانا دیمترا داتگ کہ بی إن پی مینگل إسلام آباد و لاھورءِ زبانا گپا إنت۔ آواں زانگ لوٹیت کہ بلوچ قوم نیں وتی قبلھا زانگا إنت۔ دو روئی و دروغءِ سیاست پدا بلوچ قوما شہ راھا گستر کت نہ کنت۔ پمیشا ضروری إنت کہ بی إن پی -مینگل وتی کردا شر بہ کنت بہ زانت کہ مرچی نواب مری گوں زھگاں بلوچ قوما وتی راھشون منـّتگ۔


ترانگ بہ کپ إت کہ بی إن پی مینگلءَ وتی بیانےءَ میر خیربیار مریءِ خلافا باز زھرشانی کتگ أت۔ آ بیانا گشگ بیتگ أت کہ خیربیار مری و آئیءِ وڑیں دگہ راھشونانءِ گشگءِ سرا بی إن پیءِ 'مخلصیں' جھدءِ خلافا 'زہ سرائی' کنگ بیتگ۔ بی إن پی -مینگلءِ 'معزز' و 'قد آور' راھشونانءِ کردار کشی کنگءِ جھد بیتگ۔

بی إن پی -مینگلءِ بیانا إے ھم داتگ أت کہ راڈیکلزمءِ راھا سر وتیں سیاستاں دیما برگ آسودگ إنت، بلے إیش بلوچستانءِ سیاستءِ ضرورتاں پیلو نہ کنت۔ بیانا إے ھم بٹاک جنگ بیتگ کہ بی إن پیءِ اُلسی واک و نامداریا میر خیربیار مری، و آئیءِ وڑیں دگہ مردم پریشان کتگ أنت۔

Rights reserved by www.balochinews.com

میر عالی بگٹی ، بگٹیانی نواب گچین کنگ بیت. چمشانک: کریم تهل

دیریں وهدے إنت که نوابی و سرداریءِ رواج بلوچانءِ أندرا جاه دیگ بوتگ. إیشیءِ ردا بلوچ وتی کـَٹم و زاتءِ سرا پهر بند أنت.

من گوں واجه جان محمد دشتیءِ گشتنےءَ تپاکاں که گشیت بلوچانءِ دود و ربیدگانءِ اندرا إنگریزءَ باز بدلی آؤرت، و یکے چه بدلیاں نواب، سردار و خان جؤڑ کنگ أت. بے کساس سلاح و گنجء واهندیں إنگریزءَ چیزے مڈی ( توپک و زرّ) بلوچ نواب ، سردار و خاناں دات. تاکه إیشاں چه مردماں جتا و وتی کاسگ چٹ جوڑ بہ کنت.

ألـَما إنگریز وتی إے واهگا سوبیں بیت۔ آواں زحم، توپک و باڈی گارڈانءِ واھند ٹکانءِ نواب سردار و خان جؤڑ کت أنت. إیشانءِ دلاں هرچے لوٹ إت؛ گوں ٹکـّاں کت إش. مردم مجبور بوتگ أنت کہ آوان ءِ سرداری و مزنیا بہ منّ أنت یا چه ملکا در به کپتگ أنت.

پیسری رواج کہ ٹک دیوان بہ کنت، گوں یکـّا دگرا شوربندی بہ کنت۔ وتی نیاما گھتر، سرمچارتر و مردمگر تریں باسکا گچین کنگءِ جاگہ إنگریزءِ جوڑ کتگیں نوکین راهبند رواج گپت۔

أگر هنچیں برے إنگریزءِ راھبندا رووکیں نواب، سردار و خانےءِ دپا راجءِ خبر آتکگ أنت، گڈا آ بس دپی خبر بیتگ أنت۔ أگر جاھے أنقلابءِ گپ إش جتگ، گڈا بزانکہ آ وت آشوبءِ بزانتا پوہ نہ بیتگ أنت۔

پہ دل ستک بلوچ راجءِ دیمرویا منّوک و آئیءِ گپا جنوکیں سردار، خان یا نواب إیوکا واجه یوسف عزیز مگسی أت۔ ماں راجدپترا یک پرنوریں إستارےءِ دابا آ جلشکیت و برشکیت۔ په راج ءِ نِـھـِرّ دیگ و رهشونیا هر دابیں جهد آئیا کتگ أت. آئی إنگریزاں چه ملک ءَ درانڈیه کت و راه دات.... سرجمین سیاهگ
Rights reserved by www.balochinews.com

حاجیاں در حج رو أنت، حج إش مبارک!

ماں إسلام آباد برجم دارگ بیوکین عالمانءِ مچّیا بلوچستانءِ ملایاں ھم بھر زرت۔ دیوانا پد عالماں گوں پاکستانءِ سروزیر یوسف رضا گیلانیءَ گدار کت۔ آواں دستبندی کت کہ شہ بلوچستانءَ گيئشتر مردم پہ حج کنگا روگءِ إجازت دیگ بہ بنت۔ سروزیرا زبان دات کہ آ ملایانءِ لوٹا ألکاپیں چارگے دات إنت۔ جنگ آنلائن

ترانگ بہ گپ إت کہ گوستگیں سالا بلوچی نیوز شہ بلوچستانءَ رستگیں حالے شنگ کتگ أت و اودا بلوچاں وتی دلپدردی درشان کتگ إتنت کہ شہ أفغانستان مردم بلوچستانءَ کاینت و بلوچستانیءِ ناما حجءَ رو أنت۔

یک دگہ حالے حاجیانءِ چھر کنگءِ درگتا گوستگیں سالا بلوچی نیوزءَ شنگ کنگ بوت که إے حالا چھرکنوکیں بازیں حاجی نقلی پاسپورٹانءِ سرا روگءِ سببا ماں پاکستانءِ تیابدپی شھر کراچیءِ بالی پٹا دستگیر بیتگ إتنت۔ دستگیر بیتگیں سرجمیں حاجی پٹان إتنت۔

Rights reserved by www.balochinews.com

کاربارءِ ردا إیرانی سفارتکارءِ کمک لایق ستا أنت؛ پٹان تاجر

'أنجمن تاجران بلوچستان'ءِ صدر عبدالرحیم کاکڑ، حضرت علی أچکزئی، سید تا آغا، إبراھیم کاسی، سعداللہ أچکزئی، حاجی دوست محمد أچکزئی و دگہ بازنیں تاجراں وتی یک ھوریں بیانےءَ ماں کوئٹہ نندوکیں إیرانی سفارتکار ستا دات۔ آواں وشی ظاھر کت کہ شہ إیران خشکیں نیبگ زیرگءِ پڑا سفارت گوں آواں ھورکاری و باز رعایت کنگا إنت۔ جنگ آنلائن
Rights reserved by www.balochinews.com

بلوچستانءِ حقانءِ پچگرگا جھدا برجاہ داراں؛ میر عالی سلیم بگٹی

میر عالی سلیم بگٹیءِ سرا بگٹی ٹکءِ نوابیءِ پاگ بندگ بوت و شہ پاگبندیا رند وتی ترانانءِ تھا آئی گشت کہ پہ بلوچانءِ حقاں وتی جھدا برجاہ داریت۔

آئی گيئش کت کہ پہ مردمانءِ گھتریا آئی ھر ڈولیں سیمسراں گوازینگا و گوں بدواھاں ھم گدار کنگا ساڑی إنت۔ دیمترا گشت ئی کہ پہ دمگءِ وشیا آ ضروری لیکیت کہ درپہ در بیتگین بگٹی پدا آرگ و وتی منندجاھاں نندارینگ بہ بنت۔

پاگبندیءِ درگتا سوئیءَ یک 20 إنچی گئس پائپے تراکینگ بوت۔ إے پائپ کراچیءَ گئس رسینگا بیتگ۔ بمبتراکا رند کراچیءِ لھتے ھنداں گئس رسگا نہ إنت۔ واکاں گئس پائپا أڈ کنگءِ کار بنا کتگ و أندازہ إنت کہ 24 کلاکاں کار سرجم إبیت۔ جنگ آنلائن
Rights reserved by www.balochinews.com

تامل ٹائگر، پرباکرن و تاملانءِ آزادیءِ جنگ کجا سر بیت أنت؟ چمشانک۔ ولید گربنی

تامل ٹائگراں وتی نوکتریں بیانےءَ گشت کہ نیں آ گوریلا جنگ کن أنت۔ بیانا سرکچ دیگ بیتگ کہ آ سری لنکاءِ معیشتی بنجاھانءِ سرا بیڑ بر أنت تاکہ ملکا گيئشا شہ گيئشتر مالی تاوان بہ دے أنت- آنگو سری لنکائی واکاں واجہ پرباکرنءِ ناما کشگ بیتگیں جسدے ماں ٹلوژناں شون دات و گشت کہ آئیءِ 23 سالگيں بچ ھم کشگ بوتگ۔

ویلو پلائی پرباکرن ماں سری لنکاءِ شھر جافنا‏ءَ ودی بوتگ۔ ھنچوش کہ سرا ھوش ئی آتکگ، سری لنکاءِ أکثریت؛ سنھالیانءِ دستا تامل مردمانءِ خلافا فرقگزاریءِ شاھد بیاں بیتگ۔

مزن بیگا رند آئیا 1975 'تامل نیو ٹائگرز' نامیں گلے ٹھینت و پہ تاملانءِ حقانءِ پچگرگا گولائیش بوت۔ شہ إیشی رند ظاھر زانگ بیتگیں آئیءِ أولی کار 1975ءَ جافنا شھرءِ شھردارا تیر جنگ؛ کشگ إنت۔ 1976ءَ ٹی إن ٹیءِ نام مٹینگ و 'لبریشن ٹائگرز آف تامل إیلام' إیر کنگ بوت و پہ تامل ھندانءِ آزادیا گوں سری لنکا دیم په دیمی سلاحبندیں جنگےءَ چن لانچ کنگ بوت۔

تاکہ سال 1983ءَ گيئشتر تامل فوجی جنگ ھیل دیگ بوت أنت۔ ھر جوان و نوجوانیں جنیں و مردیں ٹائگر فوجا ھؤر کنگ بوت۔ إے وڑا یک مزنیں فوجے ٹھینگ بوت۔ إے فوجیانءِ لڑا بازیں وتکش بیڑ بروک، دریں ملکاں تامل بدواھاں پجّا آرگ و آوانءِ سرا بیڑ بروک، ملکءِ تھا نوکتریں سلاحانءِ کارمرز کنوک و وتی نیاما هستیں لگوراں درگیجگا پد درس دیوک ھؤر إتنت۔

شہ إیشی رند تاملانءِ بُرتگیں بیڑانءِ سببا سری لنکاءِ فوچ نزور ترّ إت و ملک شہ واکدارانءِ دستا در کپت۔ پہ جاورانءِ گھتر کنگا ھندوستانءِ فوج سری لنکاءَ پترت۔ إیشیءِ مزنتریں تاوان تاملاں رس إت۔ پمیشا تامل نہ وش بیت أنت و یک جانفدا بیڑےءَ ھندوستانءِ سروزیر راجیو گاندی إش کشت۔

راجیو گاندیءَ کشگءِ سببا ھندوستانءِ تامل و سری لنکاءِ تاملانءِ وت ماں وتی تچکیں ھورکاری سِندگ بوت۔ ھمیشیءِ سببا آزادیءِ جنز ھم نزور ترّ إت۔ تاملاں ھم رندترا منّ ات کہ راجیو گاندیءَ جنگ ردییے بیتگ۔ ألبت أنگت سری لنکائی فوج بے واک أت و تاملاں جنگ و زیر گنگءِ تواں آواں نیست أت۔

تامل ٹائگرز جانفدا بیڑءِ مزنتریں ماھر منـّگ بوتگ أنت۔ آوانءِ بیڑاں سری لنکاءِ یک صدر و یک سر وزیرے ھم کشگ بیتگ أنت۔

تاکه سال 2000ءَ تاملاں وتی دمگءِ گيئشتر ھند دست گپتگ إتنت و مردمانءِ خیالا نیں آواں زیر کنگءِ ھچ راہ پشت نه کپتگ أت۔ ألبت ملکءِ توکا أنگت ھر نیمگا کوشت کؤشت بیگا أت۔ ھمے درگتا ناروےءَ تامل و سری لنکاءِ سرکارا صحل بندگءِ کار بنا کت۔

ناروےءَ دوئیں ٹولی ملکءِ واکداریا شریدار بیگءِ سوج دات أنت۔ ألبت تامل ٹائگرانءِ پرباکرنءَ 2002ءَ حالکارانءِ دیما گشت کہ آئی ھچ سبب نہ گندگا إنت کہ تامل شہ وتی آزادیءِ جهدا دستبردار بہ بنت و واکداریءِ شریداریءِ سرا گوں سنھالیاں ھؤر بہ بنت!

وھدے کہ أمریکاءَ 'وار آن ٹرر' بنا کت، گڈا دنیاءِ بازیں آزادی لوٹوکیں سلاحبندیں ٹولی 'ٹرورسٹ' ظاھر کنگ بیت أنت و گوں آواں کاربار کنگ مھن کنگ بوت۔ تامل ٹائگر ھم ٹرورسٹ گلے منـّگ بوت۔ إیشیءِ سببا تاملان باز تاوان دیت و سری لنکاءِ سرکارا سیاسی پلانگری رس إت۔

چدا پد سری لنکاءَ نوکیں سلاح و سامان دستا کپ أنت۔ آئیءِ فوجا پدا سکینکاری رس إت و رندا پہ تاملانءِ ولگوج کنگا فوج پیش کنزاں بیت۔ گشگ بیگا إنت کہ سری لنکاءِ فوجا نوکتریں سلاح، سکینکاری و راهشونی دیگا پاکستانءِ دست ھؤر بیتگ۔

سری لنکاءِ یکـّوئی پیش کنزگاں و تاملانءِ تاوانباری سبب جوڑ بیت أنت کہ سری لنکا 17 مئے 2009ءَ وتی سوبینیءِ جارا بہ جنت و تامل جنگولاں ولگوج کنگءِ شادھیا بہ کنت۔ روچےءَ رند پرباکرنءِ کشگءِ جار ھم سرکارا جت۔

ألبت وتی نوکتریں بیانےءَ تامل ٹائگر گشگا أنت کہ پرباکرن وش و سلامت إنت۔ آئی پہ تاملانءِ عزتءِ برجاہ دارگ و آوادیا وتی جھدا دیما برگا دست گٹ إنت۔

چدا پیسر یک حالے شنگ بیتگ أت کہ آئیا گوں وتی کنبءِ مردماں زھر وارتگ و وتکوشی کتگ۔ پرچاکہ سوگند ئی وارتہ بیتگ کہ زندگا وتا ھچبر سری لنکاءِ دستا نہ دات۔

إے سرجمیں راستیانءِ بیان کنگا رند یک دگہ راستیے کہ آئیءِ ناما گرگ ضروری إنت، إیش إنت کہ لیڈر سوبین إبنت، کشگ إبنت، پد کنز أنت و یا بیران إبنت؛ ألبت راجی آزدایءِ واھگےءِ کشگ بیگءِ دَروَر ماں تاریخءَ درا نہ بیت۔ مرچی نہ باندا پدا إے واھگ چورک جن أنت، پدا نوکیں لیڈر جوڑ إبنت و جُنز پدا بنا إبنت۔ ألما آیوکیں دئور تاملانءِ باروا ھم هنچوشیں جاورانءِ شاھد بیت کنت۔

ریفرنس:
http://www.bbc.co.uk/urdu/world/2009/05/090519_srilankan_president_as.shtml
http://www.bbc.co.uk/urdu/pakistan/2009/05/090518_parbhakran_pics.shtml
http://www.bbc.co.uk/urdu/world/2009/05/090518_prabhakran_shakeel.shtml
http://www.timesonline.co.uk/tol/news/world/asia/article6316972.ece
http://www.radionetherlands.nl/news/international/6305461/Tamils-deny-the-death-of-their-leader
Rights reserved by www.balochinews.com

استمانی بیرق و سوت بلوچءِ پجّار أنت؛ میر خیربیار مری

میر خیربیار مری وتی بیانےءَ صوبائی وتواجھی لوٹوکیں سیاسی گل نشنل پارٹی و بلوچستان نشنل پارٹی مینگل ڈوبارتگ أنت۔ آئی گشتگ کہ إیشانءِ نزوریں لوٹانءِ سببا میاں اُستمانی کمیونٹیءِ دیما پہ قوم‏ءِ آجوئیا بیوکیں جهدءِ نام جھلتر کپگا إنت۔

روچتاک توارءِ ویبسائٹا شنگ بیتگیں بیانا مینگل پارٹیءِ حالرسینوک ثناءاللہ بلوچ ھم ڈوبارگ بوتگ کہ آئیا خیربیار مریءِ دادگاھیءِ ردا کمک کنگ و جینواءَ برجم دارگ بیتگیں دیوانا بهر زیرگءِ بٹاک جتہ بیتگ۔

دیمترا یک یکـّا ثناءاللہ بلوچءِ نزوریں گپ ظاھر کنگ بیتگ أنت و گيئش کتگ کہ أگر پہ قومی آزادیا مڑگا آ تھنا پشت بہ کپیت، پدا ھم دیما روان إبیت۔ پرچاکہ بلوچ شھیداں پہ آزادیا وتی خون رتکگ أنت و گوں شھیدانءِ رتکگيں خوناں آ ھچبر دغا نہ کنت۔

بیانا سرکچ دیگ بیتگ کہ بلوچستانء بیرق و قومی سوتا زور گریں پاکستانی سک نگیگ کتگ أنت۔ مرچی بلوچستانءِ ھر کنڈا جاھمنندیں بلوچ زھگاں گوں وتی بیرق و قومی سوتا مھر إنت۔
Rights reserved by www.balochinews.com

حادثواں چار کس مغربی و 4 کس مشرقی بلوچستانءَ کشت أنت

مشرقی بلوچستانءَ شہ کوئٹہ دیم پہ کراچی راھییں بسے مرچییں بامگاھا بیلہءِ نزیکا پچلیٹ إت۔ بسا سواریں مردمانءِ نیاما 4 کس جاہ پہ جاہ بیران و 28 کس ٹپی بوت أنت۔ جنگ آنلائن

مغربی بلوچستانءِ شھر واشءِ نزیکا دو روچ ساریا أفغان بروکیں یک 'پژو' گاڑییے پچلیٹتگ أت۔ اُستمانءِ ردا اودا ھم چار کس کہ آوانءِ نیاما 3 أفغان و گاڑیءِ ڈرائور ھؤر أنت؛ کشگ بیتگ أنت۔
Rights reserved by www.balochinews.com

پنچمی بَر إنت کہ وانگ سرجم کنوکاں شادھیءِ دیوانے برجم داشت

شہ مغربی بلوچستانءِ زانتجاھا وتی وانگا سرجم کنوکیں بلوچ ورنایاں شادھیءِ دیوانے برجم داشت۔ گوں دیواناں بازیں کساں تران کت و ورنایانءِ سوبینیءِ سرا وتی وشی ظاھر کت أنت۔

ماں 'پھرہ' شنگ بیتگیں حالےءَ وشی بیان بیتگ کہ إمبرییں دیوان شہ پیسری چاریناں أنگت شرتر دیما شتگ و نزیک 1500 وانوکاں بھر زرتگ۔

بیانا إمبری وانگ سرجم کنوکیں بلوچ 80 کس ظاھر کنگ بیتگ أنت و دیمترا داتگ کہ دیوان وشگپی و زیمل ھم إشکونائینگ بیتگ۔
Rights reserved by www.balochinews.com

خالد لانگوءِ سروکیا بلوچاں گوں یو إنءِ سروکاں گِدار کت

عکسءِ تها خالد لانگو ألطاف حسینءِ سرا بلوچی پاگ بندگا إنت۔

آنلائن شنگ بیتگیں حالے‏ءَ داتگ که بلوچ سیاسی راھشونانءِ ٹولییے خالد لانگوءِ سروکیا ماں إسلام آباد ' یو ان'ءِ مھمان بیت أنت و یو إنءِ مردماں آوانءِ منـّت گپت أنت کہ جان سولکیءِ رکـّینگا بلوچاں ھورکاری کتگ۔

خالد لانگوءِ ھمراھیا میر جان جمالی و نشنل پارٹیءِ حاصل بزنجو ھم شتگ أنت۔ مھماناں بٹ و گوشت وارینگا رند یو إنءِ نمایندوا اُمید ظاھر کتگ کہ بلوچستانءَ وتی کاراں پدا بندات بہ کن أنت۔
Rights reserved by www.balochinews.com

تامل ٹائگراں شکست منّ إت و سلاح إش دئور دات أنت

داتگیں عکسا تامل جنیں آدم گوریلا جنگ سکین دیگ بیگا أنت۔

ماں سری لنکا سرکاری واکانءِ دیما پہ تامل ھندانءِ آزادیا مڑوکیں تاملان شکست منّ إت۔ وتی بیانےءَ تامل ٹائگرانءِ گوانکو واجہ 'پتمانتن' گشت "جنگ وتی جوریں آسرا سر بیتگ۔ مئے گورا گڈی راہ پشت کپتگ کہ دشمنءِ دستا وتی مردمانءِ کشگ بیگءِ عذرا دیر بہ کنیں۔ ما فیصلہ کتگ کہ وتی سلاحاں دئور بہ دییں۔ مئے پشومانی بس همیش أنت که مردم کشگ بیتگ أنت و جنگا برجاه دارگا ما بے سوب بیتیں"۔

تامل ٹائگراںءِ شکست منـّگءِ جارءِ شنگ بیگا چیزے کلاک ساریا سری لنکاءِ سرکاری واکاں جار پرّینت کہ آواں تامل ٹائگر ولگوج کتگ أنت۔ إیشیءِ کشا ماں جنگزدگیں دمگا مانگیشتگین 50،000 ھنچنائیں مردم پہ سلامتی رکـّینتگ أنت۔ إے مردم تاملانءِ گڈی بنجاھیں جزیروا گوں جنگولاں ھور پشت کپتہ بیتگ أنت۔ جزیرہ تامل ٹائگراں شہ 1983 دیم پہ إنگو گون بیتگ۔ یوکے ٹائمز
Rights reserved by www.balochinews.com

سردار زادہ أختر مینگلءِ ترّتابءِ بَروَرد! چمشانک: ولید گربنی

سردار زادہ أختر مینگل گوں وتی ھمسنتاں ماہ مئے 2009ءِ بنداتا مکرانءِ ترّتابا دراتک۔ إے ردا آئیا ماں گوادر، پسنی، جیوانی، تربت، بلیدہ و پنجگور گوں پچیں دیواناں تران کت۔ ھر دیوانا گپڑے مردماں بھر رزت و ھر یک دیوانا یک وڑےءَ آئی إیرجنگ بوت۔ جاھے آئیءِ سیاست بد گشگ بوت۔ جاھے آئی پیسری کارکرد إیر جنگ بوت و دگہ جاھےءَ بلوچستانءِ بیرقا ماں وتی دیواناں نہ ھلـّگءِ سرا أختر مینگل گوں سنگتاں ڈوبارگ بوت۔

وھدے کہ مندءَ شھید غلام محمد بلوچءِ کٹمءِ لوگا پہ پُرسا شت، اودا ھم مردماں پہ دل آئی وش آتک نہ کت۔ ألبت بلوچی دودمانءِ ردا آئی إش پترءِ سرا نندارینت، جاہ و چلیم کت، و پدا پہ عزت شہ اودا رخصت إش کت۔

سردار زادہ أختر مینگلءِ إے ترّتابءِ مزنتریں مقصد پہ وتی گلا نوکتریں باسک جوڑ کنگ أت و ھستیں باسکاں پیش دارگ أت کہ آئیءِ بی إن پیءَ أنگت لھتے منـّوک ھست أنت۔ چدا پیسر حالجاھاں خبر تالان إتنت کہ مینگل پارٹیءِ بازیں باسک شہ گلءِ سروکاں راضی نہ أنت، پمیشا یک یکـّا در کپگ و راجپھازانءِ ھوربند 'بلوچ نشنل فرنٹ'ءِ گل و ٹولیاں ھؤر بیگا أنت۔

ھمے ترسا بی إن پی مینگلءِ بنجاھی دیوان کہ شش ماہ پیسر بیگی أت، أختر مینگلءَ نادراھیءِ ناما مھتل کنائینت و وتا ماں دبئی داشت۔ شہ ھمودا بیان دات کہ تنظیما پروشگءِ ھچ خطر نیست إنت۔ شہ نادراھیا وش بیگا رند آ ملکا چھر کنت و مرکزی دیوانا برجاہ داریت۔ ملکا چهر ئی کت و دیوان هم ھمے ماہءِ گڈی روچاں بیگی إنت۔ ألبت بازیں کسانءِ درکپگا رند بلوچستانءِ بازین دمگاں ماں گلا نمایندگی نہ بیتگ۔ إیوکا ماں خضدار لھتے کس بیتگ أنت و پدا غلام نبی مری ماں کوھلو تچ تاچا بیتگ۔

مکرانءِ ھمے ترّتابانءِ نیاما لھتے کس درگیجگ ھم بوت أنت کہ پہ 'خالییں جاھانءِ پر کنگا' درد إش وارت۔ آ گپا بل إت کہ جمھوری چکـّاساں ھمے دمگانءِ اُستمانءِ 10 کس ھم إیشاں ووٹ نہ دی أنت۔ پاچ بی إن إمءِ ھداروکی صدر عصا ظفرءَ نیں بلوچانءِ گيئشتر بھرا أصلی راجدوست جاہ آرتگ أنت۔ اُستمان گندگا إنت کہ کئے وتی ھجگیں جانا پہ چے مقصدا ندر کنگا إنت۔

ھمے راستیانءِ ردا سردارزادہ أختر مینگلءَ پہ وتی گلءِ رکـّینگا مرکزی کمیٹیءِ باسکانءِ برحقیں ڈوبارگانءِ دیما شکست قبول کنگی إنت۔ و آوانءِ دو مزنتریں لوٹ پیلو کنگی أنت۔ أول منـّگی إنت کہ إیوکا زری کمکءِ درؤشما دگراں کوشارینگ و وتا پہ آیوکیں وزیر اعلائیا رکـّینگ بلوچی راھبندے نہ إنت۔ و دومی وتی بیرقءِ بدلا مرچی منـّگ بوتگیں بلوچستانءِ راجی بیرق کہ راجی تپاکیءِ تچکتریں نشان إنت؛ ٹال کنگی إنت۔

Rights reserved by www.balochinews.com

إیرانی واکاں 132 پاکستانی دستگیر کت و پاکستانءِ دستا دات أنت

شہ تفتان سیمسرا إیرانی واکاں 132 پاکستانی دستگیر کت و پاکستانءِ دستا دات أنت۔ إے مردم بے إجازتا و چیرکائی إیرانءَ پترگءِ جھدا بیتگ أنت۔ إیرانءَ پترگا سوبین بیوکین گيئشتر پاکستانی و یا أفغانستانی ھمے راھا ترکی، یونان و پدا مغربی یورپءَ وتا رسین أنت۔ إنتخاب

گيئشتر وھداں سیمسری واک 10 تا 20 ھزار تمن (750 تا 1500 روپیا)ءِ بدلا مردماں بے إجازتا إیرانءَ پترگا ھلّ أنت، ألبت ھما وھداں کہ مزنتریں أفسرے پہ ترّتابا سیمسری بُنجاھاں کیئت، گڈا واکدار لب نہ زیر أنت و سیما بند کنگ کنگءِ ھوریا گاڑی و ھلی کاپٹرانءِ سرا پرتر و مانتر کن أنت۔
Rights reserved by www.balochinews.com

ماں إصفھان نشوی درمان بھا کنوکیں أفغان شہ سراوان دستگیر بوت

إیرانءِ سرکاری حالرسانےءِ ردا ماں إصفھان 2 ٹن نشوی درمان بھا کنوکیں أفغانستانی شہ مغربی بلوچستانءِ شھر سراوان دستگیر و بندیگجاھا راھی کنگ بوت۔

حالءِ ردا شہ أفغانستان آتکگ و إیران صوبہ إصفھانءِ شھر بیابانکءَ درمان بھا کنوکیں نوراللہءِ چیر ٹپـّگءِ جاہ ماں سراواں درگیجگ و شہ ھمدا دستگیر کنگ بوت۔

مغربی بلوچستانءِ بازیں ھنداں پٹان جاہ منند أنت و بلوچ آواں سنی بیگءِ سببا پہ کرایہ یا مفتا نندگءِ جاه دی أنت۔ شہ ھمے جاھاں آ نشوی درمان و دگہ کالایانءِ سوداگری کن أنت۔

لھتے ھنداں ٹیکہ دار جوڑ بیتگ أنت و شہ ھندی جفاکشاں أرزانتریں نھادےءَ شہ ماڑی بندگا بہ گر تا بند و سنداتءِ کاراں کنگا أنت۔ إیشیءِ سببا بلوچ نیزگار شہ لاپا کپتگ أنت۔

'ملی مذھبی' نامیں وتگڑیں بلوچ سیاستکارانءِ پشت پناھی ھم إیشاں گون إنت۔ سیاسی و سلاحبندیں جنگءِ پلانگری زیروکیں ٹولیں چؤش کہ جنداللہ إے ڈولیں سنیاں شہ بلوچ شیعواں گيئشتر أھمیت دے أنت۔
Rights reserved by www.balochinews.com

شہ گرانقدریں وانوکاں پھلی لوٹیں

گرانقدریں وانوکاں ھنچوش کہ شما مارگا بی إت، لھتے روچ إنت کہ 'بلوچی نیوز' ویبجاھا ویلے گپتگ و سرجمیں سیاھگ کہ حسابءِ سرا إیر کنگ بیتگ إتنت، پشت دیم بیگا أنت و 'ٹمپلیٹ' یک وڑا نہ اوشتگا إنت۔ ما جھدائیں کہ إیشی شر کنگ بہ بیت۔ ألبت إے نیاما ألــّما لھتے کلاکاں ویبلاگءِ تھا روگ بیت نہ کنت۔ إیشیءِ سببا شہ شما پھلّی لوٹیں۔

Rights reserved by www.balochinews.com

شہ واش دو برقی سیم دوزوکیں مردم دستگیر بوت أنت

مغربی بلوچستانءِ واکداراں دوکس برقی سیم دوزّگءِ ڈوبوا دستگیر کت أنت و بندیگجاھا دیمدات أنت۔ سرکاری حالجاهےءِ ردا عبدالغفور و عبدالحمید نامیں دو کس آوانءِ یک دگہ عظیم نامیں سنگتےءَ پاشک کتگ أنت۔

حالا دیمترا داتگ کہ گوستگیں دوسالاں 2182 کیلو برقی سیم دوزگ بیتگ۔

إے ردا گشگ ضروری إنت کہ برقی سیم شہ مغربی بلوچستانءَ دوزگ و مشرقی بلوچستانءِ راھا پاکستانءَ برگ إبیت۔ اودا إیش گرانیں نھادےءَ بھا إبنت۔

پہ سیمسری مردماں لاپ درگیجگ‏ءِ تیوگیں راہ ھمے وڑیں چیزاں إے دیم و آدیما گوازینگ إنت۔ ماں إیران نندوکیں أصلی تاجر فارس أنت و پاکستانءَ پٹان یا پنجابی أنت کہ إے شپوکیانءِ ثمراں گوَرروپ کن أنت۔
Rights reserved by www.balochinews.com

دو پنجابی پیش إمام گوں دوزتگیں مالاں دستگیر بوت أنت

پاکستانءِ تیابدپی شھر کراچیءَ دو پنجابی ملا شہ شھرا درکپگ و دیم پہ پنجاب روگءِ درگتا پولیسءِ دستا دستگیر و شہ آوانءِ گورا دوزتگیں چیز پچگرگ بوت أنت۔

مسیتانءِ پیش إمام حافظ محمد فیاض و قاری غلام فریدپوشءَ کراچیءِ سیریں مردمانءِ لوگاں گوں سلاحاں بیڑ برتگ و گرانبھائیں چیر شہ إے لوگاں پچ کپتگ أنت و یا دوزتگ أنت۔ آنلائن
Rights reserved by www.balochinews.com

ماں پھرہ بلاگا شنگ بیتگیں یک چست ایرے

واجہ ھیبت نبشت:
یک بهارگاهے بیگاهے واجه خسروی سایت پاچ کرت کے چے دگنیاے نوکین حال و احوالان مالوم دار ببان. بازین تیترانی برز و جل کنئگا واجه گربنی نبشتانکا منے دلگوش په نیم شریا گور کت. واجه گربنیا په یک نیم طنزین وڑیا پیش کش کتئگت کے بلوچستان راجی زرمبش گون جندلا ضم بیتئگ یا جندلا گون بلوچستان راجی زرمبشا ضم بیتئگ.

دیمترا واجه نبیسیت کے ا همے زوتان و گون یک بیتائیرین و هدوناکین دلے راه چارانت کے چوشین جاری شنگ ببیت کے جندلا و زرمبش ضم بیتئگنت. دیمترا واجه گربنی نبیسیت و من غموارین دولیا دست بندی کنت کے بلوچستان راجی زرمبش لیبرالین باسک اگر من اے هوریا وش نبنت گڑا وتارا دیئر مکشنت و نوکین حزبی یا سازمانی جوڑ مکننت, تنکے بلوچان گیشتر ناتفاکی اماج مبنت.

عزت مندین وانوکان شمے دلگوشے منت وارون و چے شما دزبندی کنان کے بیاین هورگیا پٹ و لوٹ کنین کے واجه گربنی پرچیا چوشین تروپشین طنز جنت و پرچیا اے طنزانی گیشترین کمان دیم په جندلا نیمگا کمان کتئگنت. جندلاے کے مرچے بلوچ حیثیت وابرو درجه هما منزلا سرکتئگ کے یک زمانی شهید نامور و بلوچ پجار دادشاه بن کمال, شهید دوست محمد خان غیره و غیره سر کتئگ.

عزیزین وانوکان بیاے یک رندے پد هوریگا بچارین بارین واجه گربنی پرچیا چشین تروپشین طنز جنت و جندلا چے کتئگ اے واجه چوشین طنز نبیسیت. جے اگر هوریگا ا نبشتانکا هیرت چار بکنین گرا سرپد بئن کے جندلا ردی چیئنت. جے جندلا ردے اشنت کے ایانا بلوچستان تاریخی بیرک کے سبز و سرانت و ای تها ماه استارے ماننت و کلمه لاالی الله محمد روسول الله ص ماننت ای واجه گیزے چست کتئگ.

من اے گیز بیئگے سببا سر پد بیت نبان, پرچیا کے اے واجه نے کمیونیست و نے انترناسیونالیتسی بلکین صاپ و پلگارین ناسیونالیستے. یک نیمگے ناسیونایست و دومے نیمگا ا نشانیانی کے قومی پجارے بن خشت انت و ایانی جل جنئگ و کمرنگ کنئگ یک پارادوکسی کے اے جواب واجه گربنی وت جواب دات و بس.

ما اگر بلوچ تاریخا کمے دلگوش بکنین گرا هم سرپد بئن کے اے بیرک هما بیرک انت کے رند چاکر اعظم حکومتیا ائی جوڑ کنوک بزان نصیر خان نوری عظیما سجهین بلوچستانا و اولی رندا من یک منسجمین و یک مدرنین دولیا م قائم کتئگ و من دلا جزمان کے تو هم اے گپے تفاکیا کنے.

من گوشان اے پال نیک انت اگر جندلا وتی لعتے ردیانی کے شروعات بیتئگنت و ایانا مزمت بکنت و زرمبشی هم همت بکننت اے فرصت تاریخی کے په بلوچ قوما پیش اتکگ من یک زمه وارین دولیا دیما ببرنت و اے زمه وارین بار هما وهدے په منزلا سر بیت کے زبان و دست هور ببنت, مطلب اشنت کے زرمبش زباننت و جندلا دست.

ولیدگربنی پسو دات:
وشیں کوششے بلے نہ! من اے تلکا نہ کپاں۔ من شہ ادا گوستگاں و سرپداں کہ نتاوھدی چاکر زندگ ات، قلاتء خانان پرّیں گینے ساہ ھم زرت نہ کت۔ ایشی نواب بگٹیء شھادتا رند ات کہ خان قلاتا ھمت کت۔ ھرجاہ چیردستانء بیگء ضرورت وا ھست انت۔ ایشیا من رد نہ کناں۔ ایش ھنچیں وھداں دردا ور انت۔دادشاہ وتی دھرء ھیروے ات و واجہ ریگی وتی دھرے انت۔ البت نہ دادشاہ راجی راھشونے ات، نے کہ ریگی تنے وھدی وتی کوّاسی پیشداشتگ۔ امید بہ کنیں کہ اللہ ما درستاں راھشونی بہ دات کہ ما پہ عبادتا مسیتاں بہ روین و سیاستا پارلمنٹاں۔ھچ کس دستشودانء تھا نان نہ وارت و ھچ کس وراکجاھاں دستشودی کار نہ کنت۔ ھر چیزا وتی جاہ و مقامے ھست۔ ھر پیم وش بیتاں کہ یک دگہ بلوچی سیاھگے دیستان۔

بلوچ سکولار گشت:
جناب هیبت شما از کاری که انجام دادی از آقای گربنی ودیگر روشنفکران بلوچ انتظار دارید که به شما دسته گل هدبه کنند. نه جانم شما با انتخاب این پرچم اسلامی ثابت کردی که خیلی از سیاست امروزی عقب هستی. شما با انتخاب این پرچم به نیروی افراطی جندالله باج دادی از مردم فاصله گرفتی .. در این خلوت پری رویی نیامدصدای پای آهویی نیامدبهار رفته باز آمد دوبارهبه بام پرستویی نیامد

بلوچ سرمچار گشت:
ولیدا نہ دین است و نہ ایمان ھر روچ یک نیمگے روت۔چہ ایشیا ھچ وڑین انتظارے بلوچ قوما نیست

ولید گربنی پسو دات:
من میریں بلوچے آں

منی دین انت بلوچ

کلمہ و قرآن،

منی یاسیں انت بلوچ

البت 'راجی زرمبش' (مغربی بلوچستانء ٹولییے) انت کہ وتی راھی گار کتگ۔ من ھمے شئور دیاں کہ راجی زرمبش پدا بلوچء سیاستا بھر بہ زیریت و جندولاھا بلّیت کہ مسیتاں اسلامء درسا بہ دات۔ ھنـّی وا ملا واکدار انت، اگر باندا بلوچانء دستا واک بہ یئت، گڈا شہ مسیتاں ڈن اسلامء ناما فساد کنگء اجازت دیگ نہ بیت۔ جندولاہ بہ بیت یا زرمبش۔

پشتونخواہ عوامی پارٹی دستمانجنی مہ کنت؛ بی إس او -آزاد

بلوچ إسٹوڈنٹس آرگنائزیشن -آزادءِ گوانکوا پشتونخواہ وانندہ گلءِ سلاحبندین باسکانءِ دستا وتی ھمبل علی أکبر بلوچءَ کشگءِ جُھد إیر جت و گشت کہ بلوچ و پنجابیانءِ جنگا پشتونخوا عوامی پارٹی و آوانءِ چیردستیں وانندہ گل دستمانجنی مہ کن أنت۔

بی إس او -آزادءِ گوانکوا دیمترا درشان کت کہ پشتونخواہءِ إے ڈولیں کارکرد ھنچیں آسے جنبور کن أنت کہ ھچ کسءِ گمانا ھم نہ آتکگ۔ إے آس کوئٹہءَ مانداریت و رگزا کاربار کنوکیں پشتون باز تاوانبار إبنت۔

گوانکوا دیمترا گشت کہ بلوچ وتی آزادیءِ جنگا مڑگا أنت و شہ پنجابی جفاکشا بہ گر تا اُستاد و ملا پھک بلوچانءِ کشگا ساڑی أنت. پمیشا آ بلوچانءِ دشمن أنت و شہ بلوچستانءَ در بہ کپ أنت۔

گپانءِ تھا حَیرانی پیشدارگ بیتگ کہ ھمے پشتون مان مالاکنڈ و سوات دمگاں پنجابیانءِ لوگانءِ مال و عزتا پُلگا رند آواں شہ صوبہ سرحد تاچینگا أنت، بلے بلوچستانءَ ھمے پنجابیانءِ گـُشگءِ سرا بلوچانءِ آزادیءِ جنزءِ دیما دارگ جھدا أنت۔ توار
Rights reserved by www.balochinews.com

دلپدردی

بلوچی نیوزءَ رستگیں حالےءِ ردا نامداری بلوچی شاعر، کوّاس و بلوچی کلچر کونسل -أماراتءِ سروک واجہ رفیق أبدالءِ آریپیں بیت 13 مئےءَ بیران بیتگ۔

واجہ رفیق أبدالءِ پتءِ بیرانیا بلوچی نیوز دلپدردی درشان کنت و دعا کنت خدامرزیءِ روح شاد و إیمن بہ بیت، و پروردگار آئیءِ سرجمیں اوبادگاں إے تاوانا اوپار کنگءِ واک بہ دات۔

Rights reserved by www.balochinews.com