فیصل میر غلامحسین بلوچءَِ گوں گالگدارے

فیصل میر غلامحسین بلوچءَِ گوں گالگدارے

جست و رد بند دیوگ ولید گربنی

ورنائیں فیصل میرحسین بلوچ گوں وتی مات و پتا کسانسالیا لندن آتک و ھمدا جاھمنند بیت۔ فیصل بلوچ شہ کسانسالیا وتی پھتویءِ سببا ماں إسکولا نامدار بیت۔ صداں إسپیت، سیاہ، ھندی، پاکستانی، إیرانی و شہ دنیاءِ دگہ کنڈاں آتکگیں مردمانءِ زھگاں فیصل بلوچءَ یکـّوئی باج برت۔ پدا آئیءِ دلا ھب کت کہ معیشتءِ پڑا دیمترا بہ وانیت۔

ھمے پڑ آئیا رندگیری کت و گریجویشن کنگا پد آئیا ماسٹری ماں 'إنشورنس بزنس و رسک منیجمنت' سرحالا 22 سالءِ عمرا سرجم کت۔ إے وھدی آئی سرمایه گزاری کنوکیں جرمن بنکےءَ کارا إنت و ألکاپیں پگار گرگا إنت۔ إیشیءِ کشا لندنءِ بلوچ أنجمنءِ حسابداریءِ ذمواری فیصل بلوچءِ کوپگان أنت۔

بلوچی نیوزءَ یک گالگدارے گوں فیصل میرحسین بلوچ کت و شہ آئی لھتے بُنـُکی جست کت أنت۔ بیا إت ھؤریا جست و پسّواں وانیں۔

بلوچی نیوز: منا یاد إنت کہ وھدے تو ماں برطانیا أولبرا سر بیتئے یکـّے شہ چالاکیں زھگان إتئے۔ ألبت آوھدی چاگردءِ آدگہ زھگانءِ وڑا لئیباں گيئشتر ھبناک إتئے۔ أناگتا معیشت وانگا تو چؤنکا ھدوناک بیتئے؟

فیصل بلوچ: ھو، راستے۔ کسانسالیا مردم چاگردءِ چکـّانءِ ھمردیا دیما رئوت۔ ألبت چاردہ سالگیءِ وھدا یک کٹمی دوستےءِ کارکردا منی سرا باز أثر کت۔ آئی 'إسٹاک إکسچنج'‏ءَ 'بروکرے' أت۔ وھدیکہ ماں إٹلی و إدا لندن وتی کار، ترّتاب و آسودگین زندءِ قصّہ آئیا آرت أنت، و ألکاپیں پگارءِ خبر ئی کت، گڈا من مار إت کہ إیشی ھنچونائیں پڑے نہ إنت کہ مردم صحبا کارا رئوت و بیگاھا چھر کنت۔ إے پڑ باز شاھگان و دیمروئی راہ پچ أنت۔ پمیشا ھمے پڑا وانگءِ فیصلہ کت۔ و ھمیشیءِ رند داشت۔ إے ردا من معشیتءِ باروا وتی إسکولی کتابانءِ کشا 'فائننشل ٹائمز'ءِ وڑیں حالتاک ھم چاراں کت أنت۔ إے وڑا منی شوق ودّان بیت۔ ھمے سرپدیانءِ ھمردیا من یازدھمی و دوازدھمی کلاساں وانگءِ مضمون ھم گچين کت أنت۔

بلوچی نیوز: شہ چاردہ سالگی پد تئی دلگوش دگہ نیمگےءَ ھجبر شتگ؛ تئی دلا آتکگ کہ إے بنکنک و معیشتءِ پڑ نگیگیں پڑے بیت کنت، إیشیءِ بدلا دگہ پڑےءَ بہ وانئے؟

فیصل بلوچ: پیسرترا دلگوش إنگر آنگر شتگ کہ سائنسدانے بہ بیاں، کمپیوٹر پروگرامرے بیاں۔ ألبت شہ چاردہ سالگیءِ فیصلوا پد من یکـّیں راھا یکـّوئی دیما روان بیتاں۔ ھنچیں وھدےءِ ترانگا نہ کپاں کہ من دگہ پڑےءِ دربرگا واھوک بہ بیاں۔ منی دلا چشیں خیالے ھم نیاتکگ کہ إے پڑ پہ من شر مہ بیت۔

ھنوں کہ من نِگوَمیں کلاکاں شہ وابا پاد کایاں و کارا رواں، بلے منا وتی پڑا کار دوست بیگا إنت۔ و گلاں۔

بلوچی نیوز: وتی مولکل یا ھفتگءِ گڈی روچاں 16 یا 17 سالگیں ورنا وانگءِ کشا کارے گر أنت۔ آوانءِ مقصد ھمے بیت کہ پہ زانتجاھی وانگانءِ خرچا چیزوکے زر جمع بہ کن أنت۔ پدا ھما کارا ھنچؤش دلگوش إبنت کہ وتی وانگاں یلہ دی أنت۔ شاید ترا ھنچیں پجّاروک ھم بیتگ کہ ھمے راھا شتگ أنت۔ تو چؤنکا وتا گِستا داشت کتگ؟

فیصل بلوچ: ھو! سک آسودگ إنت۔ وھدے کارے دستا بہ کپیت و زر کٹـّگا بنا بہ کنئے۔ ھرچیزے کہ دل بہ لوٹییت؛ زرت ھم کنئے۔ پہ وت شرّیں ٹلفنے، ماشینے و ھنچؤش۔۔۔ ألـّما إیش ھداروکی شرّ أنت۔ ألبت أگر مردم سانگ بہ کنت، چک چلانگا سر بہ بیت، گڈا پریشان إبیت۔ پرچاکہ ھما زرّے کہ ورنائیا دستا کپگا بہ بیت پہ جندءِ خرچاں مشکلا سرجم إبیت؛ کجا پہ چک چوریگان رسیت؟

وتی کالجءِ وھدا من یک سپرمارکٹےءَ کارا إتاں۔ کلاسءِ سرجم بیگا رند من دو تا سئے کلاک روچے کار کتگ۔ إیشی پہ منی گيئشیں خرچاں شرّیں آمدنے أت۔ ألبت ھچـبراں ھچبر منی دلا إے نیاتکگ کہ وتی وانگا یلہ بہ دیاں۔ ماں جھان شہ ھرچیز ضروریتریں چیز پہ من وانگ دربرگ بیتگ۔

ألمـّا وانگءِ نیاما برے برے مردمءِ چم سنگتان کپ أنت کہ شادھی کن أنت، پارٹی و مچّیان رو أنت و من نشتگ کتابجاھا وانگا گولائیشاں! دل باز گشیت۔ بلے پدا مردم حساب بہ جنت، گڈا سرپد بیت إنت کہ وانگ بے قربانی دیگا دربرگ بیت نہ کنت۔

ھما پارٹی و مچّیاں کہ مرچی من روگایاں، فکر نہ کناں کہ ھما دئورا یک سنگتے شتہ بیتگ۔

بلوچی نیوز: ھنچنائیا گشگ بیت کہ شرّیں پت و ماتانءِ چک ألکاپ إبنت، شرّیں ردوم إش رسیت و وانگ ألکاپیا دربر أنت۔ تئی مات و پتءِ کرد تئی وانگ دربرگا چؤں بیتگ۔

فیصل بلوچ: بے درور! مات و پتءِ کارپد بے مٹ أنت۔ آوانءِ کارکرد بُنردی و ضروری بی أنت۔

منی خیالا شرّیں مات و پت وتی زھگاں آوانءِ ردیاں بہ گش أنت۔ ھؤریا آواں لھتے فیصله کنگءِ موہ ھم بہ دی أنت، تانکہ آ ردی بہ کن أنت و ھمے ردی ھیلکاریءِ بنداتی راھشون بہ بنت۔

منی وتی مات و پتا منا شہ کسانسالیا دل أڈی داتگ کہ من بہ واناں۔ ألبت کسانیا من آوانءِ سکین سرکچ وارت نہ کتگ۔ رندا من پوہ بیتاں کہ إیش منا شرّیں راھے پیئشدارگا أنت۔ ألبت آواں ھچـبر منا خاصیں پڑےءَ وانگءِ سکین نہ داتگ۔

بلـّی توریں منی مات یا پت پہ وانگ دربرگا زانتجاھا نہ شتہ بیتگ أنت، بلے آواں منی تھا ھستیں جوھر مار إتنت و منا یکـّوئی پہ وانگا سکین دیان إش کت۔ گشتنے کہ شہ زھگانءِ جندا مات و پت وتی زھگاں شرتر پجّاہ کار أنت۔

منی پات و پتا أگر وانگ سرکچ نہ وارتگ أنت، پدا ھم گوں من نشتگ أنت و منا گوش إش داشتگ؛ چؤش نہ بیتگ کہ منا بہ گش أنت "بچہ برو، ما دستگٹیں"۔ ھر روچ منا جست إش کتگ کہ منی روچ چؤن گوَستگ۔ و من آواں سرجمیں حال داتگ أنت۔

بلوچی نیوز: تو کسانسالیا ماسٹری گپت! ترا چنچو سال أت؟

فیصل بلوچ: من 22 سالگیا ماسٹری گپت۔ شہ 'بچولری'ءِ سرجم کنگا پد من تچکا ماسٹری وانگ بنا کت۔

بلوچی نیوز: بازیں مردم پہ بچولریءِ سرجم کنگا مانگيشتگ أنت و ھمے کہ سوبین بی أنت وتی ڈگریا زیر أنت و پہ کارےءِ درگيجگا دِرک کن أنت۔ تو چؤنگا ماسٹری کنگا واھؤک بیتئے؟

فیصل بلوچ: مردم فرق کن أنت۔ لھتے ھنچؤشیں ھست أنت کہ بچولریا سوبین بیگا رند کارے دست گر أنت و چیزے سال رندترا ماسٹری کن أنت۔ دگہ لھتے سرپد بی أنت کہ ھر دوئیناں یکپارگی سرجم کنگءِ سیت گيئشتر أنت۔

من ھنچؤش مارگایاں کہ مدام أدبیاتی مردمے بیتگاں۔ أنگت ھمے مارگایاں۔ من مدام ھیلکاریا دستگٹ بیتگاں و إے پڑا یلہ دیگ پہ من آسودگ نہ إنت۔ لھتے ھنچؤشیں مردم ھست أنت کہ یکبرے وانگا یلہ بہ دی أنت، پدا گوں آواں إے پڑا چھر کنگ بیت نہ کنت۔ ألبت منی خیالا أگر شہ وانگا گستا گوَستگیں وھد شرّیں پڑےءَ گوازینگ بہ بیت، گڈا مردمءِ دلگوش شہ ھیلکاریا نہ ٹگلیت۔ پدا چھر کنگ و دیمترا وانگ جیڑوے نہ بیت۔

بلوچی نیوز: بازیں کس کہ تئی وڑیں مردمانءِ باروا إشکن أنت، ھمے فکر کن أنت کہ إیشی برطانیاءَ جاھمنند إنت، إدا وانگ مفت إنت و إیشیا شہ إے آسراتیا سوب کتگ۔ من کہ ھمدءِ نندوکیاں؛ زاناں کہ إے وڑیں وانگا دربرگءِ خرچ باز إنت۔ تئی وانگءِ خرچ چے وڑا دیگ بیتگ أنت؟

فیصل بلوچ: منی بھت شر أت کہ پہ ماسٹریا منا 'إسکالرشپ' رس إت۔ بچولریءِ دئورا منی شریں کارکردءِ برکتا منا إسکالرشپ رس إت۔ پہ إیشی ألمّا من پھر بنداں۔ پرچاکہ منی پیسری جھدءِ پجّارے أت۔

ألبت پدا ھم إسکالرشپا منی سرجمیں خرچ پیلو نہ کت أنت۔ کورسءِ جندءِ فیس بیست ھزار پاؤنڈ أت۔ إیش من وام کت و أنگت واماں دیگایاں۔ پدا ھم پہ من إیشی ألکاپیں پڑےءَ سرمایہ گزاری کنگءِ کارے أت۔

إے خبر وا حق إنت کہ ھما بُنردی آسراتی إے ملکءِ وانوکاں ھست أنت، سئمی جھانءِ ملکاں جاھمنندیں وانوکاں نہ رسگا أنت، بلے یکـّے بہ لیکیت کہ إدا ھر چیز مفت إنت، روا نہ إنت۔ پدا وانگءِ پڑا مردمےءَ وانگءِ ھب مہ بیت، إیوکا أمیریں ملکےءَ نندگ آئیا وانگءِ نیمگا نہ بارت۔ ضروری إنت کہ وانوکءِ جندا جوھر بہ بیت۔

پہ مثال 'مائکرو کریڈٹ' فلسفہءِ درگيجوک ماں ھندوستان دمگا نندوک أت و شہ یک نیزگاریں کٹمےءَ دراتکگ أت۔ ھمے مردا مرچی 'نوبل داد' رستگ۔

إیشی شون دات إنت کہ وانگءِ پڑا پہ مقامےءَ سربیگا أمیر بیگ ضروری نہ إنت؛ پہ وانگا ھب و واھگ پکار إنت۔

بلوچی نیوز: ماں إے ملکا بازیں مردم نسلپرستیءِ گپا جنت و نسلپرستیا وتی ناکامیانءِ سبب ظاھر کن أنت۔ تئی وانگءِ دیما إے وڑیں چیزے ھچبر آتکگ؟

فیصل بلوچ: نسلپرستی وا ھست إنت۔ و مدام بیت إنت۔ ألبت په إیشی مردم وتی کِشکا یلہ نہ دات۔ شرتریں راھبند نسلپرستیا ڈالچار کنگ و پیئش کنزاں بیگ إنت۔

نسلپرست لوٹ أنت کہ مردم آوانءِ ڈوبارگاں پسّو بہ دات۔ ھمیشی شہ أصلی کشکا مردما در کنت۔ ألبت أگر وتی 'دایرہ'ءِ تھا آواں آیگا مہ ھِلّئے، گڈا آ ناکام بنت إنت۔ بزان آ شہ پڑا ڈن بندیگ کنگ بہ بنت۔ أگر مردم گوں إے وڑیناں بہ نندیت و سیرک پیماز بہ کنت، په آواں سیت و مردما تاوان إنت۔ باید مغز کاربندگ بہ بیت و آوانءِ تلکا مردم مہ کپیت۔

بلوچی نیوز: تو أنگت وانگا إتئے کہ ترا ھنوگیں بنکا گچین کت؟

فیصل بلوچ: ھو! من ماسٹری کنگا إتاں کہ إے بنکا پہ آواں کار کنگءِ صلاح منا جت۔ من چار إت و منا دوست بیت۔ بادے مرچی کارایاں و منا دوست بیگا إنت۔ پہ وشی صحبا بُست کناں و کارا رواں۔

سرمایہ گزاریں بنکےءَ کار کنگءِ برکتا من سرجمیں جھانءِ مارکٹا گنداں۔ شہ وتی بنکءِ نیمگا سرمایہ جنگءِ دراں چاراں و ھمیشانءِ سیت و تاوانانءِ حسابا جناں۔

بلوچی نیوز: ترا هنیگان یک دادے ھم رس إت۔ ھمیشیءِ باروا به گش!

فیصل بلوچ: ھو۔ منا پہ ' تیسس'ءَ دادے رست۔

بلوچی نیوز: إے دادءِ ھؤریا ترا بازیں زرّے ھم رست؟

فیصل بلوچ: ھو، زر ھؤر أت۔ ألبت پہ من منی جھدءِ پجّارگ بیگ لایقتر إنت۔ إیشی کوَاسانءِ یک پجّارے إنت کہ منی پونزا بُرز بارت۔ پدا إے ھم پیئشدارگا إنت من باز جُھد کتگ۔ پہ وتی تیسسا من روچے چاردہ تا پانزدہ کلاک پولکاری کتگ۔

بلوچی نیوز: ھزاراں کسانءِ نیاما پہ إے دادا گچین بیگا پد تو چےءِ سرا پھر بندئے؟ پھر بندئے کہ برطانیاءِ نندوکئے؟ پھر بندئے کہ إدءِ مسلمانئے؟ گيئشتر چے مارگائے؟

فیصل بلوچ: وتی أصلیتءِ دیما آرگا أبید پھر بنداں۔ ھر ملک و مذھبئے بہ باں پہ من پھربندیءِ گپ إنت کہ یک سوبینین مردمے آں۔ گشت کناں کہ منا وتی بلوچیءِ سرا پھر إنت، بلے دادءِ باروا من سادہ بہ گشاں کہ منی جھدا ثمر دات باز شر بیت۔

بلوچی نیوز: ھنیگیں کاری چاگردءِ باروا کمّے بہ گش! ألـّما تئی کش گوَرا عمرا مزنتریں مردم کارا بی أنت، یک کسانسالے بيگءِ سببا ترا چونگا چار أنت؟

فیصل بلوچ: ھنیگیں کاری چاگرد بے مٹ إنت۔ بلــّی توریں من کسانتراں و دگرے مزنتر إنت۔ ما پھک یکّيں جاگھا کارائیں و ھؤریا فیصلہ کنیں۔ شہ جوشا گستا ھر فیصلہ پہ ھؤش إبنت۔ یک کسے ھمنچو بہ زانت، بلے دئومی کس چیزے زانت کنت کہ أولی ترانگا نہ بیتگ۔

بلوچی نیوز: ألمـّا پہ ما تو یک کامیابیں بلوچ ئیے۔ پہ ھمیشی تئی کٹم ھم پھر بندیت۔ بازیں کس، خاص وانوک تئی خبراں وان أنت، گل بنت إنت کہ یک بلوچے سوبین بیتگ۔ بیت کنت که شہ آواں بازیں کس تئے رندگیریا بہ کنت یا شہ تو أنگت شرتریں منزلے رسگءِ جھدا بہ کنت۔ تو آواں چے سرپدی دات کنئے؟

فیصل بلوچ: إیشی هر یکءِ جندءِ سرا إنت۔ کش کرّی باز گش أنت۔ ألبت وانوکءِ جند أگر شه وت دلجم بہ بیت کہ آئی مقامےءَ سر بیت کنت، گڈا ألمّا رسیت۔ پمیشا وانوک ھداروکی و نزیکءِ فیصله کنگءِ بدلا دیرچاری بہ کنت۔ وتی جند جست کنگ بہ بیت کہ باریں 10 تا 12 سالا رند کجا جاگھا سر بیت إنت! پدا حساب بہ جنت باریں پہ ھما جاگھا رسگءِ توشگ گون أنت یا نہ!

پہ نندگ و اُمید کنگا ھچ رس إت نہ کنت۔ أگر چیزے لوٹئے، گڈا پہ آئیا بہ تکش۔ راھا بازیں گر کٹ کاینت۔ إیشانءِ سببا وتی راھا یلہ دیگ روا نہ إنت۔ ھچ چیز آسودگ نہ إنت، نے کہ ناممکن إنت۔

وانگ دربرگ ھما وھدی وش إنت کہ دلءِ واھگ ھمراہ بہ بیت۔ أگر واھگ گون نہ إنت۔ گڈا بے سیت إنت و ھمے بی سیتی زندگیا مدام گون بیت إنت۔

بلوچی نیوز: شہ إے پھکاں گستا همے گشگ لوٹاں کہ تو قومی کاراں ھم گونئے۔ یکـّے شہ لندن بلوچ کمیونٹیءِ راھشونانئے۔ باریں بہ گش کہ چے چیزا ترا إے نیمگا کشّ إت؟ پدا دگہ بلوچ ورنایاں چؤنکا سکین دات کنئے کہ ھمے پڑا گون به بنت؟

فیصل بلوچ: من ھمے ملکا رُستگاں منی نیک بد ھمدا إنت۔ ألبت وتی ریشگاں شموشگ روا نہ إنت۔ آوانءِ نیمگا چارگا پد ڈاھی رسیت کہ ما یک سرڈگارےءِ واھندیں کہ شہ ھر نعمتا ھستومند إنت۔ دودمان بہ بیت یا مالی مڈی ھر پڑا بلوچستان سراگاہ إنت۔

ھرچے کہ مئے قومءِ سرا گوَستگ؛ گوَستگ۔ ھما گوَستگینانءِ سرا نندگ و أرس ریچگ جیڑواں نہ ٹھینیت۔ مئے (راجی) مشکلان کم نہ کنت۔ باید بُست بہ کنیں۔ خاص جوان سرپد بہ بنت کہ لھتے اُستمانی ذمواریان آوانءِ کوپگ پکار أنت۔ یورپ و دگہ سراگاھیں ملکاں جاھمنندیں بلوچاں مارگ لوٹیت کہ بلوچستانءِ بازیں ورنا پدا أنت۔ پدا بیگءِ سبب آواں وتی واهگ نه أنت؛ سبب إیش أنت کہ آ پدا دارگ بیتگ أنت۔ إنگـری بلوچاں ھنچؤشیں دلسیاھی نیست إنت۔ وانندویں بلوچ ورنا یک 'نٹ ورک'ئے بہ ٹھین أنت، وتا یکجاہ بہ کن أنت و آنگری بلوچ ورنایاں راھشونی بہ دی أنت و یا کمک کن أنت۔

بلوچی نیوز: تو سرپدئے کہ بازیں بلوچ وانندہ إنگو ھست، بلے پھک قومپرست نہ أنت۔

قومپرستیءِ باروا بہ گشاں کہ أگر زوراکیں قومے قومپرست بہ بیت، گڈا آئی نزوراں پادمال کنت۔ ألبت أگر پادمالیں قومے قومپرست بہ بیت، گڈا آئی آزادی پسندے حساب بیت إنت۔

پہ ھما وانندویں ورنایاں کہ قومءِ دوستی إش نیست إنت، تئی کلہ چے إنت۔

فیصل بلوچ: من ھمے گشاں کہ شما وتی زندا باز جھد کتگ۔ شمارا سوبینی رستگ۔ پہ إیشی قوم شمئے سرا پھر بندیت۔ پہ مراد بات إت۔ ألبت وتی خیالی جھانا وتا گار مہ کن إت۔ شمئے ذمواری إنت کہ قومءِ داتگیں قربانیاں شموشکار مہ بی إت۔ و ھنچؤشیں کار کن إت کہ شمئے سرا قوم أنگت گيئشتر پھر بہ بندیت۔

بلوچی نیوز: فیصل بلوچ گوں تو دیوان کنگا باز وشی بیت۔ ألمّا آیوکیں وھداں گوں تو دگہ دیوان بیت و شہ تو گيئشتر سرپدی زرت کنیں۔ وتی جھد و مقصداں سوبین باتئے۔

فیصل بلوچ: باز مھربانی۔

بلوچی نیوز داٹ کام