بی آر پی و بی آر اس اوءَ شاباش بات

ھنچیں وھدےءَ کہ مشرقی بلوچستانءِ بلوچ ٹولی یکـّا دگرا غدّار و ایمانداریءِ سرٹیفیکٹ دیگا انت، بی آر پی و بی آر اس او ایوکیں تنظیم انت کہ اتحادءِ دستبندی کنگا انت۔ چیرا داتگیں دو بیان اردو زبان حالجاھاں شنگ بیتگ انت کہ آوانءِ گيچینی خبر پہ وانوکاں ترّینتگ انت۔

بی آر پی 23 جولائی –بی یو سی نیوز: بلوچ قومپرست گلانی نیاما اختلاف و گال جنگی پہ قومی تپاکیا گرانیں تاوانے انت۔ اگر انگت بلوچاں وت ماں وتی اختلاف یلہ نہ دات انت، گڈا مئے نام و نشان گار بی انت۔ گال جنگیا دستگیں ٹولی دشمنءِ کارا آسان کنگا انت۔

وھدءِ ضرورت ھمیش انت کہ ھما مردم ناتفاقی دئور دی انت، ظاھر کنگ بہ بنت و شہ نیاما در کنگ بہ بنت۔ پرچاکہ ایشانءِ مقصد قومی تحریکا نزور کنگ انت۔ ریاستءِ واھگ ھم ھمیش انت کہ بلوچ گوں یکـّادگرا گٹگیر بہ بنت۔

بی آر اس او 25 جولائی – روزنامہ انتخاب: گلءِ بنجاھی کمیٹیءِ دیوان پاگواجہ گلزار دوست بلوچءِ سروکیا آسر بیت... دیوانءِ خیالا بلوچ قومی جنز یک نگیگیں وھدےءَ رستگ۔ اے وھدا بلوچ قوما تفاق بیگ لوٹیت۔ تانکہ دشمن شہ مئے ردیاں سیت چست مہ کن انت۔

بی آر پی و بی آر اس اوءِ بیاناں کسےءِ نام گرگ نہ بیتگ، البت ھر کس سرپد انت کہ ایشانی مقصد سیاسی گل و لھتے سرمچارانی نیاما بیوکیں چست ایراں سارت ترّینگ انت۔ المّا ایش ضروری توجیلے انت۔ البت بلوچ دودمان شاھد انت کہ تاں ھما وھدا سیاسی جھدکارانی رتکگيں خونءِ پلگاری منـّگ مہ بیت، یکـّے گوں آدگرا نزیک آتک نہ کنت۔