بلوچستانءِ بازیں شھر و میتگانی مردماں کرکٹ لئیبا پاکستانءِ دیما ھندوستانءِ سوبینی سببا گل کت۔ برمش نیوزءِ ردا بلوچستانءِ دودمانی بُنجاہ 'خضدار'ءِ مردماں شہ گلا ڈوھل و دوچاپی کتگ۔ إے مراگشا پاکستانءِ خلافا دانک ھم کوکـّار کنگ بیتگ أنت۔
بلوچستانءِ شھر سبّیءَ ھم شہ گلا مردماں تا شپءِ یک وھدےءَ شادکامی تیر جت۔ ھمے وڑا مکرانءِ شھر تربت و پنجگورءِ مردم ھم ماں دگاں دراتک أنت و پاکستانءِ بے سوبیءِ درگتا وتی وشـّی إش شوندات۔
إسلام آبادءِ واکدارانی دستا بلوچستانءِ گٹگیری برجاہ إنت و اودا إنسانی حقانی پادمالی بیگا إنت۔ شہ جولائی 2010ءَ دیم پہ إنگو نزیک 130 بلوچ سیاسی و شھری حقانی پانکجنیں جھدکار پاکستانی واکانی دستگیر و چیریں جاگھاں برتگ أنت. اودا لٹ کٹ کنگا پد کشتگ و جسد إش تلپیں جاگھاں یلہ داتگ أنت۔
بلوچ إنسانی حقانی پانکجیں تنظیم –کاناڈاءِ جھدکار إمتیاز بلوچءِ ردا پاکستانی واکانی دستا کشگ و دئور دیگ بیتگیں یک جوانسالےءِ ماتا وھدے حال رستگ کہ پاکستانءَ ھندوستانءِ دیما کرکٹ لئیب باھینتگ، گڈا شش ماھانی نیاما أولی برا آئیا نُسکندِتگ۔
بلوچستانءِ جاھمنندیں آرمین بلوچءَ درائینت "ھندوستانءِ لئبیاں ھزاراں بر مبارک بات کہ آواں پاکستان پرؤش داتگ۔ پاکستان ھنچیں ملکے إنت کہ آئیا میلیونانی بے میاریں مردم بیمتراپ داتگ أنت۔ ھمے پاکستانءَ بلوچ، أفغان، کشمیری و بنگلادیشی مردمانی *نسل کـُشی کتگ۔"
أویس جان نامین بلوچےءَ گشت " پاکستانءِ دوا پرؤش ورگ إنت۔ نیں وھد إنت کہ مردمانی دل ڈڈتر بہ بیت و شہ ھندوستانءِ سوبینیا درسے بہ زیریت۔"
هیچ نظری موجود نیست:
ارسال یک نظر
وتی کلوا چێرا نبیس إت